Dalmacija moja inspiracija - Dalmatian Slow food life...The Taste of Dalmatia # gastronomy

njezina pizza...to vaja provat...

studiokonoba@yahoo.com (dalmacija moja inspiracija) — Fri, 10 Feb 2012 18:18:00 +0100

Vanka je snig i led, mi smo se namirili sa spizon i moremo lipo gledat kakvo je vanka vrime. Ona moja plavuša se uvatila misit tisto za pizzu. Pola čemo danas poist a ostalo gre u duboko. Oveme stolu u kužini je ploča od granita i ka stvorena je za spravjat tisto o'njoki, kolači oli pizza...ta ploča je idealna a i visina je malo nizja o normalnega stola tako da nima bolova u križima. A o'riceti nebi ništa pisa jerbo se ricete mogu pročitat po raznin forumima o'spize. Sam ču van špijat da je duperala moju konšervu o'prošlega lita ta konšerva je tvrda ali ka se razmuti sa maslinovin ujen onda je ludilo. Nam je bilo taman po guštu eto dok se jedna pizza jila druga se još pekla. Na stolu je bocun Merlota i uz spizu je bila servirana dobra čakula i šaka smija. Isto mi je pomalo počelo se penjat na niku stvar ovi led i snig, vrime je da nan bude južina pa da nan se sve ovo raskrabi.

janjeći but...uh,...

studiokonoba@yahoo.com (dalmacija moja inspiracija) — Tue, 07 Feb 2012 00:01:00 +0100

U ona dobra stara vrimena ka smo kompa i ja držali kultnu Konobu u Niskozemskoj bila nan je užanca jedan put misečno počastit se sa janjećin buton...ajde nije uvik bija but manje više je bila potkojenica o'janca a mogu van reć da je i slađa od buta...prije spravjanja but triba bit suv i onda ga u tavi sa svi strane dobro isfrigat da se stisne korica i da sokovi ostanu unutra...koji put triba malo polivat masnoču sa kacijolon, ja duperajen maslinovo uje sa jednon žlicon masla...ka je lipo zarumenija onda ga meknen u jednu škrovadu a nju u banju mariju nek bude obilati 5 litar vode...dodan glavicu češnjaka u kori, grančicu ružmarina i par listova lovora...nek se peče na jakoj vatri ajmo reć 220 gradi i vaja pripazit da ne zagori nek to traje jedno dvi ipo ure, zavisi koliki je but...oni gornji suvi dil koji put malo polivat sa masnočon i nakon sat i po pečenja pokrit sa alu folijon...finalmente ja duperajen termometar kojega zaboden u but a unutra triba bit priko 80 gradi a ka je omekša i dobija rumenu boju onda je gotov...ostavin pokriveno sa alu folijon u ugašenoj pečnici još jedno 20 minuta...višak masnoče odvojin i sačuvan tribat če za drugu spizu...u sokove o'buta ulijen malo, kučarin / dva, nektar kvasine i kontroliran sol i papar...a onu glavicu češnjaka koja se pekla e nju štrukan sa perunon i pomišan sa sokovima o'buta a korice bacin ča, uz to se more jist svašta evo mi smo jili mišane verdure iz pečnice i ove klobuke od gljiva...a ovi antikni aparat u ovoj plavoj škatuli se duperaju kod rizanja buta ovo van je mala morša u koju se zabode i zavida kost o'buta i onda se tranšira e to san vidija kod jednega amika kuvara, eto pa i vi guštajte u temu...i na kraju san se spustija doli ukonobu da izaberen jedno fino vino...bilo nan je taman po guštu...

lagani obid...

studiokonoba@yahoo.com (dalmacija moja inspiracija) — Mon, 09 Jan 2012 22:22:00 +0100

Malo pomalo smo počeli minjat i ovu Novu godinu puno svita če brzo zaboravit onu Staru ma triba gledat naprid...nova Vlada ne obečaje puno a to mi je dobar znak, sve zavisi kako se gleda, dok ja ovod pišen o lipoj spizi u nas jema puno svita kojemu je život težak da se razumimo nije meni grižnja savjesti ali bi ipak volija ka bi puku bilo boje a ne samo njima...

a mi smo lagano obidvali...Ona je okinila glave o'ribe i napravila juvu za lizat prste a prije nego je meknut angriz u kuvanu juvu smo mekli sirovu ribu jušto pet minuti i onda ostavili na teplu poklopjenu terinu...šaka napose kuvanega angriza se doda u juvu samo da se ogrije i onda moremo počet jist...kruv je Ona ispekla malo smo ga polili sa ujen češnjakom i nasickanin selenom a bilo vino je iz suda od sto litri sasvin desno doli u konobi, malo smo ga oladili da boje klizi...blitva je brez kunpiri samo sol, papar i maslinovo uje...

lipi obid u našoj kužini a kasnije čemo malo poć protegnit noge do brda nek se prvo ovo vino malo slegne...;-)

u vrtlu je svega pomalo...

studiokonoba@yahoo.com (dalmacija moja inspiracija) — Tue, 20 Dec 2011 21:07:00 +0100

Evo ulazimo u zimu bar je tako kalendarski, a i zaladilo je, okolo kuće je manje lavure, skupja san otpalo lišče i ka šušanj ga stavija ispod cabal da pokrije zemju i da se zemja malo smiri, ma nek se milijuni mali beštija zaštite od mraza i da na promaliče mogu jopet pomagat da se uspostavi bioraznolika ravnoteža u vrtlu...

ostavija san još ništo maslina na cablima da dobro sazriju i da se masline smežuraju a ka dođe vrime meknit ču ovod ricetu priprave...naranče su deboto zrile šipke smo već poili a ogušta smo i štrukavali, ma ludilo...

blitve i selena je napritek a češnjaka i kapule san puno posadija...prisadije san i artičoke sad i je u vrtlu priko dvadeset a ove male papričice su pikantne, ka sazriju nji osušin i u peštaduru smrvin...susid mi je da par prisadnica od pelina dobro če doć ka buden pravija gorke likere...

kumquat mi ja da amiko a moran i ja nabavit jedno cablo od njega se more pravit puno lipi riceta...mandarine čemo uskoro ubrat skuvat i pa napravit lipu kašu i to gre u duboko, u svaku vričicu po 250 grama to nan je mira za napravit lipi kolač...i na kraju cile lavure zaslužena kavica u zimskeme vrtlu...

još uvik se obidvaje vanka u litnjoj kužini...

studiokonoba@yahoo.com (dalmacija moja inspiracija) — Thu, 15 Dec 2011 00:01:00 +0100

Ove godine je vrime samo tako jesen ka da nije bila još malo pa počima i zima ali eto od zime nima još ništa, tratinčice su u vrtlu, ružmarin je u cvatu a i nešpula je ka i svake godine u cvatu.

Deboto svaki dan sa mojon jubavnicon obidvajen vanka a u litnjoj kužini je ugodna fibra, sunce tuče u glavu tako da se komodna sidi u kratkin rukavima.

