Vanka je snig i led, mi smo se namirili sa spizon i moremo lipo gledat kakvo je vanka vrime. Ona moja plavuša se uvatila misit tisto za pizzu. Pola čemo danas poist a ostalo gre u duboko. Oveme stolu u kužini je ploča od granita i ka stvorena je za spravjat tisto o'njoki, kolači oli pizza...ta ploča je idealna a i visina je malo nizja o normalnega stola tako da nima bolova u križima. A o'riceti nebi ništa pisa jerbo se ricete mogu pročitat po raznin forumima o'spize. Sam ču van špijat da je duperala moju konšervu o'prošlega lita ta konšerva je tvrda ali ka se razmuti sa maslinovin ujen onda je ludilo. Nam je bilo taman po guštu eto dok se jedna pizza jila druga se još pekla. Na stolu je bocun Merlota i uz spizu je bila servirana dobra čakula i šaka smija. Isto mi je pomalo počelo se penjat na niku stvar ovi led i snig, vrime je da nan bude južina pa da nan se sve ovo raskrabi.

U ona dobra stara vrimena ka smo kompa i ja držali kultnu Konobu u Niskozemskoj bila nan je užanca jedan put misečno počastit se sa janjećin buton...ajde nije uvik bija but manje više je bila potkojenica o'janca a mogu van reć da je i slađa od buta...prije spravjanja but triba bit suv i onda ga u tavi sa svi strane dobro isfrigat da se stisne korica i da sokovi ostanu unutra...koji put triba malo polivat masnoču sa kacijolon, ja duperajen maslinovo uje sa jednon žlicon masla...ka je lipo zarumenija onda ga meknen u jednu škrovadu a nju u banju mariju nek bude obilati 5 litar vode...dodan glavicu češnjaka u kori, grančicu ružmarina i par listova lovora...nek se peče na jakoj vatri ajmo reć 220 gradi i vaja pripazit da ne zagori nek to traje jedno dvi ipo ure, zavisi koliki je but...oni gornji suvi dil koji put malo polivat sa masnočon i nakon sat i po pečenja pokrit sa alu folijon...finalmente ja duperajen termometar kojega zaboden u but a unutra triba bit priko 80 gradi a ka je omekša i dobija rumenu boju onda je gotov...ostavin pokriveno sa alu folijon u ugašenoj pečnici još jedno 20 minuta...višak masnoče odvojin i sačuvan tribat če za drugu spizu...u sokove o'buta ulijen malo, kučarin / dva, nektar kvasine i kontroliran sol i papar...a onu glavicu češnjaka koja se pekla e nju štrukan sa perunon i pomišan sa sokovima o'buta a korice bacin ča, uz to se more jist svašta evo mi smo jili mišane verdure iz pečnice i ove klobuke od gljiva...a ovi antikni aparat u ovoj plavoj škatuli se duperaju kod rizanja buta ovo van je mala morša u koju se zabode i zavida kost o'buta i onda se tranšira e to san vidija kod jednega amika kuvara, eto pa i vi guštajte u temu...i na kraju san se spustija doli ukonobu da izaberen jedno fino vino...bilo nan je taman po guštu...

U našoj familiji je blogerski virus...kod sina, ćere i mene, dok mater samo buba libre...evo smo se vratili sa vijađa, bili smo kod ćere u vižitu, bilo je puno igranja sa unucima i sad nan je ovod u Dalmaciji zasluženi odmor, doma smo di je teplo i di guštamo...prije nego smo išli ča nazad dala nan je ćer ovi libar koji je izdan u Jamerike...ova organizacija se bavi promocijon treniranja mozga protiv bolesti alzheimera i drugi bolesti mozga, oni su na interesantni naćin izdali ti libar...izabrali su pedesetak svjetskih blogera koji su u svojin ricetama pripravili sastojke koji pomažu da bi se mozak aktivira i da bi se usporilo gubjenje pamčenja...ajde ja san to ovako iz ruke napisa možda je najboje da malo guglete...i da daje ne dujin ćer mi je u temu društvu, ne samo da je tu, vengo je fotka njezine ricete na naslovnici...pape je ponosan a kako i neće...davno je to bilo ka je ona diplomirala ka nutricista a za one koji to ne znaju diplomski rad jon je bija obrada moga manuskripta riceta koji san ja spravja u našoj kultnoj Konobi u Niskozemskoj krajen sedandeseti i početkon osandeseti godin onega vika...ah, dobra stara vrimena...bravo mala, boja si od pape ijadu puta...pojubi unuke...a tebi šajemo veliko bačo...

Vrime je o'bure i triba bit tako ipak je zima, sunce je zubato. Kod ovi điradi je uvik gušt vidit kako nan je lip pogled na Kaštela i Split dok su okolna brda i škoji ka na dlanu, ma divota. U daljini bleju ovce vrime je da se gre doma u teplu štalu triba i pomust...eto i pastira u ruku nosi janje taman se gori u brdu okotilo a mater lagano gre uz pastira brižna ka i svaka mater, malo su zaostali jerbo je triba pastir ovci malo pomoč dotle ostale ovce ne čekaju na porod, njiova kolona gre prima torovima.     Malo daje vidin zanju maginju od ove godine a pokraj nje nikoliko krava ovo je prava idila. Moga bi uskoro past i snig bar se tako prognozira. Sa ka smo napojili pluča sa friškin zrakon red je da se spustimo doli di je teplo di je doma je da su se dani odužili ali ipak triba bit doma prije mraka pa navisit koju litru čaja, sist isprid laptopa i sortirat litrate. Eto, da se nikako izdržat, život u Dalmaciji bar nama, gre u prvoj brzini i neka ovo smo i zaslužili i dugo vrimena čekali.

Bilo je to pedeseti godin onege vika nas petero smo živili u Velome Varošu, to van je oni težački i ribarski dil od tzv. grada pod Marjanom u Senjskoj kali odma poviše Šperuna. Ditinjstvo mi je bilo samo tako, prva skula je bila Marjan a onda nakon 4tega razreda pučke san se priselija u novu skulu Meje.

Kod nas doma je bija ovi stol na sri naše kužini na njemu se spravjala spiza, mater je pravila štrudel i njoke, brat mi je na njemu počeja pisat poeziju a sestra je svojin bebama za tin stolon "davala" spizu dok nan je pape na njemu pravija ćibe za grdeline i faganele. I normalno da su se na njemu domači radovi pisali. Brat je na njemu ka urednik pisa školske novine a priko puta naše kuće bi mu to pok. legenda šjor Smoje malo prigledava i nabacija koju prominu.

Meni je najdraže vrime bilo ka je mater na njemu spravjala đemove od šljiva i od drugega voća. Prvo bi se sve na stolu rizalo i vadile bi se košpice, rizala se pargament karta koja bi se docnije sa laštrikon vezivala. Ka bi đem od šljiva kuva znalo je koji put i da poleti do plafona ola smija ostale bi na njemu kafene mače. Volija san u toj kužini materi pomagat. Bila su to lipa vrimena Matejuška, Zvončac, Marjan i okolne kalete su nezaboravni dil moga ditinjstva. Docnije smo se priselili živit tamo ispod Koteksa di mi još danas mater živi. Tamo se stol puno godin koristija na njemu su se rizale torte za našu ćer i mene koji jemaju rođendane u sri lita koje je moja mater spravjala. Nostalgija da ne more bit veča.      

