betula...koncept spize iz mora...

Kad se Betula otvarala bija san u Amsterdamu tako da nisan moga bit kad je bilo otvorenje ali nima veze evo san to refa ima nikoliko dan. Koncept van je ovaki, dođe se ajmo reč na malu peškariju i izabere se riba i mekne se na vagu...onda se vaja popet na prvi kat a kad si gori onda je tamo sve uređeno ka normalni restoran. Taki slični koncept san krajen 70ti godin onega vika i ja jema u Niskozemskoj u mojoj Konobi i mogu van reč da je to po miri gosta. A sad o restoranu...u Betuli je parilo ka da je umisto arhitekta niko iz Baumaxa oli Peveca doša i donija katrige, stole, koltrine i lampe, ma to je stvarno ščeta, jerbo da se stvorija ugođaj onda bi to bila...fenomenalnaaaa rupa...za poč poist čagod friškega iz mora. Ali nikad ni kasno, ka prvo po meni bi vajalo izbacit one puste ormare, plafonjere i one koltrine i napravit tepli ugođaj.

Dobro svitu moj, ma ne tribate me obadavat, ukusi su raznoliki možda san ja malo preosjetljiv kad su mi lampe na plafonu iz butige sve po 8 kuna. Uostalom svak jema svoj mot...pošto je ovo butiga di dolazidu gosti iz cilega svita onda vaja malo pronjuškat i napravit interijer koji bi se spoija sa njiovon stvarno dobron spizon...a eto več san reka spiza je OK, kad smo kod spize odma san judima reka da ču napravit malu reportažu tek toliko da se zna. Priporučili su nan refužo vino Kujunđuša od Ante Grabovca, ma pravi ga je užitak pit, nije ka ća se prije duperalo radit u Imockome pa da leži danima na dropu ovo je več drugi par postoli, pravi izbor, inače da mi je malo veči periskop onda bi oni Antin vinograd poviše Trogira moga vidit.

Betula nas je počastila sa mariniranin lubinon...divota...mojoj jubavnici je lubinova kožica bila malo tvrđa, možda nebi bilo loše da se ubuduče servira brez nje...a i dvi kapi limuna pomišani sa šoltanskin ujen bi se moglo meknit na stol. Moja boja polovica je vazela gavune sa late...savršenstvo jednostavnosti...to van gre ovako...u jedneme kantunu je krušna peć, loži se na drva i gavuni se deboto suvi meknu na jednu latenu pijadelu i onda u krušnu peć...a na stolu je Šoltansko uje to je pravo tekuče zlato. Par kapi priko gavuni pa zero soli i to je to.

Ja san izabra friške lignje na šporko uz nji su servirane balancana i tikvica rizane tanko ka kartina, ma samo su bačeni na gradela i bili su adente...bravisimo. I još ništo gostima se serviraju mini ciabatte koje su ala minut ispečene u krušnoj peči...pohvalno, samo tako daje. Usluga vrlo korektna a da se mene pita...a ko san van ja...onda bi ja kamarijerima i kuvarima da lipe tamne do tleva duge traveše, pa onda kuvarima maica a kamrijerima košuja sa logotipom Betule.

Ovako kad smo ulazili u lokal nismo znali jeli oni čovik kamarijer oli gost. Ma i ja van tražin dlaku u jaje, ali eto taki san. I još ništo ne more kuvar nase nosit maicu od one spliske banke i logotip Ajduka. Hm, malo isuviše lokalnega patriotizma, jerbo nikad ne znaš ko je u lokalu. Sve u svemu ovaka spiza sa ovakin konceptom traži malo ležerniji pristup i dalmatinski ugođaj. Ma daje trendy onda bi čovik reka, je to je to...ma niti T od trendy...meni se pari daje je niko diga lovu na interijeru a nima veze sa tin oli su vlasnici sami to sređivali...ponavjan, moj savjet...izbacite sve vanka i napravite dalmatinski ugođaj. Cine su sasvim OK ali kad se sve skupa zbroji spiza, usluga i ugođaj onda čovik dobije dojam da mu još ništo triba...i da je ostavija malo više novca. Spiza je sve spasila, da ste mi dobro i beričetno.