Danas je Ona pravila njoke i ispekla but o'tuke u vrtlu jema mlade salate, friško da ne more bit friškije...vino je iz desnega suda godina je 2010ta lipi pitki Merlot...eto...prognoza je da če se vrime prominit onda tribamo još malo guštat...

bibite i ostalo...za lipe gušte...

studiokonoba@yahoo.com (dalmacija moja inspiracija) — Thu, 08 Dec 2011 17:47:00 +0100

Još malo pa je finila i ova ali prije nego je počmemo minjat triban napravit malo bibita i ostalega...pod ostalo je ono ča san več napravija na kraj lita a to su sušene pomidore na suncu, isto tako i balancane, pa onda pijane smokve i matar to sve je već u maškaduru...sa je red doša na masline u salamuri...a tek maginje, smričke i divje kruške...svo se to lagano točaje u lozovači i vata zanje sunce da pusti ono svoje tako pripoznatjivo za naše podnebje u Dalmaciji a te če nan bibite bit sičanje na lito i na lipe gastro gušte...još moran sredit mandarineto eno su kore o'mandarine na točavanju a tamo nidi krajen prvega ču ga napravit...eto, da se nikako izdržat uskoro su ovod nove radne pobjede...

jesenji gušti...biškoti o'medule i malo mandarineta...

studiokonoba@yahoo.com (dalmacija moja inspiracija) — Wed, 07 Dec 2011 00:01:00 +0100

Da bi se guštalo u životu ne triba nan puno tega, ugodna šetnja do mora, doživit lipi zalazak sunca i onda se vratit doma pa uz laganu mužiku kušat malo biškoti o'mendula sa mandarineton...Ona je ispekla biškote a ja san napravija mandarineto...biškot se lagano umoči u mandarineto i onda se onako mokro ji...ma ludilo svitu moj, eto nakon ovega sa izborima i nakon minjanja Vlade samo tribamo poželit da če puku život bit malo laški i da čemo se finalmente uvatit lavure i bit ravnopravan dil naprednega svita...eto malo san se odalečija od teme ma svitu moj ajte malo u prirodu oslobodite se pritiska i napunite baterije...

homemade maslinovo uje...noćnjak...

studiokonoba@yahoo.com (dalmacija moja inspiracija) — Wed, 30 Nov 2011 18:38:00 +0100

Zove me amiko i kaže, ma daj navrati gremo gori u brdo do sela naša san kod jednega čovika staru prešu za vino pa bi je donija doma i priuredija za prešanje maslina. Ne triba mi dva put reć i mi se vozimo prima gori pa sve ukrcamo u mali kamionet...a preša je teška jemala je kapacitet 450 kili grozja...

amiko je inače izumitej on svakega vraga zna napravit a drugi amiko je veliki meštar o metala tako da je u firmi napravija ova dva cilindra sa bužama... ispilali smo nikoliko murala na prikladne bokuniće to nan triba za pritiskanje...staru muljaču za grozje smo malo prigradili da se mogu mlit masline i to van je to...a ja san naša ništo rostvraj suđa, pripremija sita i filtere pa smo mogli počet...

prvo smo masline mlili kroz muljaču za grozje tu nan je bilo problema jerbo su crne se odma speštale ali zelene su ostale prikinute po pola...onda smo te zelene štrukavali sa bokun drveta dok se nije napravila lipa pašta...a ka to nije bilo po miri onda smo mlili još jedan put...paštu bi ostavili cilu noć da se malo masline oksidiraju...

drugi dan prvo se dobro miša pa sve gre u prešu i onda počima lagano pritiskanje...u prešu je najboja mira 60 kili mliveni maslina...nikakva vruča voda samo pritiskanje pa ča izađe nek izađe...dnevno se pritisne jedna preša i pripremi pašta od maslina za drugi dan...tako da amiko radi svoj posal oko kuće i onda po koji put malo pritisne manicu od preše i sila onda radi svoje...i još ništo, košpica je ostala cila tako da će ovo uje bit stvarno specijalno...

od deboto 60 kili maslina san iz cuga izvuka 3ipo litre uja...a 10 litri ociđene vode sa ujen i talogon san ostavija da se napose taloži i to ču ubrat nakon tega ciđenja...računan da če bit još jedna obilata litra...ovo je bila prva godina, dogodine znamo ča nas čeka, tribamo napravit nike pripravke a najvažnije je da se masline dobro sameju i promišaju...separacija če ostat ista ona je samo na prirodneme taloženju...je da je prinos manji ali zato nima troškova koje bi ujara na centrifugu tražila za prešanje tako da smo financijski čak i u dobitku...

a pulpu čemo sušit i od nje pravit brikete za kamin, za sve ovo triba pacijenca i vrime...najglavnije je da preša ladna da ladnije ne more bit i da se sve radi na ruke...umočija san prst u uje i počeja guštat...to van je svitu moj originalni noćnjak...nek se malo smiri i razbistri...ovo je likarija samo za vrhunske bokune spize...

stari dvor...kaštel stari ugodno misto o'guštanja...

studiokonoba@yahoo.com (dalmacija moja inspiracija) — Sun, 27 Nov 2011 20:33:00 +0100

Ma nebi ovod pisa u temu da je prije turizam bija boji i da je bilo više furešti to je tako bilo i vaja se okrenit budučnosti, ja bi se ošerva na današnje vrime, eto u Novome se vididu konture novega otele i to na oneme mistu di je bila vinarija, ma jeman špurju da če ovi otel bit motor zamašnjak koji če pokrenit i druge investicije...a i grad bi triba sve to pratit i pripoznat napore investitora pa napravit kaštelanska mista po miri našega čovika i po miri naši gostiju...mi dvoje smo se ove nedije malo prošetali kroz Kaštela, svitu moj ovake idile i ugođaje nima nidi na Jadranu a ovako dugi lungo mare jema samo Opatijska rivijera ali mi se ipak pari da je naš Kaštelanski lungo mare duži i pitomiji...ma nek su u Opatiji njezine vile mi jemamo naše kamene vile a nađe se i šesni oni pravi vila...u jedno lipoj vili u Starome je otvorena konoba Stari dvor... ma konoba ne more bit na bojeme mistu, zapadno prima selu jema nikoliko kafiča, butiga, đardin i lipa plaža, okolo judi fitavaju apartmane, istočnije je nažalost još uvik zatvoreni otel Palace...a isprid su plaže, zapadno in je ka prvi susid kamping...stvarno idealno misto za konobu...na teraci ti zastaje dah o lipega pogleda, još ka bi se grad pobrinija da isprid nima parkirenja onda bi bilo idealno misto za popit kavu, poist bokun mesa oli ribe i sve zalit žmulon vina...povirija san u kužinu i evo van na litratu kako se spravja pizza u originalnoj krušnoj peći, kako i mirita...divin se ovin judima koji su se uvatili ove lavure, virujte mi nije in lako, ali ja san siguran da se turizam pomalo vrača u Kaštela...mišjenja san da ne triba u Kaštelima puno minjat...sva srića da se nismo unakazili ka druga turistička mista, ma ovod sve odiše načinon života 60i godin onega vika a to je ono ča dobro platežni gosti vole, uteč od modernega života i vratit se u mala jednostavna mista i u miru pročitat one knjige koje su tili odavna pročitat...u Kaštelima ka prvo triba sredit kanalizaciju, onda zabranit liti vožnju auti uz more u popodnevne i večernje ure, vaja posadit puno cvića, piturat kuće, sredit okućnice...sve se to more ako se oće, pa malo dricat rive i dat šansu mlademe svitu da brez puno problema moredu otvorit raznorazne uslužne obrte kojima bi se turizam obogatija...još ka bi se u Kaštela doselilo jedno dvisto do tristo penšjunata iz EU-e oli sa kontinentalne Domovine, onda bi bilo šušura po cilu godinu...a Stari dvor je na kraju ove štorije lipo misto za doč i guštat...želin in sve najboje...dočemo jopet...

skupija san sime...

studiokonoba@yahoo.com (dalmacija moja inspiracija) — Tue, 22 Nov 2011 20:35:00 +0100

Život na selu je prava divota...u ova vrimena ka je sve digitalizirano i ka nima problema bit u kontaktu sa sviton najlipše je bit na čisten zraku i uživat u blagodatima prirode. Masline, verdura, grozje, agrumi sve je nadohvat ruke a ka temu dodan mediteransko bilje okolo kuće onda me morete razumit da ovod guštan. Svake godine ostavin za sime razne verdure i sušin dalmatinske začinske trave. Lipa zanimancija eto, znan ča jiden i sa čin pripravjan spizu. Sad vaja sredit mendule i sve ostalo meknit u caklenke.

http://www.slobodnadalmacija.hr/Mozaik/tabid/80/articleType/ArticleView/articleId/155938/Default.aspx

đem o'maginja...

studiokonoba@yahoo.com (dalmacija moja inspiracija) — Fri, 18 Nov 2011 19:24:00 +0100

