Dalmacija moja inspiracija

Svaka zemja štuje svoje običaje a Olandežima je jedan od najdraži dana u godini Dan Kraljice evo van ovod kako je to lani bilo u Amsterdamu...svakega 30toga travnja u godini je posebnin dekretom Kraljice dato na znanje da se ti dan more trgovat sa svin i svačin i to na ulicama, trgovima i na to označenin mistima brez plačanja poreza,...ti dan je cili puk obučen u narančasto a ovo trgovanje se više manje svodi na one stvari koje su nan po šufitima i šupama...a najviše su to igračke i sve ono ča se dupera u potrošačkome društvu i bilo nan je žaj bacit i ča...ustvari sve se te stvari oti dan pribacuju iz jednega šufita u drugi i to za niku sitnu lovu, bitno je da je fešta i to van bude velika fešta...znaju se Olanđani feštavat...to van je slično kad Oranje igra balun u finalu kojega prvenstva svi poludidu a svi znamo u balunu su stvarno vrhunski...mi smo u Beču kod čere pa smo se zaletili da Internacionalne skule Dunav tu jemaju lipi unutrašnji đardin di se sve to organiziralo...bilo je puno starovinski igrica za dicu ka ča je "meknit ruke na leđa i onda s'konopa jist kolač", pa "balunima gađat princa i princezu naslikanu na važima", " trčanje u vričama", "trčeči nosit kunpir na žlici" a jedan se bračni par priobuka u "princa i princazu" tako da je bilo puno humora i puno smija...a ovako su Olandeški expat - i to organizirali evo van pa malo pogledajte, a nama, nama je bilo lipo...

Ovo cablo od maruna je prije nikoliko godin prileglo na tle...bilo je to nakon jednega nevrimena...iz Grada su odlučili nek ostane ovaki ka ča je...malo su mu žile izašle vanka ali sve ostalo radi ka sat...one grane ča su na tlevu su se ožilile...nima tega vitra koji mu more naškodit...a dica gušteju jerbo se mogu pentrat a meni je upa u oko...evo van ga ovod...

Vrime je lipo sunce grije i nima vitra onda gremo malo u šetnju Amsterdamom, dok moja boja polovica gre u šoping da kupi koju krpicu ja san po običaju malo litrava tako da je ovod svega pomalo...ovi brod kojega su lipo preuredili za stanovanje na konalima je ludilo...unutra je cili konfort a pošto nima valova nima ni ginganja...evo ovega kako ga ovod vidite, ako bi ga tili oli ako bi ikad bija na prodaju, onda bi tribalo isprsit jedno 400 ijada euriča a i to mi se pari malo to san ovako samo bubnija...a ove daleko istočnjačke mirisne štapiče vaja zapalit pa onda pustit da tinjaju i puščaju lipi ugodni dim...od muska, jasmina, opijuma, bora pa do kanabisa jema svega...ne svitu moj, nije van ovo za bit high ovo je samo za nos i ugođaj tako da cila soba lipo zavonja i napuni se miomirisima...uvik ponesen nikoliko pakovanja doma u Trogir za guštat u lipin dugin litnjin večerima...Amsterdam stimulira svoj puk de se sprid kuća na pločniku meknu pitari sa zelenilom i cvićem a na konale su usidreni mali eko otoci di patke i duge tice mogu u miru obitavat...ovi lift mi se svidija dok je Ona šopingirala ja san ga ovako uvatija...a ni nosač za nože, je da je malo morbidan, ali je ipak OK...eto na kraju san još uspija kupit očale i dvi lipe maice za na lito, eto ja san skoro pa gotov lito more počet...