Nakon selidbe je ovi stol naša svoje misto u našoj drvarnici, pape ga je dupera za razne lavure ka ča je vezivanje tunja, udica, dricanje olova i pravjenje ćiba. Tribalo je proć priko 4deset godin do momenta ka san ga "usvoija" i da mu novi život. Izbrusija san mu ploču od kulira i pitura noge. Još se vidi di su se noge od stola ruvinjale noge su se pomalo otukle ka su se tanburini ispod njega mečali. Nikoliko stari tanburina držin u zimskem vrtlu na njima stojidu pitari sa cvićen. A sa je ti stol svoje misto naša u našoj litnjoj kužini eto povjest se vrača barenko ča se tiće moje matere i jopet se na njemu pravidu đemovi i njoki cilo lito se duperaje za spravjanje razni delicija. Eto najlaške je bilo da se stol baci u škovace ali pošto mi dvoje volimo starovinske stvari a pogotovo ovi stol sa svojon povišču e onda ga vaja sačuvat za nova pokoljenja.

Zove me amiko da jema par lipi bočica vina i bocu ratafie iz Bourgogne i nek ponesen malo baškotina oli kruva dok on jema francuski sireve ka u prići...ratafiu nisan odavna pija, to van je ka naš bermet meni je bija po guštu iako mi bermet boje legne ali to je sentimentalnost, pogotovo otkad san ga i ja napravija i malo pripravija da bude po mome ukusu...sirevi su se topili u justima čaše su se vrtile a pala je i čakula a amiko je dobar kogo a i često putuje u Francusku tražit nove inspiracije i donosi kašete vina, kolekcija mu je zavidna a za popit se uvik skupi ekipa...ovi margaux je bija prava elegancija s njin smo počeli a kako i nebi kad su bordeaux vina prava fina aristokracija njegovani da bi se uživalo sa finin jelima a docnije je stiga ovi bourgogne rose on je odrasta i posta je pravi muški sa naglašenin bouquetom i okruglim gucom, da san jema pokrivene oći mislija bi da je stasiti crveni bourgogne, eto malo se popilo, čakulalo i to van je to, brez velike šminke...

Vrime je da se jopet uvatin ove lavure, ma znate, ako ste moj blog pratili kako mi je bilo, prvo mi je na lito 2010e pukla ahilova tetiva onda operacija i rahabilitacija pa san dugo vrimena cota a i puno san lani đirava po svitu ali sad je sve u redu i ovi projekt triban završit jerbo godine gredu. 

Nabavija san pravu makinju, bušilicu na čekić, kojon mogu skidat stari inkarat, sad je puno laške lavurat nego sa macon i puntarolon. U dva dana san više učinija vengo pri u cilu šetimanu. Baš san danas malo gleda, grubega posla je još jedno misec dana a nakon tega moran počet širit fuge kroz koje če proć letrika, tako ka se bude sve fugiralo neće se ništa više vidit di je letrika prošla. Eno na litratu di je ono jaje od goluba san već napravija konal za glavni vod letrike.

Skidajuči inkarat naletija san na lipe buže u jednoj je bilo jaje od goluba a onu drugu moran još do kraja otvorit već se po sredini vidi malo svitla. Vanka sa bande o'kale ču meknit mrižicu tako da ne ulazidu beštije a da jema ventilacija. A ugodno san bija iznenađen ka san otkrija još dvi sakrivene ponistre oli ti vele buže u zidu. Sve su u dnevnoj sobi jedna pari ponistra sa caklima, druga je malo manja i još su dvi malo manje, ma ludilo. U te ponistre ču sprovest letriku tako da če bit lipo i intimno. Ka san skinija inkarat i vidija konture ove skrivene ponistre došlo mi je na pamet a možda je čagod iza tega zida niko blago, dukati, ali ništa samo su miši uspili napravit gnjizdo ko zna možda su poili forinte, dinare oli lire. Aaaa, teško bi tega bilo u ovoj kućici ovod su živili težaci i bila je pusta mižerija a bivši vlasnik navrati koji put puno mu je drago da ču sve ostavit autentično i da če ostat stari drveni tavani i meknit se nove drvene skale. 

U zanje vrime san puno gugla da vidin kako se to u svitu radi i onda san odlučija ostavit ča više originalni stvari ma ništa od plastike oli aluminija. Daske o'tavana san odlučija skinit i odnit doma i dobro isprat pod veliki pritiskon pa i onda sa karton deveron izbrusit i natočit sa tekučinon protiv crva i gamadi. Pošto su daske izlizane dobile su na karakteru a to je ono ča bi tija.

Plan san malo prominija u prizemje če bit kužina i blagovaona za užinavanje a ispod skala mala sprema. Na prvi kat je planiran dnevni boravak a na šufitu je spavanje i ocakljeno kupatilo. A za ocakljeno kupatilo tražin po butigama pogodno caklo, ma jeman nike ideje moran vidit očeli to moč stat jerbo je gori sve malo basetnije a tuš i wc če bit konpletno u caklu i sve če se vidit, je da je malo kinky ali nima veze ionako ovo neče bit kuća za obitavanje vengo za turizam. A za tako ništo osobito se uvik nađe dovojno svita.

Eto,... 

Sa ka je punila tremuntana došlo je vrieme da obriže loza, svake godine je ista pisma, ja san našu lozu s'odrine usitnija i tu lozinu spremija, tribat če za gradela...a susidi još čekaju, bar ovi koje san litra nakon popodnevne đirade...ružmarin je procvita a i njega ču uskoro počet rizat nesmi mi ić u visinu...život gre u prvoj brzini, pomalo nije priša, a uskoro če bit i novitadi iz naše dalmatinske kamene kućice...vrime je da se uvatin lavure, ma malo me je satralo to ča mi je ahilova peta pukla i dugo vrimena sn bija vanka škvare ali sa je sve pod kontrolon i gremo u nove radne pobjede...

Nakon pusti điradi po EU vrime je se jopet uvatin moji domači đirada u ove dane ka je malo tremuntane i dok se sunce još uvik ćuti najboji lik je poć u brdo napunit pluča i guštat u svitlosnoj terapiji. Nebi tija ovod pisat da sve znan o klimi i slično ali kad u prvi misec vidin da jema ovoliko cvića i da su se grane počele pupat onda se pitan ko je ovod lud. Ma nek bude kako bude, meni ova klima godi i nikad mi ni dosadno, samo triba koji put pogledat na tle, slegnit se, litravat, malo stat i guštat u toj lipoti. Nek van ovi litrati daju odgovor daste mi dobro i beričetno...