Evo sa in je pravi stađun, sunca je napritek reka bi čovik da je promaliće...ka je pala zanja kiša onda su ka lude počele rest i zrijat...i tako mi dvoje Ona i ja prošetamo do obližnjega brda tamo jema maginja ka u prići...dok Ona gušta u krajoliku ja san nabra nikoliko kili maginja...onda smo se spustili doli doma pa san se odma uvatija pravit đem...evo van moje ricete...tri kila maginja san opra vodu bacija ča i ocidija...doda san kil i kvarat o'kila kristalnega cukra...meka na špaker i na laganoj vatri počeja mišat ka su se počele kašit vazeja san ovi štrukač za pire kunpir i sve dobro pritisnija...nadaje, štruka san pet limuna i doda dva kučarina vanilijinega cukra, ovo je specijalni cukar sa dodatkon prave crne sridice o'vanilije...sve se daje miša a gotovo je ka se sa drvenon žlicon potegne štrika po toj kaši i ta štrika ostane vidjiva...to znači da je dovojno iskuvalo...u caklenke koje san iskuva zajedno sa pokrivalima lagano stavjan vrili đem i ka je sve gotovo okrenen naopako i ostavin da se oladi...olađeni đem čuvan u maškaduru...eto, vidit čemo za koju ricetu o'dezerta ču to duperavat...a nače se i za unuku i unuke...ludi su za palačinkama sa ovin đemom...

divja kruška...trnovača...

studiokonoba@yahoo.com (dalmacija moja inspiracija) — Tue, 01 Nov 2011 20:35:00 +0100

Na susidovoj zapuščenoj parceli deboto dvista metri od naše kuće je ova vela divja kruška...plodovi su mali i tek kad počmu kafenit onda i se more jist...onako zelena je puno trka...pošto je mala u njoj je relativno puno košpica ali zato jema puno lipoga okusa...ostavija san i u zimski vrtal da se suše pa ču i onda meknit u rakiju da vidin rezultat, ne virujen da ču falit ma ova se rakija pravila po istri i dalmaciji...a od stariji judi san čuja da se nanižu na bokun konopa i onda se suše pa se zimi jidu...kažu da je to ludilo...to van je bilo vrime ka nije bilo aranči i banana...uh, sve se prominilo...nanizat ču i ja koji kil na bokun konopa...a rakija, znan da neće bit vilijamovka ali ču je zato nazvat rakija dalmatinka...

kiseli kupus...

studiokonoba@yahoo.com (dalmacija moja inspiracija) — Tue, 08 Nov 2011 00:01:00 +0100

Iskriža san tri kila kupusa, posolija ga pa doda malo lovora i tri režnja češnjaka...dobro san pritiska pa lagano nadolija kuvane vode taman da kupus bude pokriven...poviše svega san meka piz i sve poklopija...odnija san na kat isprid klizni vrat o'lođe di je malo teplije nek se počme fermentirat...a ove zime če bit lipi delicija sa njin...nastavak štorije če bit ka kupus bude zgotovjen...

dalmatinske betule...zadar...

studiokonoba@yahoo.com (dalmacija moja inspiracija) — Wed, 12 Oct 2011 20:16:00 +0200

Malo pomalo naša se dalmatinska mista sređuju i otvaraju se betule razni profila. Jeftinije, skupje, još jeftinije, friška spiza, sumjiva spiza, sa fast i sa slow spizon, boje reć za svačiji žep eto tako i triba nismo svi jednaki, ma nimamo svi puno šoldi a nimamo ni istega načina guštanja u spizi.

Divota je vidit kako se okolo Foruma i Donata sve lipo sredilo i popločalo a Arsenal je posebna štorija izložbe, kvalitetna spiza, ugodna teraca, izbirljivi restoran, poezija, grand cafe ma svega jema to je pravi lipi Zadarski đir. Kvalitetni su restorani kraj Foše a liti je svakodnevna autobusna pruga do Zrča. A o Pagu bi se mogle pisat cile štorije Paški sir, janjetina, izvrsna riba sa kamena, ekologija, cvit morske soli, muzej soli u Ninu sve je prvoklasno sa fenomenalnin hotelon i restoranon Boškinac u Novalji a o njiovoj vinariji bi triba napose pisat.

Pitoreska sela ka ča su Poljica di se proizvode delicije od friški i suvi smokava oli Rtina sa svojon mini klimon di bura zna ola,la puvat ali je zato u Rtini gušt bit okrenut prima jugu. Sve se uklapa u novi naćin hedonističkega života.

Zadarski muzej cakla je stvarno vrlo poseban a o morskin orgujama i pozdravu suncu se toliko tega pisala tako da ja ne triban ništa dodavat. U Gradu je posebni štimung, kale su sa šesnin oštarijama i betule su na svakome koraku a ka se trg o'Pet bunara sredi Zadra če bit pravo ludilo o'gastronomije i ugodnega života. Nikoliko boutique otela svemu daje posebni tinbar. Sa svojin zaleđem Ravni Kotara i Bukovice sa ekološkon spizon i novin nasadima maslina i vinograda malo pomalo zauzima svoje pravo misto na gastro karti Dalmacije.

paradižot...

studiokonoba@yahoo.com (dalmacija moja inspiracija) — Sat, 08 Oct 2011 19:34:00 +0200

Ka san bija mali mater bi nan bratu, sestri i meni spravjala paradižot, to van je lipi dalmatinski dezert o'domači jaja, piškota, prošeka i cukra...koji su to onda bili gušti poist a najdraže mi je bilo na kraju ka je mater sve spremila sa drvenon žlicon pokupit iz teče ča je ostalo i onda teču polizat...vrimena su se prominila sad se dezerti kupuju u butigama i sumjive su kvalitete... ja san krajen sedandeseti godin onega vika paradižot jema i u našoj Konobi u Niskozemskoj...ali svitu moj to van je davno bilo...sad to spravjan unucima evo van ovod novi litrati i riceta pa malo guštajte...

Ka prvo odvojin žumanjke od bilanjaka...bilanjke dobro istučen a žumanjke zajedno sa cukro izmišan da bude gusta kreme i temu dodan malo prošeka...

Mliko meknen da zakuva skinen sa vatre i za žlicon stavjan bilanjak u mliko onda to mliko sa žlicon prilijen po bilanjku...u male pijadele oli u jednu veču pijadelu poredan piškote pa i malo poškropin sa prošekom...ono malo bilanjka ča je ostalo plivat u teči o mlika promišan i u sve to dodan kremu od žumanjka...sve se jopet dobro promiša...

Onda meknen bilanjak poviše piškota i priko svega pomalo prilijen ono ukuvano mliko sa žumanjkom...niko voli priko svega gratat čikolatu a niko pospe gratane mendule a niko jide ovako brez išta...

jesenji gušti...in umido kupus / kelj mrižar, sa kobasicama i panceton...

studiokonoba@yahoo.com (dalmacija moja inspiracija) — Sun, 12 Dec 2010 00:01:00 +0100

Čak je i kod nas u Dalmaciji zaladilo, evo dok ovo pišen vanka je bura a temperatura je taman tamo nidi ispod pet gradi...ajme kad če promaliće da se malo ugrijemo ali nima veze da bi čovik ove dane proša s'gušton potribno je par kila kupusa, pancete i kobasica...evo van jedan lipa riceta...za nas šest iz ekipe san izriza tri lipa mala kupusa mrižara...onda još i tri veča kunpira na sitne kockice...lipi bokun pancete...i jedno desetak kobasica, vazeja san i kod Pivca iz Vrgorca...pa jedna veča kapula...tri režnjiča češnjaka...dec maslineva uja...kvarat litre slakega vrhnja za kuvanje...tri žlice konšerve...četiri lista lovora, grančica ružmarina, mažurana i kaduje...šaka selana na grezo...kupus operen i iskrižan na male bokuniče, dodan kunpire i dalmatinske trave pa navisin da sa malo vode počme kuvat...pancetu iskrižen na fete...kobasice na lipe bokune...kapulu i česnjak na sitno...pancetu i kobasice frigan na maslinovu uju i dodan kupusu...u uje dodan kapulu nek malo požuti, dodan češnjak, selen, sol i papar...na kraju dodan konšervu i sve promišan...dodan dec vode promišan onda i sve gre zajedno sa kupuson sve san promiša i ostavija da počme kuvat in umido...prvo vaja vidit da je kunpir mek, ako je mek dodan slako vrhnje i brez poklopca ostavin na laganoj vatri da se lipo zgusne, sve redovito promišan...nakon sat vrimena laganega kuvuckanja je sve gotovo i onda gremo guštat...zanja kontrola soli i papra...dodan malo salate i vina i to van je to...jesen prolazi gušti ostaju...

