Dalmacija moja inspiracija - zimski vrtal # tuinkas

zimski vrtal...malo san ga drica...

studiokonoba@yahoo.com (dalmacija moja inspiracija) — Tue, 15 Nov 2011 00:01:00 +0100

Sa ka san sredija vrtal i posadija kapulu, češnjak i posija blitvu doša je red i na zimski vrtal...sve đirane san tamo meka da prizimu eno i u pitarima a jeman još uvik i murtele ona če prizimit tako da če platit šaša o'poma...bere se matovilac i selen a u kantunu je i cablo o'banane...eto sad malo pomalo vaja zimski vrtal napunit biće to lipa zanimancija ove zime...

počelo je...

studiokonoba@yahoo.com (dalmacija moja inspiracija) — Tue, 12 Apr 2011 00:01:00 +0200

Evo je došlo vrime da se prisadnice tikvica i pomidori iznesu iz zimskega vrtla vanka provat ču sezonu proširit ,ovo je rano a biče i kasni poma...ovo mi je prvi put da ovako verduru pripreman, dosad san uvik kupova kod sejaka ...ali mogu van reć sad su ovo još veči gušti...prič cili put od simena do ploda to je ono ča bi tija...vidit čemo kako če ispast...ostala verdura triba malo ojačat prije nego je iznesen vanka...a ove tikvice san dobija od jednega prijateja iz NL on mi kaže da su tikvice okrugle i ludilo o'spize...dakako ekološkoga su porjekla...one grane o'palmi na krovu zimskega vrtla su pravi pogodak...nima doli više kuvanja ma sad je lipo teplo, tako da neće bit brzega isparavanja...ispod oni poma san zakopa jednu cijev ona čini zig zag i koja se ajmo reć znoji...montira san je na špinu i onda kad špinu lagano otvorin zemja okolo nje je jedno 15 cm mokra...idealno...

ajme ča je lipo...zimski vrtal...

studiokonoba@yahoo.com (dalmacija moja inspiracija) — Sun, 03 Apr 2011 00:01:00 +0200

Ma uvatija san se malo pituravanja u zimskeme vrtlu...pomalo sve dolazi na svoje misto...ove san stoliče i tanburin opitura...to mi je uspomena iz naše kamene kuće...ma volin van je starovinske stvari koje jemaju patinu i pričaju svoje štorije...a moran van se pofalit sve mi je u zimskeme vrtlu lipo niklo i sad lagano reste...danas san gori na plastični krov meka suve grane o'palme da napravidu lad, nek mi se malo kala fibra u zimskeme vrtlu...a sa je svitu moj fibra taman kako triba, pogotovo kad danju otvorin vrata...na zanjem litratu je malo cablo o'banane, ma ove zime u prosincu mi je smrzlo, bilo je vanka u đardinu, ali ka san ga meka u zimski vrtal lipo se rekuperalo i evo baca lipe listove...morat ču ga zimi ostavjat unutra, ma ko više more virovat ovemu vrimenu...još me čeka napravit škancije, pa donit jedan špaker iz stare kamene kuće, onda sprovest letriku sa lampijunima i to svudi okolo tako da se more napravit lipi ugođaj i da mogu na večer onod obitavat...meka san i malo izolacije, ma ostalo mi je stiropora nakon ča smo našu kuču izolirali, a doli na kraju pri tlevu ispod oni sedan cakleni vrata san to meka, tako da neče više puvat...a toka me još s vanjske bande meknit silikona između nosača vrata tako da nan neče više ništa puvat...ma pomalo, vrag odnija i prišu, prvo vaja čagod poist i malo bumbit...neče lavura uteč...

zimski gušti...u zimskeme vrtlu...

studiokonoba@yahoo.com (dalmacija moja inspiracija) — Wed, 02 Mar 2011 22:41:00 +0100

Evo smo se skoro uvatili lavure, kuću čemo izolirat sa deset centi stiropora, ma u vrime kad se kuća gradila nije ni bilo materijala za izoliranje a pogotovo nisu troškovi grijanja bili tako veliki ka sad...nima veze...this is the moment...liti če bit ugodno a zimi nima ladnoče a u takujinu če ostat love...eto, kraj kuće prima litnjoj kužini san dugo godin jema jedna drvena vrata, onako robusno napravjena ka ča i mirita kad se živi na selu...odlučili smo umisto nji meknit samo jedno krilo sa škurama ka če je i na drugin vratima o'kuće...a od ti stari drveni vrat san napravija stol...iza kuće san sačuva nikoliko retaja o'drvene grede, od tega san napravija noge i ti stol san meka na sridu zimskega vrtla...biče ka mali otok tako da bi se prostor maximalno iskoristija...jeman još ništo drveni dasak pa ču napravit još nikoliko stoli tako da če nan zimski vrtal bit konpletan...još moran napravit i police pa sve piturat, ali to če još malo počekat, jeman ja ovod lavure ka u prići, particela sa 1500 metri nije mala, važ piture vamo, dikod se koja grana obriže tamo, onda rizanje pusti ružmarina i lavande... ajde neču daje jerbo čete mi reć da san se napuva, ustvari neš ti posla, ali glavno je da je zdravje ok a za ostalo čemo lako...

