Dalmacija moja inspiracija

Ustvari mi je največi gušt kad mi se čagod jide poč u kužinu i otvorit frigo...i onda od onega ča je unutra napravit lunch...evo ovod jema intergralnega kruva i tri vrste sira...friški ovčji, mladi kozji i francuski brie...ovi brie je posebni gušt on vonja na smrdjive bičve eto tako bi ga opisa...to je ludilo od sira pogotovo kad ga se po ure prije klope izvadi vanka...ove sjemenke od tikvice san malo popržija zajedno sa ovon tankon panceton...priko tega san doda friškega vlasca i to je to...malo vina talijanca iz Abruzza priko puta Dalmacije je bilo taman...

Davno je to bilo polovicon 70seti godin onega vika radija san u oveme lipome restoranu...moj ondašnji kolega je u temu restoranu kasnije dugo godina bija diretur...put od maloga od kužine pa do diretura nije bija lak ali svaka mu čast...a vlasnik restorana je bija jedan veli koncern...dok san ja krajen 70seti poša u poduzetničke vode...naše  prijatejstvo je ostalo i nađemo se par puta godišnje malo zalogajit, otvorit koju bočicu i o gušta je popit, a pogotovo puno se napričat...ma bija je on i u Trogiru i Splitu...jila se lipa riba, škojke, janjetina ispod peke, pogotovo kod Đanga u uvali Duga...ovon prilikon san za predjelo pripremija male zalogajčiče moremo i nazvat canapei, tapas, kako ko oče...a jili su se frigani klobuci od gljive sa mladin kozjin sirem i kaparima, marinirane gljive na štapici sa češnjakom, frigane balancane sa tanko rizanon pancetom, frigana tikvica sa pršutom, chorizo sa maslinama, onda i ova italijanska spinatta romana sa basilikom i kozjin sirem, a nakon tega je bija rižot od kozica i lososa...a na stolu se još naša i integralni kruv sa namazon od mekega ovčjega sira zalivenega sa maslinovin ujen...par mendula i zdilica maslina...amiko triba lavurat još koju godinu pa če i on u ladovinu...

Za ovo mi triba jedan veliki wok, maslinovo uje, pršut na sitno, šaka orija, četiri suve pome, paprika iz tegle malo na kiselo, paksoi to bi bilo ka naša blitva smo ča jema malo debje korjenje, angriz i to dugega zrna iz tajlanda, selen na grezo, dva režnjiča češnjaka...onda ovako pršut raskrabin na uju i nek malo bude isfrigan, dodan skuvani angriz i onda selen, ćešnjak, papriku, pome, dobro mišan, dodan orije, angriz san skuva a'dente a paksoi san pet minuti na pari spravija isto tako a'dente, sve dobro mišan, dodan jednu žlicu badjaka i sve promišan...i to je sve pili smo ovo Španjolsko vino i mogu van reč da je pala cila botija...za dezert san napravija Niskozemski specijalitet Haagse Bluf ...evo van riceta...100  grama cukra u prahu, dva bilanjka i 20 cl soka od ribizla navedeno se mekne u čistu zdilu i desetak minuti nek se miša kad ne stvrdne da se zdila more okrenit naopako a da Bluf ne ispane...onda je gotovo...servirat sa tzv. dugin prstima, kolačići malo zacukreni...eto...