zimski gušti...blagdanska večera...

studiokonoba@yahoo.com (dalmacija moja inspiracija) — Sun, 26 Dec 2010 08:01:00 +0100

dogovor je pa, jist čemo srnetinu, Ona je skuvala crveni kupus i čimulice a ja san se uvatija srnetine...prvo san napravija pac...moj pac van je ovaki...tri lipe grančice ružmarina, pet - šest listova lovora, četiri režnjiča češnjaka, tri žlice maslineva uja, dvi žlice balsamico kvasine, osan žlica vinske kvasine i desetak kapi naše Nektar Kvasine malo papra i dvi grančice selena u listu to san sve ujutro promiša i ostavija da mi bude pri ruci tako da mogu svaki po ure da promišan...

vazmen tavu i ulijen maslineva uja i iskrižanu pancetu na sitno, kad se panceta raskrabila mečen linia direta srnetinu iz paca...ne puno, jerbo more počet pinit...okrenen na drugu bandu i tako dok sve ne potrošin...svaki put novo uje...u ono zanje uje o'friganja san ubacija četiri križane kapule, pet šest režnjić češnjaka svemu san doda onu iskrižanu pancetu i sve malo zažutija...pomišan sa meson...ostavin sa strane na laganu vatru...

desetak gljiva šanpinjona iskrižan na sitno i dodan u tavu o'friganja kad su frigane stavin u gljive dvi žlice konšerve i dvi žlice brašna stalno mišajuči...zalijen sa slijedečin...

crvenu koru od kapule, listove lovora i ružmarin iz paca, po deca soka od višanja, ono malo paca i dva deca crnega vina sve navisin da kuva...sol i papar...i dodan šaku dalmatinski trava...

e to onda prociđeno prilijen po konšervi i brašnu stalno mišajuči...sve to onda prilijen priko mesa i dobro izmišan...

sve se mekne u visoki lonac i poklopjeno navisi na jaku vatru, nek dobro prokuva...

dodan suve šljive i ostavin na laganoj vatri da se lagano šufigaje...vaja vodit računa da sestvori gustoča ako je riđe onda brez poklopca...uz srnetinu san doda škojke o'manistre...

kontroliran jeli triba malo cukra oli bičerin prošeka...nakon jedno dvi i po do tri ure kuvuckanja in umido je srnetina gotova...pili smo mlada vino od ove godine koje san taman pritočija...a vino van je kupaža od osandeset posto merlota i dvadest posto vranca...lipo nan je leglo...

adio zima...promaliće je stiglo...

studiokonoba@yahoo.com (dalmacija moja inspiracija) — Mon, 21 Mar 2011 20:48:00 +0100

U đardinu se na veliko lavuraje, pripreman zemju za sadnju verdure...ma ostala su mi tri lipa kupusiča koje san ostavija za poist na zanji dan zime...a svaki put ka gren u Split odnesen materi dvi tri glavice kupusa...onda je nakon par dan zoven...majko kakvi ti je bija kupus...i svaki put mi reče; sine moj ma bija je savršen, kupus ti je ka špinjača, ajme ča san guštala...i tako ona cilu zimu...a mater mi voli popit i tanku bevandu a to van je prst vina i četiri prsta vode...tek toliko da ga čuti...a osandeset i sedma je tu, ma nek ona gušta i svakome ko jon dođe u vižitu kaže ovo vino mi pravi sin...a meni krivo, malo se zacrvenin ali me brzo prođe...kad bude ovo čitat moja sestra puknit če o'smija...a riceta van je ovaka...kupus se opere i rukama ga iskidan na komadiče...pripremin jedno pet šest kunpira na male bokuniče...jedan veča kapula na grezo...dva režnjiča o'češnjaka na sitno...šaku selena na grezo...našlo se suvega mesa i pancete sve iskrižan na bokuniče...u tavu meknen fete pancete kad je pustila mast onda dodan meso...nek sve dobije lipu boju...dodan kunpire, selen, kapulu i češnjak i promišan...nek se sve lipo isfriga...dodan maslineva uja...kupus onako mokar meknen u jednu teču...kupusu dodan dvi žlice konšerve...dva deca ipo govečega temeljca...kad je kupus počeja da se smanjuje svemu dodan ono ča san isfriga onda dobro promišan i ostavin da lagano kuva in umido jedno uru ipo...eto ga to bi bilo to...malo kruva vina i eto van zanjega zimskega gušta...

veprovina, verdura, varenik, vino...

studiokonoba@yahoo.com (dalmacija moja inspiracija) — Thu, 16 Jun 2011 12:58:00 +0200

Danas je sve u stilu slova V eto od malo veprovine sa par suvi šljiva i šakon brusnica san napravija lipi tingul in umido, sve je aromatizirano sa vinon, kvasinon, česnjakon, kapulon, selenom, karoton, lovorom, ružmarinon i kadujon...mladi kunpiri u kori su kuvani i priko svega je meknuta murtela i dva tri nasickana češnjaka...rukola je divja ubrana iza kuće ispod jedne masline a ove smežurane masline su iz salamure od lani...tikvice san nakon grilade namaza sa mojin varenikon a ti varenik mi je gastronomska senzacija...definitivno ču ga ove godine napravit još više...i to u dvi varijante tekuči i gusti, ovega gustoga malo duje ikuvajen...evo van litrati pa pogledajte, bilo je, ma moran sam sebe pofalit,...fenomenalno...

malo svečanije nego obično...

studiokonoba@yahoo.com (dalmacija moja inspiracija) — Fri, 25 Dec 2009 21:04:36 +0100

svake godine ista pisma, za božične blagdane se jide i pije više nego obično ma nek je tako, taka je tradicija iako mi je sve to pomalo suvišno...samo kad se sitin kako je u svitu koliko je gladne dice i nemočni onda mi dođe da poiden sengvič i popijen čašu vode...ali eto veliku politiku kreiraju karijeristi a obični puk je ti koji kupi mrvice i onda se na ovi dan malo išvoga ko dače doč kraj svita...na kraju, evo van ča smo mi danas jili...

ovo je matovilac sa kruškama mariniranin u limunu a priko tega nagratanega parmezana i isfrigani pinjola a dresing je bija malo senfa, meda, kvasine, maslineva uja, soli papra...to nan je bilo predjelo...

dinstana srnetina sa lovorom, smričkom, timijanom i crnin vinon...a uz to pečeni jelen sa šugom od divjega šipka i vrhnja...dinstani crveni kupus, prokulice i kunpir sa fetama tikve koji je gratiniran...to nan je bilo glavno jelo...

austrijsko vino carpe diem od kuče moser je bija izvrstan izbor moje čere...stvarno smo ga o gušta popili...

a ova torta od kvarka je bija finale...od lipi malina sa pistacijima šlagom i piškotima koje je moja čer ispekla...mmmm...unuci su guštali...

male rolade od piletine...

studiokonoba@yahoo.com (dalmacija moja inspiracija) — Wed, 06 Jan 2010 11:33:00 +0100

