Dalmacija moja inspiracija

Ka smo po europskin buvjacima uvik gledamo bili našli čagod iz prohujali vrimena ča bi nan moglo koristit u našeme hedonističkeme životu...svak jema svoj hobi a naš je kuvuckanje, vino, verdura i spravjanje svega ča nan more bit lipo na pijatu, ča reste u našem đardinu i na okolnin brdima okolo naše kuće...ovi put smo kupili lipe stvari u butigi Nirs u Splitu a meni se osobito sviđaju ovi domači bocuni...ka nan dođu gosti onda se svak sa svojin bocunon spusti šoto u konobu...popije se aperitiv i onda se vračamo sa punin bocunima...a ovi donji litrati su van šesne stvari sa buvjaka u Amsterdamu...

svakega ponedijka je ovi buvjak u amsterdamu...vazmemo bičiklete i mažinavanje traje jedno kvarat od ure...malo lunjamo popije se kavica a i nađe se čagod i za kupit...evo gledan ove kristalne čaše...cina mi je malo veča nego bi i tija platit...ma biće još čaša...ovi libri su mi interesantni...vidin da ovod jema i štivo i za nostalgičare...a i lipe longplayke su u điru...bilo nan je po voji, gremo doma otvorit bočicu zinfandela oli crljenka a umisto kristalni čaš duperamo ove obične...mendule su nan pri ruci...jedan lipi dan...

Vrime je lipo, žena i ja smo vazeli bičiklete pa onda do Amsterdama do buvjaka u Jordan kvartu, to nan je jedno osamnajst ajmo reč devetnajst kilometri tamo i toliko nazad.

Ma na buvjaku se uvik nađe čagod za duperat u kužini.

Gledan ove posrebrene perune i žlice a i ove pošade su mi drage ma samo san i malo opipa i gremo daje. Kupija san jednu starovinsku pijadelu od porculana. A žena mi je još našla jednu lipu crnu maicu dugi rukava, ona je bila nova novcata, ha,ha.

Nakon jedno desetek minuti điravanja čujen da me niko zove.

Kad tamo monsieur Martin sa suprugom, ma di vi dvoje ovod oli niste u svojoj kuči u Francuskoj a on meni a vi oli vi niste u Trogiru, a jemamo oboje prav.

Znamo se deboto dvajstipet godin oni su prodali butigu o monturi i kuču u NL i u Francuskoj započeli table d'hote oli po naši iznajmjuju fureštima dvi male kučice na svome velome imanju uz rijeku. A kad su ovod u NL onda su u svojoj vikendici. Život gre daje, nakon buvjaka i piča u kroegu (olandski za kafić) smo se dogovorili da dođedu na večeru da se malo pročakulamo i dogovorimo kad če oni do Trogira a mi do Francuske.

cooking classes and cooking tours in croatia

culinary croatia

luxury croatian villas