Malo pomalo smo počeli minjat i ovu Novu godinu puno svita če brzo zaboravit onu Staru ma triba gledat naprid...nova Vlada ne obečaje puno a to mi je dobar znak, sve zavisi kako se gleda, dok ja ovod pišen o lipoj spizi u nas jema puno svita kojemu je život težak da se razumimo nije meni grižnja savjesti ali bi ipak volija ka bi puku bilo boje a ne samo njima...

a mi smo lagano obidvali...Ona je okinila glave o'ribe i napravila juvu za lizat prste a prije nego je meknut angriz u kuvanu juvu smo mekli sirovu ribu jušto pet minuti i onda ostavili na teplu poklopjenu terinu...šaka napose kuvanega angriza se doda u juvu samo da se ogrije i onda moremo počet jist...kruv je Ona ispekla malo smo ga polili sa ujen češnjakom i nasickanin selenom a bilo vino je iz suda od sto litri sasvin desno doli u konobi, malo smo ga oladili da boje klizi...blitva je brez kunpiri samo sol, papar i maslinovo uje...

lipi obid u našoj kužini a kasnije čemo malo poć protegnit noge do brda nek se prvo ovo vino malo slegne...;-) 

Sa ka je ovo prosinačko ludilo iza nas bija bi red da se počme čagod lavuravat...triba rizat ružmarin a i lopočika koja je u cvatu bi tila da se malo obriže dok nešpula cvita ove tratinčice i ružmarin su u cvatu, ma neš ti zime...

evo san primistija sandučić od pošte i zavida ovo šesno zvono a na parkingu san veza ove mriže tako da se bršljan more penjat i plest biće lipa ladovina za novi tonobil...

stiglo nan je novo lito i počimaju novi guši da ste mi dobro i beričetno i uskoro su nove radne pobjede...

guštanje sa unucima i sa našon dicon...

đirade po svitu... 

malo ču molat sa pisanjen a tamo nidi u prvoj šetimani 2012te če jopet bit novitadi...

Evo ulazimo u zimu bar je tako kalendarski, a i zaladilo je, okolo kuće je manje lavure, skupja san otpalo lišče i ka šušanj ga stavija ispod cabal da pokrije zemju i da se zemja malo smiri, ma nek se milijuni mali beštija zaštite od mraza i da na promaliče mogu jopet pomagat da se uspostavi bioraznolika ravnoteža u vrtlu...

ostavija san još ništo maslina na cablima da dobro sazriju i da se masline smežuraju a ka dođe vrime meknit ču ovod ricetu priprave...naranče su deboto zrile šipke smo već poili a ogušta smo i štrukavali, ma ludilo...

blitve i selena je napritek a češnjaka i kapule san puno posadija...prisadije san i artičoke sad i je u vrtlu priko dvadeset a ove male papričice su pikantne, ka sazriju nji osušin i u peštaduru smrvin...susid mi je da par prisadnica od pelina dobro če doć ka buden pravija gorke likere...

kumquat mi ja da amiko a moran i ja nabavit jedno cablo od njega se more pravit puno lipi riceta...mandarine čemo uskoro ubrat skuvat i pa napravit lipu kašu i to gre u duboko, u svaku vričicu po 250 grama to nan je mira za napravit lipi kolač...i na kraju cile lavure zaslužena kavica u zimskeme vrtlu...

Evo prosinac je samo taki malo bure malo juga a kiše nidi...e pa onda je vrime da se vazmu bičiklete i napravi lipa đirada po južnin padinama Marjana...pa je dogovor sa jubavnicon...

lagano mažinajemo a meni oći padaju na kultna mista Ježinac, Kašjuni...pogotovo na južne padine Marjana di san se ka mulac pentra po klisurama i tražija po gnjizdima jaja od sokola...pa onda prva fačkanja i nezaboravna Marjanska škuribanda a na Zvončacu san se naučija plivat, nikad neću zaboravit ka san odpliva do kavala a sa ka vidin da je to jedno dvadesetak metri uvati me smij ali u ono vrime je to bija podvig...popeja bi se na kavale malo odanija i onda nazad...ma ja san van malo kasno naučija plivat jerbo bi liti uvik po par miseci bija kod dide i babe u Žrnovnici...zato mi je velebni Mosor ka da san doma...a sa san ovod i čutin lažinu, ajme...

docnije ka san počeja dobijat brke i izgubija glas slavuja od muške mutacije e onda sam se pribacija na Kašjune, moj amiko Joško i ja bi sa sa ostatkon ekipe sa Matejuške na vesla išli okupat  u Kašjune, hm, koja su to vrimena bila a znali smo se zaletit i do kave na Čiovu...bila su to vrimena kako je sad moderno reć ka je bija mrak, nek oni pilaju o mraku meni je mladenaštvo bilo samo tako...evo van malo litrati pa guštajte...

Ove godine je vrime samo tako jesen ka da nije bila još malo pa počima i zima ali eto od zime nima još ništa, tratinčice su u vrtlu, ružmarin je u cvatu a i nešpula je ka i svake godine u cvatu.

Deboto svaki dan sa mojon jubavnicon obidvajen vanka a u litnjoj kužini je ugodna fibra, sunce tuče u glavu tako da se komodna sidi u kratkin rukavima.

Danas je Ona pravila njoke i ispekla but o'tuke u vrtlu jema mlade salate, friško da ne more bit friškije...vino je iz desnega suda godina je 2010ta lipi pitki Merlot...eto...prognoza je da če se vrime prominit onda tribamo još malo guštat...

Sve najboje u Novoj Godini, nek van bude ka i meni...

je da je molo pripotentno ali eto baš bi to želija...

primite srdačan pozdrav...pa onda, do čitanja i pisanja...

Još malo pa je finila i ova ali prije nego je počmemo minjat triban napravit malo bibita i ostalega...pod ostalo je ono ča san več napravija na kraj lita a to su sušene pomidore na suncu, isto tako i balancane, pa onda pijane smokve i matar to sve je već u maškaduru...sa je red doša na masline u salamuri...a tek maginje, smričke i divje kruške...svo se to lagano točaje u lozovači i vata zanje sunce da pusti ono svoje tako pripoznatjivo za naše podnebje u Dalmaciji a te če nan bibite bit sičanje na lito i na lipe gastro gušte...još moran sredit mandarineto eno su kore o'mandarine na točavanju a tamo nidi krajen prvega ču ga napravit...eto, da se nikako izdržat uskoro su ovod nove radne pobjede...

Da bi se guštalo u životu ne triba nan puno tega, ugodna šetnja do mora, doživit lipi zalazak sunca i onda se vratit doma pa uz laganu mužiku kušat malo biškoti o'mendula sa mandarineton...Ona je ispekla biškote a ja san napravija mandarineto...biškot se lagano umoči u mandarineto i onda se onako mokro ji...ma ludilo svitu moj, eto nakon ovega sa izborima i nakon minjanja Vlade samo tribamo poželit da če puku život bit malo laški i da čemo se finalmente uvatit lavure i bit ravnopravan dil naprednega svita...eto malo san se odalečija od teme ma svitu moj ajte malo u prirodu oslobodite se pritiska i napunite baterije...

