đir po svitu # reisverhalen

Bilo je malo vrimena o bure a sa je jopet gnjilo, je da su dani postali duži ali nan fali tepline...Grad je malo pospan čeka promaliče...na veliko se raskopaje i sve se sređuje...oče li na vrime bit gotovo ah, nije važno biče kako bude...a priprema za novu turistčku sezonu ipak sramežjivo počima...vaja Grad izglancat i dovest ga u red ka ča i mirita staroj dami ka če je Trogir...a oni kojima je turistička sezona najvažija oni još spavaju, ma jema još šoldi od zanje sezone vrag odnija i prišu...a svitu moj ovod van je koristan website o otelskome smještaju u Splitu i okolici i to za sve takujine...

Svitu moj kako vrima brzo leti sičan se kad je "Đove" oli ti Ivana bila dite bili smo susidi, od diteta je postala lipa divojka a od divojke još lipša žena...jedno deset godin je bila na študiju u Italiju i sad je ovod u srcu Trogira otvorila šesnu butigu a butiga je taman po miri moderne žene. A mogu van reč da i malo zrilije gospoje kojima je moda pri srcu mogu kod "Đove" nač svoju "krpicu"...sve je lipo prižentirano nije ništa pritrpano a i monture se minjaju i nadopunjuju pa zato nije zgorega češče povirit kod "Đove" uvik jema čagod novega i za svačiji takujin...eto ovo je bilo malo reklame za "Đovu" sve najboje Ivana i još ništo one lipe slike u butigi jon je naslikala mater "Van Gogi" tek toliko da se zna a o ocu neču ništa pisat da je basista i nestor u grupi Magazin jer če me kad ovo pročita poslat u niku stvar...i još ništo ako se dogodi da Trogirska gospoja gre sa svojin mužen u šoping onda nima straja kod "Đove" je jedna udobna foteja tako da se muške noge mogu malo odmorit prije nego se otvori takujin..."Đove" pozdravi nan Andriju...

Sad kad je malo zaladilo tija bi meknit nikoliko litrati sa Sustipana...ovo je litrano 6.desetega 2009te godine...kad san bija dite svoje san ditinjstvo sproveja u Velome Varošu...ka dica smo se išli kupat na Jadrana i na Zvončac, sičan se koji je to bija gušt kad san prvi put dopliva do kavala di je sad lukobran od one male lučice...sad kad san tamo proša bilo mi je malo smišno vidit da je sve to tako blizu...

na Sustipan san uvik iša sa morske bande...amiko Joško iz Peniča kale je jema jednu lipu drvenu pasaru i mi smo sa Matejuške veslali do Sustipana...išli bi se pentrat uza stine i tražit jaja od galebovi...ma to su bile lipe zajebancije ko to more platit...a znali smo na vesla potegnit i do Čiovske kave na banjanje...

sičan se ka dite kad su iz grobnica pribacivali kosti na Lovrinac sve mi je to nikako bilo nestvarno mrce i stine pribacivat a moglo se sve ostavit ka ča je i na Merjanu Židovsko grobje ali eto taki je život oli smrt...žalosna nika vrimena žalosni niki judi...evo van ovod...

a kad san več bija momak onda san iša i na ples u onu baštu od Zvončaca...malo daje je bija košarkaški klub Split...ako se ne varan onod su i brača Tvrdić započeli karijeru...

ostale su uspomene a oni plato di je bija plesnjak je još onod zapušten u korovu čeka nika nova vrimena da bi se sve finalmente prominilo...a za luksuzni odmor je ovo pravo misto...