Triba mi po kila pileči prsa koje san izriza na tanke skalopine...na svaki skalopin san meka plastičnu foliju i sa dlanan malo potuka...za punjenje skalopina mi triba janječe mliveno meso, sol papar i meki sir...to sve zajedno sa dalmatinskin začinskin travama i češnjakom dobro promišan i stavjan na svaki skalopin...sve san dobro smota u alu foliju...i meka na jednu pijadelu...to sve gre u ugrijanu pečnicu na 200 gradi...vazeja san dva velika kunpira skinija san in koru pa san i nabocka perunon na izrizanu bandu...soli papra i maslinova uja po kumpirima...i to sve u pečnicu zajedno sa roladama...za verduru čemo jist mlade mahune od biži...i frigane fetice selenova korjena...za salatu san pripremija kukumare, pome, zeleni selen na komadiče, orije i doda san malo mangoa...eto to je bilo sve ostalo se vidi na litratima...a i za vino smo dogovorili...

spiza iz indonezije...malo navrnuto po moju...

studiokonoba@yahoo.com (dalmacija moja inspiracija) — Mon, 17 May 2010 22:21:00 +0200

Za ovo mi triba jedan veliki wok, maslinovo uje, pršut na sitno, šaka orija, četiri suve pome, paprika iz tegle malo na kiselo, paksoi to bi bilo ka naša blitva smo ča jema malo debje korjenje, angriz i to dugega zrna iz tajlanda, selen na grezo, dva režnjiča češnjaka...onda ovako pršut raskrabin na uju i nek malo bude isfrigan, dodan skuvani angriz i onda selen, ćešnjak, papriku, pome, dobro mišan, dodan orije, angriz san skuva a'dente a paksoi san pet minuti na pari spravija isto tako a'dente, sve dobro mišan, dodan jednu žlicu badjaka i sve promišan...i to je sve pili smo ovo Španjolsko vino i mogu van reč da je pala cila botija...za dezert san napravija Niskozemski specijalitet Haagse Bluf ...evo van riceta...100 grama cukra u prahu, dva bilanjka i 20 cl soka od ribizla navedeno se mekne u čistu zdilu i desetak minuti nek se miša kad ne stvrdne da se zdila more okrenit naopako a da Bluf ne ispane...onda je gotovo...servirat sa tzv. dugin prstima, kolačići malo zacukreni...eto...

lunch i malo vina...

studiokonoba@yahoo.com (dalmacija moja inspiracija) — Mon, 31 May 2010 00:42:00 +0200

Ustvari mi je največi gušt kad mi se čagod jide poč u kužinu i otvorit frigo...i onda od onega ča je unutra napravit lunch...evo ovod jema intergralnega kruva i tri vrste sira...friški ovčji, mladi kozji i francuski brie...ovi brie je posebni gušt on vonja na smrdjive bičve eto tako bi ga opisa...to je ludilo od sira pogotovo kad ga se po ure prije klope izvadi vanka...ove sjemenke od tikvice san malo popržija zajedno sa ovon tankon panceton...priko tega san doda friškega vlasca i to je to...malo vina talijanca iz Abruzza priko puta Dalmacije je bilo taman...

malo zalogajit i malo popit...

studiokonoba@yahoo.com (dalmacija moja inspiracija) — Fri, 25 Jun 2010 11:30:00 +0200

ka koje vidija danas kuvat obid...evo malo izležavanja, odmora i čitanja libra...a zalogaji su nan taman, samo se dvoumimo koje čemo vino popit...ma nek Ona odluči...

zimski gušti...bibita o'bermeta...

studiokonoba@yahoo.com (dalmacija moja inspiracija) — Sun, 09 Jan 2011 20:00:00 +0100

evo je prošlo prilično vrimena da san meka vino, rakiju, voče i ostale mirođije da se točaje i da pustu svoju aromu...sad je vrime da sve pritočin, procidin i ostavin da se smiri i da počme zrijat...ono ča je ostalo san bacija na kompost...kuša san malo i meni je dobro...malo je gorčasto, puna su justa o'grozja, mandarina i smokav...a rogač je pustija lipu boju...doda san svemu još litru lozovače i dvi litre crnega vina...provat čemo bibitu pit olađenu i sa malo leda...lito more počet...

zimski gušti...dimjeni losos sa vrhnjem...

studiokonoba@yahoo.com (dalmacija moja inspiracija) — Fri, 07 Jan 2011 00:01:00 +0100

ova riceta mi je tako draga pa je eto moran podilit sa vama...jednostavna je za spravjat a manistra je luda za ovin šugon...

onda ovako...kapulu, češnjak i list od selena narižen na sitno...sve to na maslinovu uju malo zažutin...dodan iskrižani dimjeni losos i mišan, onda još sol i papar...dodan dec vrhnja, promišan i nastavin mišat...triba da malo iskuva i nek se počme gustit...manistru san skuva adente ocidija i onda san losos u šugu doda manistri i sve dobro promiša...priko pijata nasickane murtele...jide se malo mišance o'salate, popije se žmul vina i to van je to...nama je ludilo...

zimski gušti...kolač o'mandarin...

studiokonoba@yahoo.com (dalmacija moja inspiracija) — Sat, 05 Feb 2011 00:01:00 +0100

ovu ricetu je napravila Ona...u našeme đardinu je mandarina i limuni ka u prići...za ricetu je potribno...5 do 6 mandarina sridnje veličine...moraju bit zdrave i neprskene jerbo se sve mandarine samejeu sa koron...4 velika jaja...18 deka cukra...20 deka mlivene mendule...1 kučarin praška za pecivo...namazani lim promjera 20 cm...mandarine kuvan u dovojno vode jedno 25 minuta i ostavin da se oladi...pečnicu zagrijat na 180 gradi...olađene mandarine pripolovit i izvadin eventualne košpice...mandarine izmiksan da budu kremaste...potribno mi je da bude malo više od 2.5 deca...jaja i cukar užbatin dok ne pobili i postane gusto...dodan tome prašak za pecivo...mandarine i mendule...dobro izmišan...izlijen na lim...pečen 60 do 65 minuta...kolač ostaje mokar i malo se ulegne u sredini...u limu ostavin da se oladi...nakon po ure pečenja meknen priko svega alu foliju da ne dobije tamnu boju...ka je gotovo priko kolača pospen cukra u prahu...a višak samliveni mandarina san meka u plastične kese pa sve u duboko tako da se more cilu godinu duperavat...guštajte...

pupojci o'raštike...

studiokonoba@yahoo.com (dalmacija moja inspiracija) — Fri, 25 Mar 2011 00:01:00 +0100

Raštika je počela lipo da reste evo je bacila i cvit...da bi jon da force da raste vaja one pupojke okinit...moj susid to baca ča. ali ja jeman u glavi jednu ricetu pa ču je napravit...onda ovako, pupojke uberen i donji dil grančice okinen jerbo je to malo tvrđe...nakon ča san opra i ocidija prvo vazmen jednu tavu i u nu ulijen malo maslineva uja...isfrigan nikoliko feta suvega mesa, ka je pofrigano u onu masnoču isfrigan pupojke o'raštike okrenen je sa svi stran i ostavin na laganu vatru...poklopin i svemu dodan peštano sime o'korijandora...još malo uja, pa soli i papra...nikoliko feta kruva san meka da se popržu...eto to mi je bija obid ka san ovo reka susidu samo me je pogleda i manija rukon, zna on da san ja malo "propuva" ma nek on to tako misli...nemoš mu zamirit on priznaje samo kapulu, češnjak i petrisimul...neka meni njega dobar je ka kruv a di neče bit ka je pekar...eto svak jema svoje gušte...a ovod je raštika o lani i naša unuka, ajme ča gušta poist raštiku...

listovi loze...

studiokonoba@yahoo.com (dalmacija moja inspiracija) — Tue, 31 May 2011 21:32:00 +0200

Koje su to blagodati jemat svoj vinograd, ajde nije baš vinograd vengo je lipa odrina...plija san lozu i pošto je karenca odvna prošla nabra san lipe zdrave listove koje ču meknit u salamuru sa dalmatinskin travama i onda smotane sačuvat za duperavanje...dok san bija kogo u Konobi kupova bi u Turskin oli Grčkin butigama o'spize i onda bi malo eksperimentira sa spizon...obično bi to bili riižoti od račiča koje bi onda smotava u listove loze i pravija male sarme...u Turskoj nazivaju japrak ka i u Bosni a Grci kažu dolmades...u Hercagovini se zove hercegovački japrak...ali to je u listima od raštike...eto sad i to znamo...