Studeni misec je bija tako tepal da bi čovik povirova da je promaliće...zato je tribalo iskoristit svaki dan za šetnje oli đirade sa bičikleton...dogovorija san se sa jubavnicon da se malo razgibamo vozeči bičiklete...od Nehaja pa do Gojače i nazad...laganon vožnjon uz more vidi se puno tega lipega a moš i stat di te je voja...otkad je oni bokunič između Lukšića i Kambelovca asfaltiran prava je divota điravat...a da je bilo pameti i da se na vrime sredija lungo mare do Resnika i sanirala ona ekološka sramota u Gomilici i Sućurcu onda bi se moglo bičikleton oli šetnjon proč uz more kroz svi sedan Kaštela...taman ka smo mi điravali radilo se na kanalizacijskin punpama za Eko Kaštela i za pofalit je kako je to lipo uklopjeno u okoliš, još ka se posadi cviće i grmje nečemo ni znat ča je to...i tako mi laganino do Gojače i onda nazad, na par mista smo stali malo san litrava i napaja oći...život uz more je u prvoj brzini, puno je penšjunata, dice, dok škovacini skupjaju lišče sa tleva u Kanbelovcu su veslači aktivni, ribari u portu prigovaraju a na tiramolima se suši bila roba...zanji put san pisa o konobi Stari dvor u Starome...i reka san da čemo se vratit eto u povratku iz Sućurca smo kod nji obidvali vrhunsku tunjevinu na žaru, blitvu, kunpire, kruv, malo vina i kavice...jušto 177 kuna, bravo ekipa i specijalni pozdrav kuvarici, dok je ona tamo nima problema za konobu, ta gospoja se razumi u svoj posal a usput nas je i posluživala...turizam u Kaštelima more i na ovaki naćin pijanisimo brez megalomanije svitu moj nemojmo pravit drugi Primošten, Vodice oli Okrug ostanimo ovaki, sa malo dricanja i ulipšavanja moremo napravit čudo ali nek ostane patina...zamislite odmor u miru a ako ti triba šušur onda se more poć livo oli desno...ma ko to jema...

Zove me amiko i kaže, ma daj navrati gremo gori u brdo do sela naša san kod jednega čovika staru prešu za vino pa bi je donija doma i priuredija za prešanje maslina. Ne triba mi dva put reć i mi se vozimo prima gori pa sve ukrcamo u mali kamionet...a preša je teška jemala je kapacitet 450 kili grozja...

amiko je inače izumitej on svakega vraga zna napravit a drugi amiko je veliki meštar o metala tako da je u firmi napravija ova dva cilindra sa bužama... ispilali smo nikoliko murala na prikladne bokuniće to nan triba za pritiskanje...staru muljaču za grozje smo malo prigradili da se mogu mlit masline i to van je to...a ja san naša ništo rostvraj suđa, pripremija sita i filtere pa smo mogli počet...

prvo smo masline mlili kroz muljaču za grozje tu nan je bilo problema jerbo su crne se odma speštale ali zelene su ostale prikinute po pola...onda smo te zelene štrukavali sa bokun drveta dok se nije napravila lipa pašta...a ka to nije bilo po miri onda smo mlili još jedan put...paštu bi ostavili cilu noć da se malo masline oksidiraju...

drugi dan prvo se dobro miša pa sve gre u prešu i onda počima lagano pritiskanje...u prešu je najboja mira 60 kili mliveni maslina...nikakva vruča voda samo pritiskanje pa ča izađe nek izađe...dnevno se pritisne jedna preša i pripremi pašta od maslina za drugi dan...tako da amiko radi svoj posal oko kuće i onda po koji put malo pritisne manicu od preše i sila onda radi svoje...i još ništo, košpica je ostala cila tako da će ovo uje bit stvarno specijalno...

od deboto 60 kili maslina san iz cuga izvuka 3ipo litre uja...a 10 litri ociđene vode sa ujen i talogon san ostavija da se napose taloži i to ču ubrat nakon tega ciđenja...računan da če bit još jedna obilata litra...ovo je bila prva godina, dogodine znamo ča nas čeka, tribamo napravit nike pripravke a najvažnije je da se masline dobro sameju i promišaju...separacija če ostat ista ona je samo na prirodneme taloženju...je da je prinos manji ali zato nima troškova koje bi ujara na centrifugu tražila za prešanje tako da smo financijski čak i u dobitku...

a pulpu čemo sušit i od nje pravit brikete za kamin, za sve ovo triba pacijenca i vrime...najglavnije je da preša ladna da ladnije ne more bit i da se sve radi na ruke...umočija san prst u uje i počeja guštat...to van je svitu moj originalni noćnjak...nek se malo smiri i razbistri...ovo je likarija samo za vrhunske bokune spize...

Ma nebi ovod pisa u temu da je prije turizam bija boji i da je bilo više furešti to je tako bilo i vaja se okrenit budučnosti, ja bi se ošerva na današnje vrime, eto u Novome se vididu konture novega otele i to na oneme mistu di je bila vinarija, ma jeman špurju da če ovi otel bit motor zamašnjak koji če pokrenit i druge investicije...a i grad bi triba sve to pratit i pripoznat napore investitora pa napravit kaštelanska mista po miri našega čovika i po miri naši gostiju...mi dvoje smo se ove nedije malo prošetali kroz Kaštela, svitu moj ovake idile i ugođaje nima nidi na Jadranu a ovako dugi lungo mare jema samo Opatijska rivijera ali mi se ipak pari da je naš Kaštelanski lungo mare duži i pitomiji...ma nek su u Opatiji njezine vile mi jemamo naše kamene vile a nađe se i šesni oni pravi vila...u jedno lipoj vili u Starome je otvorena konoba Stari dvor... ma konoba ne more bit na bojeme mistu, zapadno prima selu jema nikoliko kafiča, butiga, đardin i lipa plaža, okolo judi fitavaju apartmane, istočnije je nažalost još uvik zatvoreni otel Palace...a isprid su plaže, zapadno in je ka prvi susid kamping...stvarno idealno misto za konobu...na teraci ti zastaje dah o lipega pogleda, još ka bi se grad pobrinija da isprid nima parkirenja onda bi bilo idealno misto za popit kavu, poist bokun mesa oli ribe i sve zalit žmulon vina...povirija san u kužinu i evo van na litratu kako se spravja pizza u originalnoj krušnoj peći, kako i mirita...divin se ovin judima koji su se uvatili ove lavure, virujte mi nije in lako, ali ja san siguran da se turizam pomalo vrača u Kaštela...mišjenja san da ne triba u Kaštelima puno minjat...sva srića da se nismo unakazili ka druga turistička mista, ma ovod sve odiše načinon života 60i godin onega vika a to je ono ča dobro platežni gosti vole, uteč od modernega života i vratit se u mala jednostavna mista i u miru pročitat one knjige koje su tili odavna pročitat...u Kaštelima ka prvo triba sredit kanalizaciju, onda zabranit liti vožnju auti uz more u popodnevne i večernje ure, vaja posadit puno cvića, piturat kuće, sredit okućnice...sve se to more ako se oće, pa malo dricat rive i dat šansu mlademe svitu da brez puno problema moredu otvorit raznorazne uslužne obrte kojima bi se turizam obogatija...još ka bi se u Kaštela doselilo jedno dvisto do tristo penšjunata iz EU-e oli sa kontinentalne Domovine, onda bi bilo šušura po cilu godinu...a Stari dvor je na kraju ove štorije lipo misto za doč i guštat...želin in sve najboje...dočemo jopet...

