đem od mandarina...

stađun je od mandarina i aranči, evo san se potrudija na napravin jednu lipu ricetu đema od mandarini a ovako se more činit i sa arančan...vazmen obilati kil mandarina moje su neprskane tako da in mogu i koru duperavat...mandarine operen i osušin...kora gre na konpostiranje...a ostavin par bokuniča kore od dvi tri lipo zrile da i mogu narizat na tanko...jednu dunju iskrižan na sitno zajedno sa koron...dunja jema puno pektina a pektin je potriban da bi se đem zgusnija...dunju san sa po deca vode i sa malo cukra navisija na vatru...dunji dodan i kučarin mlivenega cvita i simena od koromača...dok se dunja kuvucka ja ogulin sve mandarine...a one lipe kore rižen na sitne rezance ali san in prije rizanja nožen skinija ono bilo ispod kore...mandarine meknen u duboki lonac i sa drveneon žlicon ih malo speštan nek puste malo soka na dno lonca i počmen mišat...kad je počelo puštat sok onda sve pasiran sa mixerom...dodan cukar i dobro promišan...ostavin na laganoj vatri brez poklopca da lagano iskuvava...kad se dobro zgusti dodan narizanu koru i po deca likera limončelo...pri kraju kontroliran jeli gotovo...meknen jedan kučarin đema na pijat i pijat malo nagnen ako se đem ne cidi na jednu bandu onda je gotovo...u čiste staklenke ulijen i to van je to...i još ništo na kil ogujeni mandarina dodan kil cukra...