Friday, June 5. 2009
prolitnja verdura i sranje od spize...
Jednostavnost života u Dalmaciji se najboje more vidit na pazaru, peškariji i doma u kužini. 
Sve manje znamo guštat, komercija nas pritišče sa svi strana a polufabrikati nan se jakon marketinškon kampanjom utiravaju na pijat. Evo je vrime od artičoki, boba i biži a nađe se i još koji mac šparoga. 
Onda vaja čagod i poist zato triba vazest uja, soli, papra, kruva, vina, malo friške ribe i verdure. 
Inčuni iz salamure su ka stvoreni za marendin. 
A hobica na salatu je vrhunac jednostavnosti i užinavanja. Salata je ubrana iza kuče u vrtlu a vino natočeno doli u konobi. Za okripit se je ovi med iz Žrnovnice ka stvoren. Ma moran ga pofalit ako ništo onda poradi tega ča su mi roditeji iz Žrnovnice...i di je oaza čistega zraka i ugodne mikro klime...a tako je blizu mora.
Kako če generacije iza nas jist veliko je pitanje. Morete li zamislit, poteštat grada Splita se vozi majbachom a na zanjemu sicu mu je kil i po janjetine sa mladon kapulicon i sve smotano u kartu od cimenta...ajde nima veze, ma to je sasvin OK...spiza mirita...dok mu se u njegovu šoping centru u Splitu smistija oni lanac tzv.spize koji za maskotu jema klauna. Evo mi je priko šest banki i samo san jedan put to ča oni zovu spiza ija, ma mora san jerbo ništa drugo nije bilo otvoreno...a bi san gladan...još mi se okriče u trbuju. Ma luđe ne more bit i sad budi ti pametan. Svitu moj tribamo otvorit oči, komercija nas davi brez da to osječamo. A ča če ostat od spize...ma ko to zna.
cooking classes and culinary tours in croatia culinary croatia