Život na selu je prava divota...u ova vrimena ka je sve digitalizirano i ka nima problema bit u kontaktu sa sviton najlipše je bit na čisten zraku i uživat u blagodatima prirode. Masline, verdura, grozje, agrumi sve je nadohvat ruke a ka temu dodan mediteransko bilje okolo kuće onda me morete razumit da ovod guštan. Svake godine ostavin za sime razne verdure i sušin dalmatinske začinske trave. Lipa zanimancija eto, znan ča jiden i sa čin pripravjan spizu. Sad vaja sredit mendule i sve ostalo meknit u caklenke. 

http://www.slobodnadalmacija.hr/Mozaik/tabid/80/articleType/ArticleView/articleId/155938/Default.aspx

Evo sa in je pravi stađun, sunca je napritek reka bi čovik da je promaliće...ka je pala zanja kiša onda su ka lude počele rest i zrijat...i tako mi dvoje Ona i ja prošetamo do obližnjega brda tamo jema maginja ka u prići...dok Ona gušta u krajoliku ja san nabra nikoliko kili maginja...onda smo se spustili doli doma pa san se odma uvatija pravit đem...evo van moje ricete...tri kila maginja san opra vodu bacija ča i ocidija...doda san kil i kvarat o'kila kristalnega cukra...meka na špaker i na laganoj vatri počeja mišat ka su se počele kašit vazeja san ovi štrukač za pire kunpir i sve dobro pritisnija...nadaje, štruka san pet limuna i doda dva  kučarina vanilijinega cukra, ovo je specijalni cukar sa dodatkon prave crne sridice o'vanilije...sve se daje miša a gotovo je ka se sa drvenon žlicon potegne štrika po toj kaši i ta štrika ostane vidjiva...to znači da je dovojno iskuvalo...u caklenke koje san iskuva zajedno sa pokrivalima lagano stavjan vrili đem i ka je sve gotovo okrenen naopako i ostavin da se oladi...olađeni đem čuvan u maškaduru...eto, vidit čemo za koju ricetu o'dezerta ču to duperavat...a nače se i za unuku i unuke...ludi su za palačinkama sa ovin đemom...

Sa ka san sredija vrtal i posadija kapulu, češnjak i posija blitvu doša je red i na zimski vrtal...sve đirane san tamo meka da prizimu eno i u pitarima a jeman još uvik i murtele ona če prizimit tako da če platit šaša o'poma...bere se matovilac i selen a u kantunu je i cablo o'banane...eto sad malo pomalo vaja zimski vrtal napunit biće to lipa zanimancija ove zime...

Bilo je to na promaliče dobija san mail od jednega čovika koji me je zamolija bili moga meknit dil moga teksta sa bloga na turistićki vodić po Šolti kojega upravo piše...bilo mi je puno drago da mu se svidilo i reka san da more samo nek mekne link na moj blog i to je sve...ovo lito me zove i kaže evo me u mojoj vikendici u Trogiru ajde navrati do Galijona pa ču ti dat jedan primjerak i naravski potpisat ču ti ga kako i mirita evo san se vratija sa Šolte di san načelniku opčine Šolta prida prvi primjerak...malo smo čakulali listali libar a meni se puno svidija jema puno lipi litrati i jednostavan je način pisanja...o svakoj vali oli mistu su dodani i GPS koordinati, eto kako se more spojit tradicijonalni i moderni svit...nakon kavice i ugodnega razgovora smo napravili điradu po Trogiru...on zna puto tega o Gradu ali san mu i ja uspija kazat nike stvari koje pri nije vidija...nek to za sad bude mala tajne ovega lipega Grada...nakon đirade i uz žmul vina pa je dogovor da če se uvatit pisat i turistički vodić Trogira...ma zna on da ga već jema ali nikad ni na odmet da se napiše malo drugovačije...eto sa smo ostali u kontaktu, litraju je pusti litrati pravidu se pripreme skupja se materijal i diskutira se o konceptu...diš boje lavure ka si doša do penzije vengo pisat o stvarima koje su ti pri duši...o Šolti je pisa jerbo je puno jidrija oko Krknjaša, Maslenice i Mrduje i zna sve o Šolti...a u Trogiru mu je na Pasikama več godinama lipa kamene kuča i eto dodatnega razloga za napisat vodić o Trogiru...ova zima če bit napeta ako sve bude kako je zamišjeno onda bi Trogir dogodine dobija lipi vodić po Gradu.

teplo priporučujen ovi vodić...za informacije ajte na...www.zola.hr i na mail...zola@zola.hr

Na susidovoj zapuščenoj parceli deboto dvista metri od naše kuće je ova vela divja kruška...plodovi su mali i tek kad počmu kafenit onda i se more jist...onako zelena je puno trka...pošto je mala u njoj je relativno puno košpica ali zato jema puno lipoga okusa...ostavija san i u zimski vrtal da se suše pa ču i onda meknit u rakiju da vidin rezultat, ne virujen da ču falit ma ova se rakija pravila po istri i dalmaciji...a od stariji judi san čuja da se nanižu na bokun konopa i onda se suše pa se zimi jidu...kažu da je to ludilo...to van je bilo vrime ka nije bilo aranči i banana...uh, sve se prominilo...nanizat ču i ja koji kil na bokun konopa...a rakija, znan da neće bit vilijamovka ali ču je zato nazvat rakija dalmatinka...

Iskriža san tri kila kupusa, posolija ga pa doda malo lovora i tri režnja češnjaka...dobro san pritiska pa lagano nadolija kuvane vode taman da kupus bude pokriven...poviše svega san meka piz i sve poklopija...odnija san na kat isprid klizni vrat o'lođe di je malo teplije nek se počme fermentirat...a ove zime če bit lipi delicija sa njin...nastavak štorije če bit ka kupus bude zgotovjen...

Đirada po Europi uvik završava doma...doma je najlipše...doma je teplo...doma su pripoznatjivi mirisi...doma je domače vino...doma je domača verdura...doma je domače uje...i doma je najboja klima...a ča smo jili i pili evo van ovod...

Moj zet van nije od vina oli piva, ma zna koji put popit žmul reda radi i to van je to...ali zato whisky e to voli i u temu gušta...sve je to kod njega stvarno pijanisimo dva tri puta na šetimanu po jedan bičerin...danas je nabavija ove tri boce koje do sad nije pija a pošto san potrefija nije bilo druge vengo kušavat i naravski o'gušta progucat...bilo nan je lipo, čer i Ona su pile čaj a mi smo malo filozofirali...ovi Škotski sa bilon etiketon je ludilo o whisky-a...ka san ga povonja i malo promiša u justima pari da san popija razvodnjeni jod...ovo mi je stvarno lipo leglo jeman špurju da on nije za svakoga ali eto meni je stvarno bija po guštu...ona dva druga su Irski od iste destilerije samo ča je oni od 10 godin odležava u bačvama koje su bile obrađene sa trišnjama...pinkicu bacaju na slako ali je stvarno bibita i po...a oni od 16 godin je odleža u bačvan koje su bile obrađene sa porton...on je bija ajmo reć muški...lipo se razletija po justima i ćutija san ga dugo...ajme,...lipa degustacija a sad gren pod lancune...