listove san opra i meka i u jednu teču...doda san obilato krupne morske soli i razni dalmatinski začinski delicija iz našega đardina...to van ostavjan da dodate kako van paše...nek ostane u salamuri jedno dan i po...triba izgubit boju i postat maslinasto zeleno...to se sad smotaje po osan komad i stavja u dugačke staklenke...dodan krupne soli nadolijen vode i na vrj prst maslineva uja...one trave rasporedin po bocama i to van je gotovo...ostavit ču par dan na sunce i onda sve u maškadur...a ka buden pravit spizu biće lipa reportaža...

matar...motar...petrovac...

studiokonoba@yahoo.com (dalmacija moja inspiracija) — Sun, 05 Jun 2011 00:01:00 +0200

Bija san na škoju i nabra matara...volin ga duperavat sa mnogin ladnin delicijama...izvrstan je dodatak uz sireve, masline, kapere, dalmatinski pršut i razne ribje paštete...

onda ovako matar oli motar kako očete izrižen sa nožicama na lipe male grančice, onu tvrdu petejku bacin ča na kompost...matar operen...navisin u veliki lonac vode, ka je voda počela kuvat dodan matar i nek tako prokuva jedno pet minuta onda procidin i raspoređujen u staklenke...ja san za ovu ricetu doda samo osušenega matičnjaka, matičnjak daje malo na limun i mentu...soli, papra i par režnjića češnjaka...nalija san skoro do vrja suncokretovin ujen i onda zanji prst san doda maslinovo uje...još povrj krupne soli i to van je to...i onda u maškadur...

kuvada o'šparog...

studiokonoba@yahoo.com (dalmacija moja inspiracija) — Tue, 28 Jun 2011 00:01:00 +0200

Evo je taman proša stađun o'šparog, počeli smo sa divjima i to fritada pa došli do ovi malo debji uzgojeni u vrtlima...šparoge izrižen na po i oni donji dil ostavin za juvu a oni gornji dil se skuva a'dente a sridnjeme dilu skinen koru i iskrižan na bokuniče...to se lipo skuva doda se mali kunpiriča, na sitno izrizane i malo pofrigane pancete a selen san iskriža na grezo dodan malo soli i papra...ka je skuvano onda izmutin nikoliko jaja i prilijen priko ociđene skuvane šparoge ka je počelo da se jaja stišču onda dodan kuvane vrje o'šparoge da malo legnu u jaja...i onda se tava mekne u ugrijanu pečnicu samo nek se malo jaja stisnu...napose san skuva jaja malo više nego u meko a nji ču začinit kvasinon i maslinovin ujen...uz to more malo salate i to van je cila kuvada...

cikla, češnjak, teletina...

studiokonoba@yahoo.com (dalmacija moja inspiracija) — Mon, 25 Jul 2011 21:00:00 +0200

na alu foliju meknen bokuniče cikle, nikoliko režnjiča češnjaka i malo origana...zalijen sa maslinovin ujen i balsamico kvasinom...sol i papar... sve smotan i meknen u pečnicu jedno uru vrimena na 180 gradi...listove cikle san izriza na sitno...navisija san dec mlika, kučarin masla, na sitno pancete koje san malo posolija i popaprija, skuvani kunpir san pasira doda mliveni tvrdi sir i sve meka u mliko...ka je sve promišano onda sirove listove cikle dodan svemu i ponovo promišan...tu mišancu rasporedin u pijadelu pospen sira i meknen u pečnicu da zarumeni...uz to serviran friganu teletinu...a oni češnjak koji je bija u kori je pravo ludilo...bocun merlota, bokunič kruva i to van je to...

filet mignon de porc avec farce dalmatiene...

studiokonoba@yahoo.com (dalmacija moja inspiracija) — Fri, 30 Sep 2011 20:39:00 +0200

Kod našega mesara smo nabavili lipi komad svinjskega fileta bija je malo veći pa čemo ga poist u dva puta...onda ovako...farce oli ti punjenje je napravjeno od malo selena, suve pomidore iz uja sa dalmatinskin začinskin travama, češnjaka i paprike roguše...paprika je ka prvo ispečena u pečnici pa jon se onda korica skinila...sve se to mekne u blender i sameje...meso se izriže tako da se dobije široki odrezak...s'tin ča je samejeno se namaže meso i dobro smota...smotaje se sa ovon silikonskon kurdelon...to gre u pečnicu jedno po ure na 220 gradi...mi smo jili salatu i frigane tikvice na koje je meknuto ostatak farce...kunpirići su bili na male kockice...uostalome svak nek dodaje ča ga je voja...vino se počelo pit iz desnega suda godina 2010ta...2009ta je partila...bilo nan je puno lipo...ovo je Ona skuvala ja san samo natočija vino i litrava...

litu nikad kraja...

studiokonoba@yahoo.com (dalmacija moja inspiracija) — Sun, 18 Sep 2011 00:01:00 +0200

teple litnje noći...guštanje sa svojin najmilijima ko to more platit...pogotovo ka se spremi čagod lipega i sve to se zalije sa dobrin vinon...stvarno litu nikad kraja...dok je vrime ka u prići dotle već vino iz 2011e počima lagano da vrije...sa je prišlo na tiho vrinje...ma nek vino vrije...mi smo prije ništo malo vrimena počeli pit 2010u...a u konobi se nađe i čagod iz vinske arhive...naš život je po miri čovika...

ekološki osušene smokve...

studiokonoba@yahoo.com (dalmacija moja inspiracija) — Sun, 11 Sep 2011 15:01:00 +0200

Čeka san da mi se smokve na suncu dobro osuše i onda san se uvatija ove lavure...ka prvo u jedan lonac nalijen vode i dodan dosta morske soli...u lonac točan smokve i sa rukama i dobro promišan da se sva šporkica skine sa smokav...onda ih... ?????...ostalo je mala tajna...samo ču otkrit pinkicu tajne...ovod je ekologija najglavnija stvar...a rezultati su fenomenelni...

evo usput san napravija i par caklenki pijani smokav...a i ova nova riceta je tajna i nek tako ostane...malo san tajanstven ovega puta ali eto nek se i niko drugi siti ove metode sušenja i ove ricete...

soparnik...ali ovako...

studiokonoba@yahoo.com (dalmacija moja inspiracija) — Sun, 24 Apr 2011 21:24:00 +0200

Na jedneme buvjaku u Amsterdamu san naša ovo letrično kuvalo oli grill...držin ga u ruku i pitan se ma zašto bi ga moga duperavat...ribu i meso bacan na gradela i spravjan na lipome dalmatinskome drvu...i onda mi sine ideja, sitin se da mi je mater pravila soparnik doma u škrovadi, ma taki je život, majka je po mojoj babi iz Poljičke Republike i baba ga je pekla ka niko drugi i to na kominu ka svi iz Poljica ali ka se živi u gradu onda se vaja snač i peč u škrovadi...i tako ga ja svitu moj za niku sitnu lovu kupin...doma san napravije jednu siniju a pošto se ova ploča di se peče more dignit onda mi je lako soparnik okričat...sa rukavicama sve zajedno dignen i okričen...a dok se peče ostavin siniju na soparniku tako da se gornja banda ne oladi...ma mogu van reč da nan je po guštu znan da če mi Poljičani pribacivat da san ga unakazija ali nima veze gastronomija jema raznolike pute razvoja i prilagođavanja...onda ubrat blitvu, umisit tisto,vazet lazanjur i eto van soparnika...ja ga ka je ispečen namažen sa maslinovin ujem pa dodan nasickanega češnjaka, nasickane mendule i malo potučenega cukra u kockicama, ali cukra samo pinkicu...bilo nan je lipo...a pija se naš coupage 90 posto merlota i 10 posto vranca...

orahovica...

