Dalmacija moja inspiracija - dalmatinska kamena kuća # stenen huis

restauriranje dalmatinske kamene kućice...

studiokonoba@yahoo.com (dalmacija moja inspiracija) — Thu, 19 Jan 2012 22:49:00 +0100

Vrime je da se jopet uvatin ove lavure, ma znate, ako ste moj blog pratili kako mi je bilo, prvo mi je na lito 2010e pukla ahilova tetiva onda operacija i rahabilitacija pa san dugo vrimena cota a i puno san lani đirava po svitu ali sad je sve u redu i ovi projekt triban završit jerbo godine gredu.

Nabavija san pravu makinju, bušilicu na čekić, kojon mogu skidat stari inkarat, sad je puno laške lavurat nego sa macon i puntarolon. U dva dana san više učinija vengo pri u cilu šetimanu. Baš san danas malo gleda, grubega posla je još jedno misec dana a nakon tega moran počet širit fuge kroz koje če proć letrika, tako ka se bude sve fugiralo neće se ništa više vidit di je letrika prošla. Eno na litratu di je ono jaje od goluba san već napravija konal za glavni vod letrike.

Skidajuči inkarat naletija san na lipe buže u jednoj je bilo jaje od goluba a onu drugu moran još do kraja otvorit već se po sredini vidi malo svitla. Vanka sa bande o'kale ču meknit mrižicu tako da ne ulazidu beštije a da jema ventilacija. A ugodno san bija iznenađen ka san otkrija još dvi sakrivene ponistre oli ti vele buže u zidu. Sve su u dnevnoj sobi jedna pari ponistra sa caklima, druga je malo manja i još su dvi malo manje, ma ludilo. U te ponistre ču sprovest letriku tako da če bit lipo i intimno. Ka san skinija inkarat i vidija konture ove skrivene ponistre došlo mi je na pamet a možda je čagod iza tega zida niko blago, dukati, ali ništa samo su miši uspili napravit gnjizdo ko zna možda su poili forinte, dinare oli lire. Aaaa, teško bi tega bilo u ovoj kućici ovod su živili težaci i bila je pusta mižerija a bivši vlasnik navrati koji put puno mu je drago da ču sve ostavit autentično i da če ostat stari drveni tavani i meknit se nove drvene skale.

U zanje vrime san puno gugla da vidin kako se to u svitu radi i onda san odlučija ostavit ča više originalni stvari ma ništa od plastike oli aluminija. Daske o'tavana san odlučija skinit i odnit doma i dobro isprat pod veliki pritiskon pa i onda sa karton deveron izbrusit i natočit sa tekučinon protiv crva i gamadi. Pošto su daske izlizane dobile su na karakteru a to je ono ča bi tija.

Plan san malo prominija u prizemje če bit kužina i blagovaona za užinavanje a ispod skala mala sprema. Na prvi kat je planiran dnevni boravak a na šufitu je spavanje i ocakljeno kupatilo. A za ocakljeno kupatilo tražin po butigama pogodno caklo, ma jeman nike ideje moran vidit očeli to moč stat jerbo je gori sve malo basetnije a tuš i wc če bit konpletno u caklu i sve če se vidit, je da je malo kinky ali nima veze ionako ovo neče bit kuća za obitavanje vengo za turizam. A za tako ništo osobito se uvik nađe dovojno svita.

Eto,...

zimski gušti...evo me jopet u kamenoj kućici...

studiokonoba@yahoo.com (dalmacija moja inspiracija) — Tue, 25 Jan 2011 21:23:00 +0100

Izgubija san po godine na voj lavuri...prošlo lito mi je pukla ahilova tetiva i nakon operacije pa mirovanja san počeja sa rehabilitacijo...treniranje mišiča onda jačanje potkojenice eto par miseci san cota a još uvik nije sve kako triba...nima snage u desnoj potkojenici ali več sad se pentran po brdima jačan mišiče i sve gre na boje...svitu moj godine činidu svoje nisa ni ja više mlad ali eto nima više čekanja gremo u restauriranje...

