Dalmacija moja inspiracija

Južna banda Čiova...mir...uvala do uvale...razbacani škoji...livo je Brač desno je Šolta...sprida Fumija...ladanje i guštanje...raj na zemji...na kaže se za ništa ovod kod nas u Dalmaciji...ko more ovo platit...

ko more platit ovo vrime o'blagdana jučer san bija kod matere u Split i odnija jon litru novega uja, malo vina, lipe čikolatne bonbone, par kili mandarina...i cvića u pitaru...malo smo pročakulali i onda san se vratija doma jerbo mi čer zet i tri unuka dolazidu na blagdanske ferije...kuća je puna smija i veseja, ostavija san na cablima desetak kili mandarina da i dica mogu ubrat a ne da po skuli govoridu da mandarine dolaze iz butige...vaja i odmalena učit da i mogu sami obrat, povonjat i jist...čer je donila par sitnica, ona uvik nađe čagod da mogu duperavat u kužini...tako i ja njoj, uvik se daju pokloni koji su prikladni za kužinavanje...ove silikonske povezice su taman za vezivat rolade oli za velike sarme...a ova gratakaža je za čikolatu...botija sa live bande je sedan godin stari vinjak koji je leža u rastovin bačvan...pičemo ga na male bičerine, kako i mirita...zet se igra sa sinovima, gradidu eroplane i rokete od lego kockica...ja san iza computera a ženske su se uvatila peć kolače ovi kuglof je od brusnica, orija, mendula, suvica i lipin kandiranin voćem, već smo ga načeli jutros uz kavicu...ludilo...a ja san jutros meka srnetinu u pac a o temu kako nan je bilo ču drugi put...

ma vrime se potrefilo samo tako, lipe večeri punega miseca taman ka naručeno za poč na ribe...išli smo sa snažnin ribarskin brodon kojega moremo duperevet a vlasništvo je od jednega poznatega domačega pivača, evo van malo mota pa pokušajte saznat ko je...puno lipo piva, voli poist i popit, piše pisme i konponira za se i za druge...malo je linčina ali profesionalno odradi svoje turneje...eto to van je sve, neču daje pisat a i nemojte me pitat ko je ionako van neču reč...i tako mi, amiko i ja, smo se uvatili ribarenja...saruni, lokarde, ušate, lignje, palamide, skočci...ma svega je bilo, ajme koji su to gušti poist skočca na lešo sa malo maslineva uja i rukole iz vrtla...a kruv je bija raženi i lipo smo ga močili u uje i ostatke lešade...vino je iz livega suda godina 2008ma...evo zvali su da če snig u unutrašnjosti e ka je tako onda san za dišpet posadije ovu bananu u naš đardin...a malo daje od banane van je ovo cviće...ma koja zima Dalmacija još cvita...a sad ču meknit nikoliko litrati, to je za ove gori ča se smrzaju...