kotunjata...

prošlu šetimanu smo jemali drage nan goste i za dezert san in servira kotunjatu sa pijanin smokvama...evo ovod mala đirada kroz litrate...

evo van ka prvo litrat o pijani smokava...onda ovako, dunje moraju bit prvoklasne i ekološke...ja i sa opranon koron meknen u makinju o'kužine koja če male bokuniče dunje izrizat na sitno...u kori je pektin a on nan triba da se cila smjesa dobro stisne...na kil dunja dodan kil i dvista grama cukra i to razmutin u malo vode i meknen da počme kuvat a cukar mora izgubit puno vode i triba ostat gust...napose štrukan jedno pet limuna...dodan dvi šake orija i sve gori navedeno pomišan, onda to sve sa ručnin mikserom fino samejen...vratin sve gori navedeno ponovo na vatru uz stalno mišanje...kad se na tu smjesu more potegnit štrika i ta štrika ostane vidjiva onda je postignuta gustoča...ja i mečen u razne malo zaujene kalupe u koje san prvo poreda orije...ova kotunjata je tamnija jerbo san u nju izmlija puno orija...a i ovi bonboncini doli na kraju su od kotunjate i uvajani su u cukar, ma oni su van ludilo...kod bonboncina nima mliveni orija...moran se pofalit, ove bonboncine mi je napravila čer...pogledajte njezin blog evo ovod...bonboncini su gušt uz kavu oli liker...a i lipi su poklon...za dobru spizu ajte povirit ovod...