nastavija san tamo di san prošlo lito sta...macu u jednu ruka a puntarol u drugu i onda lagano skidat stari inkarat...uostaleme nima priše nije mi o'glavu...evon van vod nikoliko litrati...počeja san tuč inkarat na šufitu tamo di je puno gareži o pustega kuvanja...malo puntarol, malo bruškin o'čelika i evo prvi rezultata...

gratanje greda...

studiokonoba@yahoo.com (dalmacija moja inspiracija) — Wed, 24 Mar 2010 00:01:00 +0100

Svako malo minjan lavuru...ne mogu samo tuč sa macon vaja se i odmorit...zato san uvatija željezni bruškin i počeja skidat garež...parija san dimnjačar...ali zadovojan san, ovo je tek početak, nakon bruškina dolazi nared karta devera i nakon postavjanja izolacije između greda prvo triba grede dobro ispinelat protiv crva i gamadi i onda dat završni transparentni lak...malo san se zaletija još nije vrime za to...i nakraju evo van litrat prima stadionu Poljud a na drugu bandu se vidi Kozjak...eto to bi bilo sve, a je san se naprašija...

evo san otvorija fuge...

studiokonoba@yahoo.com (dalmacija moja inspiracija) — Mon, 22 Feb 2010 00:02:00 +0100

Lavura dobro gre dikod je stari inkarat tvrd a dikod mek ovisno koliko je vlage u njemu...koji put se uvatin čagod laganijega ka ča je sa kacavidon skidat staru fugu...ona je bila od japna tako da je lako ostrugat...moran malo odmorit ruku od mace i puntarola a usput bi tija i vidit kako če fuga figurat...ovi zanji litrat je napravjen sa šufita vidi se bokunić mora...a ka se nagnen na ponistru i pogledan desno onda vidin Poljud i Merjan...inače san gleda po Trogiru i Kaštilima kako se fugira i koji materijali se dupereju...uskoro gren kod konzervatora koji če mi dat potvrdu da se ta i ta fuga mora duperat a onda sa tin vaja poč kod komunalnega redara da bi se mogla dobit dozvola za meknit skelu za vanjsko fugiranje...vaja platit u općinu nike šolde i to je to...ali pomalo još nije vrime za to...i još ništo, čeka me poć i kod kustosa od muzeje da se malo pročakula i da se upoznan sa povjesti ove kuće jerbo če mi tribat povjesni materijal kad buden pravija website a ona če se otvarat ovako www.villadalmatia.com dok ova mini villa ne bude gotova morate se zadovojit sa ponudom otelskoga smještajem u Splitu i okolici...

kamena kućica...metla i škovacera...

studiokonoba@yahoo.com (dalmacija moja inspiracija) — Fri, 12 Feb 2010 00:01:00 +0100

Posal dobro napreduje...vazeja san metlu i škovaceru pa malo sredija tavane...skupilo se tega materijala...ma šuta je ka u prići...evo je i drugi zid doša na red a ova buža u zidu če mi dobro doč u nju se more meknit čakod dekorativnega možda stari šumpreš oli koja starovinska vrčina a triban nabavit i jedan grezi pločasti bovan koji če taman stat u ovu bužu a ostavit ču sprida i malo korniža nek bude lipo za oko...malo san inspektira ove daske o'tavana ma nji bi najrađe sačuva...za sad san optimističan nidi nima crva ali inspekcija još nije gotova...ova vrata ču popravit štukat i piturat i ona če nan bit za u banj...evo san naša i ovu tavu za pečenje sirove kave...ma to van današnja mularija nima pojma kako su naše matere sa ovin "strojen" pržile kavu i stalno bi poviše vatre vrtile na onu crvenu ručku...a kava je bila sive boje i moga si je u butigu kupit i to refužo bila je jeftinija od pržene...ajme kako bi kuća lipo vonjala...a i stari ruzinavi mlinac za kavu je bija u jedneme kantunu na šufitu...evo van i jedan litrat Kaštil Sućurca a vanka vrime eto nikakvo ali i temu če doč kraj...