studiokonoba@yahoo.com (dalmacija moja inspiracija) — Wed, 17 Aug 2011 22:05:00 +0200

svake godine je ista pisma, na promaliće se uberedu zeleni oriji pa se meknu u caklenke i onda na sunce...ovod van kako san to napravija...evo je došlo vrime da sve ocidin i filtriran, ono filtriran oču reć da procidin kroz bokun karte koju duperajemo u kužini...ja orahovici dodajen manje cukra jerbo Ona voli pinkicu gorču...ispale su dvi botije i to je to a oni oriji su sad na kompostu...i tako svake godine...dosadan život ?...ma zaboravite na dosadnost...u Dalmaciji nika ni dosadno...

konšerva...

studiokonoba@yahoo.com (dalmacija moja inspiracija) — Sun, 28 Aug 2011 22:50:00 +0200

Ma ovo van je mala zafrkancija ali nakon ove zafrkancije bar znan da mi je u caklenkama prava domača konšerva...našlo se ništo poma iskriža san ih, zasolija i sameja...onda san odvoija sok o'poma a olađeni sok je pravi gušt popit u ove sparne litnje dane...a ono ča je ostalo san meka u jednu platnenu boršu i obisija na komaštre da se dobro ocidi...ka je sve bilo ociđeno ostavija san onako u borši da se na suncu dobro osuši...caklenke sa poklopcima san prvo meka u kuvanu vodu i onda san napunija sa konšervon...ostavija san mista da se more nalit prst maslinova uja...i to je to...ako se sve u'čisto radi onda docnije nima plisni...ovo ču duperavat onako ove zime ka mi pukne film i oču ništo posebnega...ko bi napripravija konševe koliko je mi godišnje duperajemo eli eto malo je ali je slako...skužajte slano...

litnji vega obid...

studiokonoba@yahoo.com (dalmacija moja inspiracija) — Thu, 01 Sep 2011 21:41:00 +0200

Ka su ove litnje sparine onda nan je po guštu poist puno verdure sa malo manistre...mišana salata je iz vrtla, našlo se je i vina a sve smo zgotovili sa dvi tri feta starega sira...jednostavnost života je največi luxuz bar je to nama tako...

konoba porat kaštel stari...

studiokonoba@yahoo.com (dalmacija moja inspiracija) — Tue, 09 Aug 2011 13:57:00 +0200

Da je mene bilo pitat, ali znan da me niko neče pitat, onda bi ja Kaštela ostavija ovaka kaka jesu...ajde ne baš ovako ma malo bi i drica, sredija bi rive, posadija više zelenila, podilija puku pitare i sadnice cvića...dekreton obaveza puk da srede okučnice i fasade...maka ča sa riva puste aute...ono strašilo na pontonima srušija...a u večernje ure zabranija vožnju po rivan, ma za koju monu triba vozit auto navečer, šetnja od doma do rive, oli se lipo parkira na parking Plavega Jadrana oli dikod sa strane i onda lagana šetnja...to su ionako jedni te isti koji điravaju...a to se more samo ka se udre po takujinu oli se zabrani vožnja...ma niti jedna politička partija neče da se opeče na temu, jerbo če izgubit glasove na izborima...

ali malo san se maka od teme nek to politički papani sređuju, meni su gušti se opustit uz bokunić spize, malo bibite i sa dragin društvom...danas smo se malo opustili na teraci konobe Porat...usluga je stvarno izvrsna, spiza je standardna i tu jema dosta prostora za novitade i dizanje kvalitete...teraca bi se puno intimnije mogla sredit vaja malo guglat da se vidi kako drugi rade...alo, bit na samoj Rivi je rudnik zlata...želin in sve najboje...a za one kojima je u konobama kondut važna stvar mogu bit sigurni da je ovod u konobi Porat sve čisto i da blista...ma to pišen jerbo u puno konoba je to zanja rupa na svirali...zato uvik gren povirit u kondut jerbo se po temu vidi kakvi je domačin...

ka oni otel kraj kule u Novome bude gotov i ka se na tržište fitavanja ponudi još koji šesni otel oli desetak kameni kuća onda se već more govorit da če se turizam razvijat onako kako triba...domača atmosfera brez jake mužike i ludila...nek Kaštela budu misto sa šesnin kućama za fitavanje, eto mnogi moji furešti prijateji više vole da budu u Kaštelima nego u Splitu oli Trogiru...ako in triba buka i ogromni šušur onda gredu u Okruk, Split i Trogir ma neka Okručana, Spličana i Trogirana ka su taki put izabrali, Kaštela se tribaju razlikovat sa svojin ribarskin feštama i kulturnin liton po miri čovika...dobro, svak se razvije onako kako mislidu da in je najboje oli kako koji lobi to progura...

meni je ovod super a i poradi sentimenta, ipak san u Palacu i Resniku lavura krajen 60ti godin onega vika...a da ne govorin da san ovod i suprugu upozna uz mužiku Indexa i Davorina Popovića na plesnjaku u Plavome Jadranu...bila su to lipa vrimena...

mali ražnji...

studiokonoba@yahoo.com (dalmacija moja inspiracija) — Fri, 29 Jul 2011 20:51:00 +0200

ništo malo san prije ovi litnji kiša lavura po vrtlu i usput san okinija nikoliko grana o'lovora, ma smetale su mi i onda se zamislin ma moga bi ja od ovi gran napravit šesne ražnje di bi se natakla riba oli bokunuć mesa...uvatija san se sa brtulinon dilat i da van pravo rečen zadovojan san...ovo bi bilo za sad a ka dođe vrime o'grilade onda ču meknik ovod par litrati...

višnje sa cukron i limončelom...

studiokonoba@yahoo.com (dalmacija moja inspiracija) — Mon, 04 Jul 2011 00:01:00 +0200

Višnje san opra i meka i u čiste caklenke...doda san u manje caklenke po tri a u veče po četiri kučarina cukra...prilija san sa limončelon i to sad gre na sunce da dobije svoje...nek višnja pusti boju i sok a ka prođe lito onda je gotovo pa se sve onda skupa lipo promiša...ovo ču dodavat gelatu a i popit če se koji bičerin...

češnjak iz moga vrtla...

studiokonoba@yahoo.com (dalmacija moja inspiracija) — Fri, 08 Jul 2011 20:44:00 +0200

Lani san dobije od jedneg čovika dvi glavica češnjaka reka mi je da je to likarija, moran mu virovat jerbo i on voli domače staro sime... a kakvi če bit češnjak, hm, povirova san i zaboja ga u zemju...neznan oče li mu odgovarat zemja ali sad vidin da se nisan privarija...lipe glavice da je divota...obeča san dat sestri jednu glavicu pa neka ga i ona daje sadi...a od nje ču dobit par lipi pomidora tako da če bit verdure koja liči na verduru i koja ka je skuvaš oli zagrizeš je onako iskonska ka ča je prije bila...malo pomalo skupjan staro sime koje onda u mome zimskem vrtlu sijen...znan da je ovo borba Davida i Golijata ali nima veze ovo i onako nije za prodaju vengo za nas i ka mi dođu dica...eno se lagano suši zimskeme vrtlu...ola koji če to gušti bit...

orahovica...

studiokonoba@yahoo.com (dalmacija moja inspiracija) — Tue, 21 Jun 2011 22:45:00 +0200

Uvik san govorija da nas je teško razumit, nas ovod u Dalmaciji, ma volima svoju verduru, volima napravit vino za se, volima činit vino za drugu potribu, a tek domače i to svoje maslinevo uje e svitu moj to uje je obaveza svakega ko jemo jedno par stotin metri zemje...a onda lipa tradicija ka se krajen promaliča u Dalmaciji pravi liker o'orija oli ti orahovica...vazmu se lipi oriji pa se dobro operu...onda se u starovinske caklenke...a ove na litratima su od moje matere...sičan se da je u nji držala kukumare, paprike babure i u malo manje caklenke pekmez o'šljiva ajme koji su to gušti bili na bokun vručega kruva od našega pekara Svetine iz Senjske kale u Splitu ka prvo namazat masla koji bi se raskrabija a onda iz velega caklenoga pota gustega pekmeza o'šljiva...i onda zagrizeš, ajme koja je to sinfonija u justima ma ludilo svitu moj, da nostalgija, ajme...ka je mater pravila pekmez onda bi sve kuvala u jednem velome loncu a znalo se dogodit da bi se u loncu pravili mijuri i onda sve leti po stropa...a pape bi beštima da če ga jopet tribat pituravat...još mi se te slike vračaju unazad...koja su to bila vrimena...ma di san ono sta...aaaa, caklenke...dobro gremo daje...caklenke napunin sa opranin orijima pa dodan rakiju, ja na litru lozovače meknen kvarat kila cukra...a gori umisto pokriva meknen perkament kartu i laštrik...i onda se to ostavi na sunce, kako bi naš svit reka jedno 40 sunčani dan i to van je to...samo sve to još triba procidit i onda ka zimi dođe familija oli amiki u vižitu lipo se orahovica servira u bičerine...i uz to pijadela napolitanki...

