Dalmacija moja inspiracija

Kvragu i klima i koje ovako namistija, prije nikoliko godin smo ostavjali limune na cablu i kad bi nan tribalo limuna za štrukavat onda bi ubrali onoliko koliko bi tili duperat ostalo bi reslo daje tako de je duralo po cilu zimu...a sa su došla nika druga vrimena sve je popizdilo...čitan prognozu vrimena, biče leda temperatura če se kalat ispod nule a usput če i olujna bura punit...onda znan ča mi je za činit, nima druge vengo pobrat limune i napravit sirup...to je bilo ove zime i sad je došlo vrime za to...ma nije samo sirup usput san napravija i limuncelo ali o temu drugi put...ajmo onda ovako, ovo limuna ča vidite to je jušto za jedno pet šest litri sirupa...sve san štruka a košpice sa bacija ča...a u sok san doda dva i po kila cukra...dobro promiša da vas cukar bude raskrabjen...navisija san sok do temperature od 80 gradi, čer nan je poklonila ovi lipi termometar za mirenje temperature spize a tu temeperaturu sirupa vaja postič da se vitamini sačuvaju...boce san opra a ove čepe na zavidavenje san iskuvava jedno desetak minuti...kacijolon san priko livka nalija sirup u boce i onda san i sa onin steriliziranin čepon zatvorija...odma san i polega i to van je to...ola če če unuci i unuka guštat...ma ko more ovo platit...svitu moj neprskani limuni, ma ne samo neprskani me još in dodajen samo stajskega gnjoja...a dica zdrava da ne mogu bit zdravija...ajme...

evo van ovod par poklona koji san naša ispod bora...ovi pijati i čikare od tete els iz nizozemske za naše unuke su mi posebno dragi...a doručak je bija jednostavan, integralni kruv sa sjemenkama od suncokreta malo sira i salama...ma vidite ovega kolača kojega je čer ispekla on se jide u vrime od božiča do nove...

a ovod su moji pokloni, termometar za mirenje temperature spize tekučega cukra i sl...a i ovi termometar desno doli je za obisit u pečnicu nadaje čer je od naših šipaka napravila đem a kupila mi je lipi đem od dunja...austrijski cukar u kockama se more duperat za tursku kavicu...ovi bruškin je od rostfraja a ona gamela je za pinit mliko i bilanjak...a sasvin desno je posuda sa siton za posut kakao koji duperan za makijato...

jesen je stigla...i ca je najveci gust vengo ispec marune...onda ovako...sa brtulinom ih malo izrizen i onda stavin u tavu...misajuci sa tavon pecen i sa svi strana...da bi zna kad su gotovi uzmen perun i zaboden u jedan marun taman onod di san brtulinon zariza...ako perun meko ulazi onda je gotovo...skida se juska i onda jide...a more i ovako...ocistin od juske i onda i vratin u tavu i na laganoj vatri misajuci dodan cukra da se lagano karamelizira...kad se cukar rastopi pospen sa mlivenin mendulama i daje misan...to van je malo slako pa onda malo kripno...taman za ove tmurne dane...a more se popit i koji bicerin...