zimski gušti...malč okolo maslin...i priprema zemje...

studiokonoba@yahoo.com (dalmacija moja inspiracija) — Tue, 01 Feb 2011 00:01:00 +0100

Iza kuće jemamo jedan mali maslinik od desetak cabal masline oblice...lani smo ubrali prve kile a od ove godine bi tribalo bit malo obilatije...sad je vrime da se masline malo dricaju i obrižu...sve one grančice i lišče san nariza na male bokuniče...prvo san zemju okolo maslin pognjoija sa stajskin gnjojen...priko tega san posuja narickano lišče i granje ajmo reć jedno dvadesetak centi to van se zove malč a dodava san i sve ostalo organsko ča se nađe u vrtlu...onda san se uvatija perunavat zemju okolo maslin...naime lutajuči po internetu naletija san na litrate di se vidi kako u Grčkoj judi na svome imanju jemaju mali maslinik i ispod maslin su posadili tikvice i artičoke...računan kad Grci tako rade zašto nebi i ja prova...zemja je pripremjena dobro pognjojena a do par miseci ču je još jedan put perunat i pognjoit...ovo lito ču napravit novu reportažu pa ču onda vidit jemaju li Grci prav...ona kafena kašeta uza zid je naša komopstara...a iza je mali zimski vrtal, evo san u kompostari vas organski otpad pribacija na jednu bandu da se nastavi konpostirat a oslobodija san ti prostor za nove naslage...nek sad milijuni mali beštijica nastave radit svoj posal, kad bude gotovo sve če se vratit nazad u prirodu...i tako svake godine...eto...

zimski gušti...zimski vrtal...

studiokonoba@yahoo.com (dalmacija moja inspiracija) — Fri, 21 Jan 2011 00:01:00 +0100

ovo je prva zima u našem zimskeme vrtlu... na promaliče se moran uvatit lavure, zatvorit ču još par buža jerbo je bilo prilično ladno u vrtlu, ulazija je ladni zrak...dobro, ovi prvi mačiči se bacaju u vodu...dogodine znan kako ču daje...vaja dobro zatvorit i samo ostavit bužu za ventilaciju...večeras mi je Ona rekla da gren ubrat malo salate a pošto je rano pa mrak unutra san montira letriku tako da mogu i navečer da se zaletin ubrat čagod oli se malo pozabavit...evo prije par dan kad je ono bilo lipo popodnevno sunce unutra u zimskeme vrtlu je bilo jedno 30 gradi...ludilo, skineš jaketu i u maicu se rekreiraš...češnjak nan lipo raste a razni salata je ka u prići...ma koje reka da su penšjunatski dani dosadni...

zimski vrtal...skoro da je prva faza gotova...

studiokonoba@yahoo.com (dalmacija moja inspiracija) — Sat, 10 Apr 2010 00:01:00 +0200

Evo san meka valoviti plastični krov dok se oni prilazni putić još suši lipo san ga zalija betonon...ajme koji su to gušti kad je čovik unutra odma se osjeća da je ugodnija temperatura...sve je dobro pričvrščeno još vaja na krov na sve krajeve meknit murale na plastiku da i nebi bura oli jugo digli...sad kad je skoro sve zatvoreno napravit ču malu pauzu i onda me čeka pravjenje radni stolova i lagano šminkanje malo pituron malo dekorativnin elementima ma glavno je da je ova vela fatura gotova...a i zastave su meknute tako i mirita...

zimski vrtal...evo malo i pokretni slika...

studiokonoba@yahoo.com (dalmacija moja inspiracija) — Mon, 12 Apr 2010 00:04:00 +0200

zimski vrtal...pristupni putić...vrata, ponistre i kostur krova...

studiokonoba@yahoo.com (dalmacija moja inspiracija) — Mon, 05 Apr 2010 00:01:00 +0200

Poslovi dobro napreduju...razbijanje ovega zida di če doč vrata je bila vela fatura...prvo sa cirkularon potega mire i koliko god je moglo riza san sa cirkularon tvrdi beton...a ostatak san onda skinija sa dlitom i macon...ali sad je gotovo, ostali su mi žuji...za napravit ovi pristupni putić san prvo korisnu zemju iskopa, jedno 20 centi, zemju san raspodilija po vrtliću a onda poviše poreda bovane i škaju...to ču zalit betonon i biće kako triba...da bi se moglo u miru uć u zimski vrtal a ne da su postole svaki put u glibu...nosače za vrata i krov san montira na zid sa dugin na kraju rastvarajučin vidama tako da nema zime da če past natle...evo su i vrata i dvi mat ponistre postavjeni...za ona vitražna cakla nima mista njima ču nač misto unutra...murali za krov su dovojno čvrsti još malo pa če počet postavjanje krova...