buffet kod bunara...kaštel sućurac...

studiokonoba@yahoo.com (dalmacija moja inspiracija) — Fri, 29 Apr 2011 21:51:00 +0200

Nije da san ovod svaku šetimanu ali volin navratit na lipu domaču spizu. Ovaki ugostitejski objekti su prava blagodat za naš turizam nima tu puno filozofiranja ni pomodarstva, nima tu falše pizze od koje te zaboli štumik, nima tu šminke sve je onako ka da je doma mater skuvala, eto svi moji prijateji a velika večina su furešti, svi oni guštaju u njiovoj spizi...samo tako daje a ovo nek bude mala reklama za ovu kvalitetnu butigu o'spize...nek van litrati govore...naša pašticada je bila samo taka, konpliment kuvarici i oneme veselome čoviku u posluzi...razumidu se u svoj posal, neka i vlasnik čuva ka zjenicu oka, samo tako če ta butiga ič naprid, pokazalo se da je investiranje u dobar personal najboja investicija...a ono crno vino bi lako moglo bit od Matele...bravo...malo san čirija okolo, vidin da se i janjci peku i da se pravi peka a i ona gomila drva je dokaz, o temu ču pisat drugi put...na brinite mi čemo jopet navratit..

ajme ča je lipo...riba s'gradela...

studiokonoba@yahoo.com (dalmacija moja inspiracija) — Wed, 06 Apr 2011 00:01:00 +0200

Cili san dan lavura u đardinu...otkad je granilo prolitnje sunce jema travurine ka u prići ma vaja je ostrić i da bude sprema za litnje šufigavanje...ma tama san sve sredija i malo otpoćinija kad mi zazvoni mobitel...jesi li obidva, pita ženski glas sa duge bande...ma koji obid evo san sija da malo odmorin noge i ruke jerbo mi je ova makinja ipak malo teža da se deboto osan100m2 ostriže...a tija san isfrigat dva jaja i skuvat malo blitve...ajde onda ka si gotov zaboravi na jaja i blitvu pa dođi na obid, ma oni moj i dica su mi javili da su ništo ulovili da čemo bacit na gradela...a meni krivo ma diču sad jist ribu i to frišku da ne more bit friškija...ali san se nikako da nagovorit i krenija san prima Okruku...ostalo je povjest...

ajme ča je lipo...fritada o'šparog...

studiokonoba@yahoo.com (dalmacija moja inspiracija) — Tue, 29 Mar 2011 23:01:00 +0200

Malo sunca, malo kiše ma vrime je samo tako...a pravi je stađun o'šparog...iskoristija san ovo lipo vrime i napravija đir po okolnin brdima...nek mi pučani naši gradova oproste ali ja in jopet govorin...ma ko more ovo platit...izač iz kuće i eto me u prirodi...digitalac u ruku i onda lagana šetnja...dikod koja šparoga, dikod koji cvit, dikod koja lokvica o'zanje kiše...odmorija san dušu, mozak san da na pašu i napunija beterije...i sad gren doma...iza kuće san ubra struk rukole, kruv je integralni doma ispečen a vino je doli u konobi, još uvik lijen iz livega suda to van je berba dvi ijade 9ta...a dvi ijade 10ta nek još malo zrije...nakriža san nikoliko feta kobasice...malo san i na tavi raskrabija...temu san doda tri jaja sa malo mlika koje je prvo Nadalina razmutila...ajme...doda san malo narizana češnjaka...i priko jaja rasporedija vrje šparoga... sve san zalija sa malo uja, da se razumimo...našega maslineva...tavu san meka u ugrijanu pećnicu i fritada je bila gotova...ostali su samo gušti...a kakva je bila 2008me godine pogledajte ovod...

zimski gušti...mandarinčelo...

studiokonoba@yahoo.com (dalmacija moja inspiracija) — Sat, 19 Mar 2011 00:01:00 +0100

Prije dva miseca san meka kore o'mandarin u lozu da se točaju i sa je doša moment da to procidin i napravin mandarinčelo...napravija san jedno 3 litre...rastopija san malo više o po kila cura i pomiša u ono prociđeno...malo san kušava i ostavija san na malo više od po kila cukra nek ne bude puno slako ma ovako mi je dražje...eto sve san pritočija u šesne botije koje skupjan a ove su bile o'whiskyja...i to van je to a ovod je link za pripremu koju san polovicon prvega miseca činija...

zimski gušti...malo vatre, malo spize, malo vina, malo pisme...

studiokonoba@yahoo.com (dalmacija moja inspiracija) — Sat, 26 Feb 2011 19:24:00 +0100

nakon ovi ladni dana nima ništa lipšega vengo se nač okolo kamina i
bacit čagod na gradela...ništo san pritaka vino i muva se u konobi a onda san iša kod susida di se skupila ekipa...prvo smo kušali novu
travaricu sa malo rute, malo koromača, malo smričke...lipo je lizla niz
grlo...onda je amiko meka na gradela bržole o'vrata ...našlo se i kruva
kojega smo malo bacili na gradela..mlada kapula je iz vrtla...a uje
o'oblice i to od
ove godine...jilo se, pilo se, čakulavalo se i načeli smo par aktualni
tema ali o temu nebi ovod...da mi ne prisano ona lipa spiza...dok se
meso peklo susid je izriza malo pancete...a ova friška sa litrata nek gori
visi da se još malo nadimi...na kraju smo otvorili i ovu bočicu Tokaja...lipo
nan je lega...eto svitu moj nije da nan je loše iako bi moglo bit
boje...ali nima veze sve nan je ovo naša sudbina dala...

zimski gušti...i lagani obid...

studiokonoba@yahoo.com (dalmacija moja inspiracija) — Sat, 19 Feb 2011 00:01:00 +0100

u vrtlu je posla napritek, debje grane rižen i slažen za ložit...tanje za gradela...lišće gre na kompost...a kompost mi je pun puncat...ove godine su promrzli mandarine i limuni...ali nima veze bilo je fruta na pritek...uvatija san se gratanja stare piture u bazenu triba ga svake dvi godine pituravat...za guštat triba i lavurat...jema cila šetimena da je loza obrizana...a bršjan triba ukrotit debote okolo cile parcele raste tako da se stvorila intima...mrzle grane od agruma ču u treči misec rizat, nek sad ostane ovako...puno tega u đardinu je zimzeleno tako da kod nas nima zimske depresije...eno vidin da je mendula napupala još malo pa če bacit cvit...i dok ja sve na tanane sređujen došlo je vrime i o'obida...dvi salate iz vrtla na sitno...bokun pečenega batka o tuke na bokuniče...jedna balancana na sitno...kozji sir na bokuniče...kapula i to crvena...pomidore brez kore na sitno...češnjak na sitno...sve to osin salate pofrigan...dodan maslineva uja, malo kvasine, par kapi naše nektar kvasine, kučarin gratanega sira,i jedna žlica majoneze...sve to dobro promišan ostavin da se malo oladi ali da ostane teplo i onda pomišan sa salaton...sol i papar onoliko koliko triba...kruv san malo popržija vino je iz livega suda i to van je to...kripno, zdravo i svega pomalo...promaliće more počet...