kamena kućica...evo i malo tlocrta...

studiokonoba@yahoo.com (dalmacija moja inspiracija) — Sat, 30 Jan 2010 22:26:00 +0100

evo san ovod meka gabarite kućice...ka ča morete vidit prizemje jema široka vrata koja su ka o'konobe...sa vanjske bande ču meknit starovinska Dalmatinska puna vrata koja če se otvarat prima vanka...a unutra če doč caklena dvokrilna vrata pod kjuč, stin ča če jedna banda bit na kip...caklo če bit tamno tako da se more gledat vanka a da niko ništa ne more vidit unutra...a navečer če se pogled zatvorit koltrinama...u prizemju če cili zanji zid bit banj...livo u zanjeme kantunu tuškada onda bide pa kondut i onda lavandin i na desnome zidu od kućice prikladni ormarići...na desnu bandu zida od banja ispod skala ču ugradit klizna vrata da se ne izgubi korisni prostor...vrata več jeman naša san in na šufitu u jednome kantunu samo i vaja malo popravit štukat i piturat to su starovinska panelna vrata a u ovoj kućici su se duperala za zatvaranje šufita...ajmo onda daje, livo od ulaza če bit otvorena kužina tamo je i jedna mala ponistra ona če izvanka ostat isti gabarita ali ču zato unutra napravit jedan prag znači izvadit ču par vacada sve lipo poravnat meknit jedan šesni ravni bovan lipo fugirat i stvorit misto za mlinac o'papra, bocu uja, pletenicu bilega luka i slično...a ispod skal če bit misto za dvi rasklopne bičiklete za đirade kroz Kaštila i prostor za dvi katrige koje če se duperat vanka u kali...ispod skal če bit i jedna škancija sa tri daske a sa licen prima kužini di če se ostavjat pijati, teče i ostalo ča triba za kuvanje, ovod neče bit nikakvi viseči ormari...umisto viseči ormara meknit ču na kameni zid jedan poklon od moje setre...ma to van je po starovinski na jedneme "lancunu" napisano..."kuvarice kuvaj ručak fino pa češ dobit novaca za kino" oli tako ništo...to mi je mater kad san bija mali napisala i onda iglon i koncen vezla...ako ko od vas doma jema još tako ništo i tija bi se zaminit za par boca mojega vina nek se javi...eto to bi bilo za sad...

kamena kućica...maca i puntarol...

studiokonoba@yahoo.com (dalmacija moja inspiracija) — Thu, 28 Jan 2010 00:01:00 +0100

evo san vazeja macu i puntarol pa san počeja skidat stari inkarat...ča piture ča inkarta mogu van reč da jema jedno deset redi i svaki je u niku drugu koluru...tako se to prije radilo...sad kad san sve ovo oko ponistre istuka pokazala se sva lipota pučkega graditejstva...lipe vacade na zidu a tek ove poslagane na nož same od sebe držidu nasvođe ponistre a to je tipični bačvasti svod...još kad se sve ovo očisti i isfugira biče lipota kojon nima kraja...danas san kontrolira drvenariju ove ponistre, drvo o'ponistre, je daje staro ali sa malo štuka i piture mogu napravit čudo...jedino če tribat odnit ponistre u caklariju da meštar promini cakla...na ovin pragovima od ponistre je bija zaliven cimenat i to jedno dva prsta to san puntarolon pažjivo skinija i evo ti ga na pojavija se lipi domači kamen...s'kamena ču oprat i ostrugat ostatke cimenta a ove buže ču kasnije sve isfugirat...a i dobija san ovu ideju od jednega amika, kamene zidove, fuge i ove pragove od ponistre triba namazat tekučin voskom...kad se vosak osuši on postaje mat transparantan ma ništa se ne vidi da je namazan i onda je sve to lako za održavanje samo se more proč sa mokron krpon oli spužvom i nima više šporkice...eto, svaka skula se mora proč pa tako i ova...a ovod su kuće za de lux odmor nije ovako u sitno ka kod nas več je za cile familije...a ovod van je otelski smještaj u Splitu i okolici...

