zimski vrtal # tuinkas

e,e,...konačno sunce, cili dan smo lavurali, vajalo je mirit, namiščat, pilat, zavidavat ali je ispalo baš onako kako san crta i zamišja...evo san montira i ove murale na sjevernu bandu od zimskega vrtla, nju ču pokrit sa daskama koje če bit poslagane jedna na drugu tako da se kiša more cidit priko nji...ali sad je glavno da je caklo na svoje misto i da nije bilo loma...nastavja se...

Ma uvatija san jedan ajmo reč pogodni dan za počet ovu lavurat...ova mi je kišurina dojadila ma nikad stat...nakon ča san šalova oni dil di ču postavit vrata na nož, javjan se amiku, onda ča misliš bili mogli sutra počet a on vas sritan i njemu je dojadila ova kiša...nakon kavice i kolača došlo je vrime da se na starovinski način miša cimenat i žalo ma lipo na tle tamo di se parkira auto...a ove san bovane ovako poreda da bude malo ugođaja za oko a ne samo betonski zidovi...malo san ovi beton između bovana nakrivija tako da se ne stvaraju lokvice i da voda teče prima maslinan...ova dva reda bloketa na postojeći zid je da bi se postiga pad da more kiša sa krova da se cidi i to je bilo sve za prvi dan...sutra gren nabavit daske, murale i kantinele...pa onda vide, brokve i sve ostalo...zanje če bit valovita prozirna plastika za krov...a o temu kasnije...eto to bi bilo to...

evo malo novitadi okolo početka gradnje pla'caklenika oli van boje rečeno zimskega vrtla...bloketi su nabavjeni, cimenat je na suvo a žalo je na jarpi...ovi vratni okviri bile boje če bit sa zapadne bande potavjeni na nož, a biće i fiksirani i neče se moč otvarat, a između svakega ču maknit vertikalne nosače...da se mogu povezat jedno sa drugin...a ova kafena vrata če bit ulazna u zimski vrtal a one dvi ponistra isprid kafeni vrata če bit montirane livo i desno od ulazni vrata...sad kad je prošla prva marčana bura i nek prođe ova pusta kišurina onda se vaja uvatit montiranja...