Dalmacija moja inspiracija

Južna banda Čiova...mir...uvala do uvale...razbacani škoji...livo je Brač desno je Šolta...sprida Fumija...ladanje i guštanje...raj na zemji...na kaže se za ništa ovod kod nas u Dalmaciji...ko more ovo platit...

Ajme kako nan je lipo bilo, odoma bi ponili dobre spize, par botija vina, šugamane i onda pravac južna banda Čiova...stol, katrige i ležajke smo ostavjali doli šoto u onu kapunjeru zajedno sa nikin alatima...a na teracu o kapunjere je bilo ladanje uz dobru spizu i vino...ma kakvo je tamo bilo banjanje...a tek more Jadransko, ma tako bistro čovik bi ga pija, pa onda lagani obid, nakon obida vaja ubit oko ispod bora, pižolet da ne more bit boji, pogotovo ka te meštral ladi a valovi i cvrčci pivaju svoju pismu...nakon pižoleta malo lavure okolo maslina a da ne govorin njegovanje perunike, ružmarina, kaduje, lavande, mirte, buhača, kaktusa i još puno tega...napravija san i male putejke da se more prošetat a sve okolo je priroda sama gospodarila...a sa mojon ekipon smo doli uz more igrali na balote tamo di su ona neizgorena vrata prima škrapama, a zemja je bila ravna ka caklo...u škrape san posadija ovo lipo cviće, ma ludilo svitu moj...sve dok nije jednega dana piroman po največoj buri sve užga...ijade i ijade kvadrati je izgorilo, to je bilo jema dva lita i sad je došlo vrime da suvi bori počimaju padat na tle, svi putejci su sad neprohodni a ovo je tek početak, kako če bit nakon ovega lita to vaja doživit...pošto niko ništa ne riže oli uređuje neće proč dugo vrimena i sve če zarest u draču...a nama vrime gre, definitivno smo pristali ič tamo, ostaje nan samo oli prodat oli ostavit dici, sve mi se čini da če bit ono prvo...

kako smo lipo znali guštat u debeloj ladovini...sve dok piroman nije sve zapalija...gotovo je sa guštima doma iza kuće su mi mladice od maslina u pitarima...prvo vaja posić bore, iskopat rupe, pognjojit i posadit masline...svemu dođe kraj ali je u nečemu i početak...iako postoji i rezervna opcija a to je sve prodat i zaboravit...ma morete zamislit, ja san svoju parcelu očistija a oko mene če još godinama bit osušeni borevi...neznano kako daje moramo još razmislit...