Ka smo po europskin buvjacima uvik gledamo bili našli čagod iz prohujali vrimena ča bi nan moglo koristit u našeme hedonističkeme životu...svak jema svoj hobi a naš je kuvuckanje, vino, verdura i spravjanje svega ča nan more bit lipo na pijatu, ča reste u našem đardinu i na okolnin brdima okolo naše kuće...ovi put smo kupili lipe stvari u butigi Nirs u Splitu a meni se osobito sviđaju ovi domači bocuni...ka nan dođu gosti onda se svak sa svojin bocunon spusti šoto u konobu...popije se aperitiv i onda se vračamo sa punin bocunima...a ovi donji litrati su van šesne stvari sa buvjaka u Amsterdamu...

Đirada po Europi je evo pri kraju prije nego smo išli napravija san vino i meka ga da tiho vrije...za moj Merlot nima problema to je postala rutina ali san zato znatižejan kakvi če mi bit rose...eno ga onod u livoj demejani ona čeka na me...a ove zime če bit i mandarineta i limončela...orahovica je standardna a bermeta jema još dvajstipet litri...ma ko če to sve popit...ali neka uvik je zgodno dat bočicu na poklon...ove zime če bit gušt bit šoto sa malo pršuta i sira, dikod koja maslina, kap uja, dobra ekipa a pašče i pisma...meni draga jednostavnost hedonističkega života...

Ovo su vrimena ka se sa pametnin izboron more sredit život jedne cile familije...zanji put san meka info. o prodaji vočni sokova a sad evo i o prodaji vafla...investicije je mala proizvod je aktuelan judi vole poist vaflu a sve se peče isprid gostiju...još ka bi se svemu da naš dalmatinski tinbar ka ča je đem o smokava oli tanke fete praske oli mišanca od raznega voća a more i sa mladin siren...i sve se pospe sa cukron u prahu i to je to a more i ka če je ovod na litratima i sa čikolaton...svitu moj ovo je ideja koja bi se kod nas na obali našega lipega Jadrana mogla sprovest u život...nabavi se jedna šesna karijola i kraj nje se mekne jedan stol...mali frižider i par plinski boca oli letrika za pakače vafla i to je to...lavurat triba a sa ovakon lavuron more cila familija da živi...ajma svitu trgnite se niko van neče dat posal...sami ga stvorite...

Malo pomalo naša se dalmatinska mista sređuju i otvaraju se betule razni profila. Jeftinije, skupje, još jeftinije, friška spiza, sumjiva spiza, sa fast i sa slow spizon, boje reć za svačiji žep eto tako i triba nismo svi jednaki, ma nimamo svi puno šoldi a nimamo ni istega načina guštanja u spizi.

Divota je vidit kako se okolo Foruma i Donata sve lipo sredilo i popločalo a Arsenal je posebna štorija izložbe, kvalitetna spiza, ugodna teraca, izbirljivi restoran, poezija, grand cafe ma svega jema to je pravi lipi Zadarski đir. Kvalitetni su restorani kraj Foše a liti je svakodnevna autobusna pruga do Zrča. A o Pagu bi se mogle pisat cile štorije Paški sir, janjetina, izvrsna riba sa kamena, ekologija, cvit morske soli, muzej soli u Ninu sve je prvoklasno sa fenomenalnin hotelon i restoranon Boškinac u Novalji a o njiovoj vinariji bi triba napose pisat.

Pitoreska sela ka ča su Poljica di se proizvode delicije od friški i suvi smokava oli Rtina sa svojon mini klimon di bura zna ola,la puvat ali je zato u Rtini gušt bit okrenut prima jugu. Sve se uklapa u novi naćin hedonističkega života.

Zadarski muzej cakla je stvarno vrlo poseban a o morskin orgujama i pozdravu suncu se toliko tega pisala tako da ja ne triban ništa dodavat. U Gradu je posebni štimung, kale su sa šesnin oštarijama i betule su na svakome koraku a ka se trg o'Pet bunara sredi Zadra če bit pravo ludilo o'gastronomije i ugodnega života. Nikoliko boutique otela svemu daje posebni tinbar. Sa svojin zaleđem Ravni Kotara i Bukovice sa ekološkon spizon i novin nasadima maslina i vinograda malo pomalo zauzima svoje pravo misto na gastro karti Dalmacije.

Ka san bija mali mater bi nan bratu, sestri i meni spravjala paradižot, to van je lipi dalmatinski dezert o'domači jaja, piškota, prošeka i cukra...koji su to onda bili gušti poist a najdraže mi je bilo na kraju ka je mater sve spremila sa drvenon žlicon pokupit iz teče ča je ostalo i onda teču polizat...vrimena su se prominila sad se dezerti kupuju u butigama i sumjive su kvalitete... ja san krajen sedandeseti godin onega vika paradižot jema i u našoj Konobi u Niskozemskoj...ali svitu moj to van je davno bilo...sad to spravjan unucima evo van ovod novi litrati i riceta pa malo guštajte...

Ka prvo odvojin žumanjke od bilanjaka...bilanjke dobro istučen a žumanjke zajedno sa cukro izmišan da bude gusta kreme i temu dodan malo prošeka...

Mliko meknen da zakuva skinen sa vatre i za žlicon stavjan bilanjak u mliko onda to mliko sa žlicon prilijen po bilanjku...u male pijadele oli u jednu veču pijadelu poredan piškote pa i malo poškropin sa prošekom...ono malo bilanjka ča je ostalo plivat u teči o mlika promišan i u sve to dodan kremu od žumanjka...sve se jopet dobro promiša...

Onda meknen bilanjak poviše piškota i priko svega pomalo prilijen ono ukuvano mliko sa žumanjkom...niko voli priko svega gratat čikolatu a niko pospe gratane mendule a niko jide ovako brez išta...

Čak je i kod nas u Dalmaciji zaladilo, evo dok ovo pišen vanka je bura a temperatura je taman tamo nidi ispod pet gradi...ajme kad če promaliće da se malo ugrijemo ali nima veze da bi čovik ove dane proša s'gušton potribno je par kila kupusa, pancete i kobasica...evo van jedan lipa riceta...za nas šest iz ekipe san izriza tri lipa mala kupusa mrižara...onda još i tri veča kunpira na sitne kockice...lipi bokun pancete...i jedno desetak kobasica, vazeja san i kod Pivca iz Vrgorca...pa jedna veča kapula...tri režnjiča češnjaka...dec maslineva uja...kvarat litre slakega vrhnja za kuvanje...tri žlice konšerve...četiri lista lovora, grančica ružmarina, mažurana i kaduje...šaka selana na grezo...kupus operen i iskrižan na male bokuniče, dodan kunpire i dalmatinske trave pa navisin da sa malo vode počme kuvat...pancetu iskrižen na fete...kobasice na lipe bokune...kapulu i česnjak na sitno...pancetu i kobasice frigan na maslinovu uju i dodan kupusu...u uje dodan kapulu nek malo požuti, dodan češnjak, selen, sol i papar...na kraju dodan konšervu i sve promišan...dodan dec vode promišan onda i sve gre zajedno sa kupuson sve san promiša i ostavija da počme kuvat in umido...prvo vaja vidit da je kunpir mek, ako je mek dodan slako vrhnje i brez poklopca ostavin na laganoj vatri da se lipo zgusne, sve redovito promišan...nakon sat vrimena laganega kuvuckanja je sve gotovo i onda gremo guštat...zanja kontrola soli i papra...dodan malo salate i vina i to van je to...jesen prolazi gušti ostaju...