kamena kućica...evo još ništo...

studiokonoba@yahoo.com (dalmacija moja inspiracija) — Mon, 25 Jan 2010 00:01:00 +0100

evo još malo detaja, naprimjer ova katriga, ma ona van je originalna thonet iz Beča nju san naša u kantunu tek san je sad vidija kad san bacija sve škovace, thonet katrigu vaja lipo očistit i biče ka pupica i onda jon dodat mali jastuk na sidalo i to je to...a i ovi nostalgični radio ču meknit u koji kantun onako za dekoraciju...u ovoj lažnoj ponistri je jedno zrcalo i stolna lampa...doma jeman za lampu jedno lipo sjenilo pa ako bude pasalo onda če i ona nač svoje misto...a zrcalo ka zrcalo jema dovojno mista na zidovima...bija san sritan ka malo dite kad san u kamenoj kućici naša ove prekidače i utičnice od bakelita...ovo če bit vrhunac opremanja...naime, ovod u kamenoj kućici neče ništa bit modernega...eto i to je to wouwww biče taman kako san zamislija...a za pravi odmor povirite ovod...

kamena kućica...škovace i ostalo...

studiokonoba@yahoo.com (dalmacija moja inspiracija) — Fri, 22 Jan 2010 00:01:00 +0100

Počeja san vanka nosit škovace ma neču ulazit u detaje škovace su
škovace...ovi špaker je bija za kuvanje i grijanje brez njega nije bilo
života...sve me tanta daga meknen doma u mali staklenik ča ga upravo pravin tako da dobije dostojno misto za prežencu...u ovu tikvicu se čuvalo sime...a ovi stari stol ču lipo sredit vaja ga malo proć karton
deveron piturat ga
možda zavidan dikod koju vidu da se ne klima i eto ga ka novi pardon ka
pravi...a doma jemen dvi starovinske katrige a nače se i crveno bila
tavajola na kocke i sve ču to kad bude gotovo postavit vanka u kalu
kraj kuće za litnje lipe duge teple većeri...a kraj stola u kantunu kale dva tri pitara
sa
ružmarinom, lavandon i šparogom ma ugođaj samo taki...a ova kredenca i
thonet katriga se taman uklapaju u ova davna vrimena kojima kamena kuća
odiše...ovu sliku od gospe vaja lipo očistit i primazat jon
okvir...ajde naču jon misto na zidu...i tako malo pomalo nosin sve
škovace vanka šporak san ka prasac...a sa svakin novin danon dobivan
nove ideje...počeja san sve to zapisivat...na kraju se moran odlučit kako ču daje...eto...a za luxuzni odmor mirita pogledat ovod...

ajmo malo unutra...kamena kućica...

studiokonoba@yahoo.com (dalmacija moja inspiracija) — Wed, 20 Jan 2010 00:16:40 +0100

Evo van par litrati kako je unutra...srce me zaboli kad pomislin kako je život bija težek u ona vrimena...rano ujutro se išlo u poje do kasno navečer...nije judima bilo lako i opet su se makli, sagradili ništo bojega oli su dobili stan od poduzeča...dica su se školovala i stasale su nove generacije...sad smo i mi došli nared...kući čemo vratit dušu i život...znan da če niko reć ma ča ovod blebetaješ oli ti to nije za biznis...je kuća je za biznis ali isto tako i veliko poštovanje prima trudima ti judi i prima našoj Dalmatinskoj pučkoj gradnji...zato čemo je pokušat dovest u red da mirita i da bude za dobrobit novin generacijama...a za luksuzni odmor pojte ovod...