Dalmacija moja inspiracija

Natkrivena teraca sa stolon i katrigama, ležajke za ladanje a okolo puno igračaka, čizme za igranje po travici, lopatice i karijole sve je prisutno za bezbrižno ditinjstvo...oko kuče se klinci vozidu bičikletan. Naša tri unuka Mačak, Galeb i Cipal su ovdašnji dil Dalmacije i to škoja, zraka i mora. Posteja starijega je bila od naše čere i sad Mačak gušta u njoj. Vidit čemo kako če bit idilično kad pane snig, nadan se da če ga za Božić bit do kolina za prave zimske gušte. A na promaliče, Trogir ni daleko jema jedno sedan uri vožnje, oli oni kod nas, oli mi kod njih, život je kratak da bi čovik sidija na jedno misto.

Naš izlazak u centar Beča smo vajali tako organizirat da nan sa dvoje dice bude praktičnije i da ne gubimo vrime...a to znači parking ispod Opere...cinu parkinga van neču spominjat...i onda odma iza Opere je otel Sacher...sve su to kultna mista a iza kantuna je Kaffe Haus Mozart...

tu smo vazeli Turske kavice i poili lipe pašte ja san poija kremu od čikolate, supruga tortu od trišanja a čer je vazela špagete od maruna u čikoladnoj košarici...

da usri Beča Turska kava a kod nas u "civiliziraneme" dilu Balkana je više čovik vanka ne more popit, osin doma...žalosno da žalosnije ne more bit...primitivizam od najgore vrste...ali nima veze ionako nismo nikad imali mota za unovčit sve ono oko nas još je i dobro kako je moglo bit...

cine u Mozarta su kako i mirita u temu dilu Beča...evo van pa pogledajte...

Zove prija iz Okruka ajmo na kavu i na laganu điradu priko Okruškoga lungo mara...našli smo se u Flash Back rupa je samo taka jema lipe foteje, pa šesni štekat a na žalu dikog koja ležajka a pogled ka u priči...evo se i mi spremamo na Euro điradu prvo malo do Beča posjetit naša tri unuka pa onda u Amsterdam kod unuke...Okruška prija če navratit u studenome u Amsterdam na jedan joint...ha,ha, ma šalin se...više čemo se bavit Rembrantom, Mondrianon i Van Goghom...ali prije đirade vaja naš đardin pripremit za jesen i zimu...tako da na promaliće sve opet bude u cvatu...evo san sam sebi reka neču više pisat o negativnostima...samo pozitivizam...pa dok dura...je da je čisti egoizam ali eto i ja nisan imun od tega...