dogovor je pa, jist čemo srnetinu, Ona je skuvala crveni kupus i čimulice a ja san se uvatija srnetine...prvo san napravija pac...moj pac van je ovaki...tri lipe grančice ružmarina, pet - šest listova lovora, četiri režnjiča češnjaka, tri žlice maslineva uja, dvi žlice balsamico kvasine, osan žlica vinske kvasine i desetak kapi naše Nektar Kvasine malo papra i dvi grančice selena u listu to san sve ujutro promiša i ostavija da mi bude pri ruci tako da mogu svaki po ure da promišan...

vazmen tavu i ulijen maslineva uja i iskrižanu pancetu na sitno, kad se panceta raskrabila mečen linia direta srnetinu iz paca...ne puno, jerbo more počet pinit...okrenen na drugu bandu i tako dok sve ne potrošin...svaki put novo uje...u ono zanje uje o'friganja san ubacija četiri križane kapule, pet šest režnjić češnjaka svemu san doda onu iskrižanu pancetu i sve malo zažutija...pomišan sa meson...ostavin sa strane na laganu vatru...

desetak gljiva šanpinjona iskrižan na sitno i dodan u tavu o'friganja kad su frigane stavin u gljive dvi žlice konšerve i dvi žlice brašna stalno mišajuči...zalijen sa slijedečin...

crvenu koru od kapule, listove lovora i ružmarin iz paca, po deca soka od višanja, ono malo paca i dva deca crnega vina sve navisin da kuva...sol i papar...i dodan šaku dalmatinski trava...

e to onda prociđeno prilijen po konšervi i brašnu stalno mišajuči...sve to onda prilijen priko mesa i dobro izmišan...

sve se mekne u visoki lonac i poklopjeno navisi na jaku vatru, nek dobro prokuva...

dodan suve šljive i ostavin na laganoj vatri da se lagano šufigaje...vaja vodit računa da sestvori gustoča ako je riđe onda brez poklopca...uz srnetinu san doda škojke o'manistre...

kontroliran jeli triba malo cukra oli bičerin prošeka...nakon jedno dvi i po do tri ure kuvuckanja in umido je srnetina gotova...pili smo mlada vino od ove godine koje san taman pritočija...a vino van je kupaža od osandeset posto merlota i dvadest posto vranca...lipo nan je leglo...

U đardinu se na veliko lavuraje, pripreman zemju za sadnju verdure...ma ostala su mi tri lipa kupusiča koje san ostavija za poist na zanji dan zime...a svaki put ka gren u Split odnesen materi dvi tri glavice kupusa...onda je nakon par dan zoven...majko kakvi ti je bija kupus...i svaki put mi reče; sine moj ma bija je savršen, kupus ti je ka špinjača, ajme ča san guštala...i tako ona cilu zimu...a mater mi voli popit i tanku bevandu a to van je prst vina i četiri prsta vode...tek toliko da ga čuti...a osandeset i sedma je tu, ma nek ona gušta i svakome ko jon dođe u vižitu kaže ovo vino mi pravi sin...a meni krivo, malo se zacrvenin ali me brzo prođe...kad bude ovo čitat moja sestra puknit če o'smija...a riceta van je ovaka...kupus se opere i rukama ga iskidan na komadiče...pripremin jedno pet šest kunpira na male bokuniče...jedan veča kapula na grezo...dva režnjiča o'češnjaka na sitno...šaku selena na grezo...našlo se suvega mesa i pancete sve iskrižan na bokuniče...u tavu meknen fete pancete kad je pustila mast onda dodan meso...nek sve dobije lipu boju...dodan kunpire, selen, kapulu i češnjak i promišan...nek se sve lipo isfriga...dodan maslineva uja...kupus onako mokar meknen u jednu teču...kupusu dodan dvi žlice konšerve...dva deca ipo govečega temeljca...kad je kupus počeja da se smanjuje svemu dodan ono ča san isfriga onda dobro promišan i ostavin da lagano kuva in umido jedno uru ipo...eto ga to bi bilo to...malo kruva vina i eto van zanjega zimskega gušta...

Danas je sve u stilu slova V eto od malo veprovine sa par suvi šljiva i šakon brusnica san napravija lipi tingul in umido, sve je aromatizirano sa vinon, kvasinon, česnjakon, kapulon, selenom, karoton, lovorom, ružmarinon i kadujon...mladi kunpiri u kori su kuvani i priko svega je meknuta murtela i dva tri nasickana češnjaka...rukola je divja ubrana iza kuće ispod jedne masline a ove smežurane masline su iz salamure od lani...tikvice san nakon grilade namaza sa mojin varenikon a ti varenik mi je gastronomska senzacija...definitivno ču ga ove godine napravit još više...i to u dvi varijante tekuči i gusti, ovega gustoga malo duje ikuvajen...evo van litrati pa pogledajte, bilo je, ma moran sam sebe pofalit,...fenomenalno...

svitu moj ovo van je najlipje vrime u godini...zvizdan je popustija ali je još teplo a dani su se skratili...grozje je sazrilo i vrime je o jematve...a počele su i lignje...nezna čovik di bi prije...ali prvo vaja sredit vino...ja van pravin Planac to van je coupage od merlota i vranca...jema več puno godin da grozje kupujen kod vinogradara Pere iz malega mista iza Biokova Otrić - Seoci u Pojezerju...ka je grozje došlo u konobu jemalo je 19 gradi cukra...petejke su odma odvojene i nakon nikoga vrimena je počelo kuvanje...evo moran drop ladit bocam sa ledon...jema malo fibre...pa triba kalat fibru...još par dan pa ču ga pritočit da bi onda nastavija lagano vrit...svake godine je mala nervoza kako če vino bit, boje nego lani oli če pinkicu podbacit...mi još pijemo berbu 2007 a 2008 če na red doč poza Nove godine i tako smo uvatili ti ritam da nan uvik jedna godina odleže...a pripremen i lipu etiketu, evo je prošla sve komentare u familiji i na promaliče čemo je počet duperavat i obečajen da ču je meknit ovod...kažu da je u vinu istina...bar da jema čagod u ča čovik more virovat...

svake godine ista pisma, za božične blagdane se jide i pije više nego obično ma nek je tako, taka je tradicija iako mi je sve to pomalo suvišno...samo kad se sitin kako je u svitu koliko je gladne dice i nemočni onda mi dođe da poiden sengvič i popijen čašu vode...ali eto veliku politiku kreiraju karijeristi a obični puk je ti koji kupi mrvice i onda se na ovi dan malo išvoga ko dače doč kraj svita...na kraju, evo van ča smo mi danas jili...

ovo je matovilac sa kruškama mariniranin u limunu a priko tega nagratanega parmezana i isfrigani pinjola a dresing je bija malo senfa, meda, kvasine, maslineva uja, soli papra...to nan je bilo predjelo...

dinstana srnetina sa lovorom, smričkom, timijanom i crnin vinon...a uz to pečeni jelen sa šugom od divjega šipka i vrhnja...dinstani crveni kupus, prokulice i kunpir sa fetama tikve koji je gratiniran...to nan je bilo glavno jelo...

austrijsko vino carpe diem od kuče moser je bija izvrstan izbor moje čere...stvarno smo ga o gušta popili...

a ova torta od kvarka je bija finale...od lipi malina sa pistacijima šlagom i piškotima koje je moja čer ispekla...mmmm...unuci su guštali...

