Dalmatian Slow food life...The Taste of Dalmatia # gastronomy

Evo je vrime malo omečilo ali još je kalendarska zima tako da je crveni kupus taman za ovo vrime...ka se kupus izriže i skuva temu se dodaju bokunići jabuke sa malo cimeta, dikod koji klinčić i list lovora...ona Moja je juneče šnjicele poklopjene u pečnici jedno 4 ure na 105 C spravila in umido, dodala je kučarin o'dalmatinski divji trava i obilato kapule, češnjaka, pinkicu kvasine i kvarat litre crnega merlota...uz to smo jili kuvani kunpir sa par kapi maslineva uja...rose merlot nan je bija taman kako triba uz ove ukuvane jabuke i štufano meso. A pošto je kupus velik onda se skuvan i olađen mekne u duboko i raspodili na nikoliko porcija a jabuka se svaki put ka se kupus dupera napose dodaje. 

Prvi par dan nan je bilo lipo parilo je ka da smo u Alpama ali brate nako deset dan još je uvik led i snig, e pa ča je tu je, ne samo da je previše nego bi snig tribalo dekreton zabranit ovod u Dalmaciji. Ali ne moremo iz ove kože eto Ona je napravila bronzin pašte i fažola a ja san saša doli u konobu i nalija Merlota. Prije obida smo se zaletili u brdo jedno sat ipo po snigu i ledu tribalo je zgladnit eto ka je već snig pa onda bi tili da ga se dobro izguštamo. Nestvarno je vidit origano, kaduju, smilje i ostale blagodati ovega podnebja kako su zatrpani snigon i viridu in vrji tek toliko od veloga sniga. Dosta za danas, vrime je da mendule koja su sve nabubrile, da nan procvitaju. 

Vanka je snig i led, mi smo se namirili sa spizon i moremo lipo gledat kakvo je vanka vrime. Ona moja plavuša se uvatila misit tisto za pizzu. Pola čemo danas poist a ostalo gre u duboko. Oveme stolu u kužini je ploča od granita i ka stvorena je za spravjat tisto o'njoki, kolači oli pizza...ta ploča je idealna a i visina je malo nizja o normalnega stola tako da nima bolova u križima. A o'riceti nebi ništa pisa jerbo se ricete mogu pročitat po raznin forumima o'spize. Sam ču van špijat da je duperala moju konšervu o'prošlega lita ta konšerva je tvrda ali ka se razmuti sa maslinovin ujen onda je ludilo. Nam je bilo taman po guštu eto dok se jedna pizza jila druga se još pekla. Na stolu je bocun Merlota i uz spizu je bila servirana dobra čakula i šaka smija. Isto mi je pomalo počelo se penjat na niku stvar ovi led i snig, vrime je da nan bude južina pa da nan se sve ovo raskrabi.