Triba mi po kila pileči prsa koje san izriza na tanke skalopine...na svaki skalopin san meka plastičnu foliju i sa dlanan malo potuka...za punjenje skalopina mi triba janječe mliveno meso, sol papar i meki sir...to sve zajedno sa dalmatinskin začinskin travama i češnjakom dobro promišan i stavjan na svaki skalopin...sve san dobro smota u alu foliju...i meka na jednu pijadelu...to sve gre u ugrijanu pečnicu na 200 gradi...vazeja san dva velika kunpira skinija san in koru pa san i nabocka perunon na izrizanu bandu...soli papra i maslinova uja po kumpirima...i to sve u pečnicu zajedno sa roladama...za verduru čemo jist mlade mahune od biži...i frigane fetice selenova korjena...za salatu san pripremija kukumare, pome, zeleni selen na komadiče, orije i doda san malo mangoa...eto to je bilo sve ostalo se vidi na litratima...a i za vino smo dogovorili...

Sa ovin postom započiman novu kategoriju Maslinik na škoju...lani nakon onega velega požara u kojeme je jugozapadna bande škoja Čiovo izgorila mi smo izgubili dil našega raja na zemji...ma doli nan je bilo tako lipo a tu smo započeli sređivat mali arboretum...svega san posadija...ajmo redon uz more u škrape su bili kapari, kaktusi i agave a na parceli uz more je bilo jedno pet šest bori za ladovinu...pa onda prima gori masline oblice i mastrinke...a svudi okolo kaktusi, ružmarin, lavanda, mirta, perunika, agava, puzavac ma neču više nabrajat morat ču pustit suzu...sve je nestalo pocrnilo, gotovo je...jedan se papan igra sa žigicama i taman kad je jednu večer bura punila on je upalija šumu kraj ceste a vitar je učinija ostalo...odlučija san sve prikrčit porizat masline do dna, porizat sve bore i grmje i od te parcele napravit maslinik na škoju...a tako smo lipo guštali se spustit doli...ma koji mir...jedina buka su galebi, cvrčci i more ča tuče u škrape...pogled je nezaboravan isprid nas su škoji a liti brod do broda ča od bogatuna ča od domačega svita...ribari su se vezivali isprid nas za kraj i onda bi potizali mrižu...eto to je bija naš mali raj na zemji...ali sad je gotovo sa arboretuom...ma odlučili smo se, vratit čemo masline tamo di su i prije bile a u albumima na Picasi če ostat uspomene kako nan je lipo bilo...na kraju je ipak malo optimizma ma jopet če bit mali raj ali malo drugovačiji, biće malo sređeniji...vidit čemo...evo van još malo litrati kako nan je lipo bilo...

U ovo vrime kad je ladno i mokro volin poist čagod kripnijega...evo van ovod hachee, to van je tradicijonalni zimski obrok iz niskozemske...meso je junetina od lipe pupe, triba jedno kil mesa...a kapule na rezence, vaja računat na dvi kapule sridnje veličine po glavi, tri režnjiča češnjaka, šest klinčiča, dva lista lovora, maslinovo uje i maslac, dva deca crnega vina, dec vode, tri žlice vinske kvasine, sol papar, glatko brašno...pire krumpir...pasirane kuvane jebuke sa malo cimeta...meso iskrižan na male bokuniče ka za gulaš i uvajan u brašno onda ga isfrigan na maslinevu uju i maslu...mora bit dobro isfrigan sa svi strana i meknen ga sa strane...dodan još maslineva uja i žlicu masla i onda dodan kapulu, kapule triba bit stvarno obilato...kapulu dobro zažutin stalo je mišajuči...kad je kapula uvatila boju meknen je na jednu pijadelu...u ostatak masnoče dodajen lovor, češnjak, klinčiče, sol, papar...zalijen vinon i promišan onda vratin meso, sve daje promišan pa dodan kvasinu opet mišan...zalijen vodon i ostavin na laganoj vatri da se lagano štufaje jedno dvi ure i to sve nek bude pokriveno...nikoliko puta tresen sa tečen...nakon dvi ure štufavanje dodan onu kapulu sa pijadele i sve dobro promišan i ostavin zajedno štufavat još jednu uru...na kraju kuvanja vaja kontrolirat sol i papar i to van je sve...ovo se jide sa pire kunpirom i pasiranon jabukon...a ono vina ča je ostalo smo bome popili...za dezert smo jili puding od griza sa šumskim vočem...a ovod van je website o otelskome smještaju u Splitu i okolici...

Za ovo mi triba jedan veliki wok, maslinovo uje, pršut na sitno, šaka orija, četiri suve pome, paprika iz tegle malo na kiselo, paksoi to bi bilo ka naša blitva smo ča jema malo debje korjenje, angriz i to dugega zrna iz tajlanda, selen na grezo, dva režnjiča češnjaka...onda ovako pršut raskrabin na uju i nek malo bude isfrigan, dodan skuvani angriz i onda selen, ćešnjak, papriku, pome, dobro mišan, dodan orije, angriz san skuva a'dente a paksoi san pet minuti na pari spravija isto tako a'dente, sve dobro mišan, dodan jednu žlicu badjaka i sve promišan...i to je sve pili smo ovo Španjolsko vino i mogu van reč da je pala cila botija...za dezert san napravija Niskozemski specijalitet Haagse Bluf ...evo van riceta...100  grama cukra u prahu, dva bilanjka i 20 cl soka od ribizla navedeno se mekne u čistu zdilu i desetak minuti nek se miša kad ne stvrdne da se zdila more okrenit naopako a da Bluf ne ispane...onda je gotovo...servirat sa tzv. dugin prstima, kolačići malo zacukreni...eto...

Ustvari mi je največi gušt kad mi se čagod jide poč u kužinu i otvorit frigo...i onda od onega ča je unutra napravit lunch...evo ovod jema intergralnega kruva i tri vrste sira...friški ovčji, mladi kozji i francuski brie...ovi brie je posebni gušt on vonja na smrdjive bičve eto tako bi ga opisa...to je ludilo od sira pogotovo kad ga se po ure prije klope izvadi vanka...ove sjemenke od tikvice san malo popržija zajedno sa ovon tankon panceton...priko tega san doda friškega vlasca i to je to...malo vina talijanca iz Abruzza priko puta Dalmacije je bilo taman...

ka koje vidija danas kuvat obid...evo malo izležavanja, odmora i čitanja libra...a zalogaji su nan taman, samo se dvoumimo koje čemo vino popit...ma nek Ona odluči...