Dalmacija moja inspiracija

Sad kad smo penšjunati pomalo se minjaju i navike obidvavanja i večeravanja...ova mišanca o spize nan je tako lipo legla pa bi je tija podilit sa vama...balancana je posojena i ostavija san je da izađe voda...sa karton o'kužine san pospuga vodu i onda balancene isfriga na maslinevu uju...priko tega nasickanega češnjaka i jedno dva tri zavrtnja papra...ova salata sa malo pofriganin pinjolima je pravo ludilo...a makaruni sa šašon od poma su taman a'dente i još priko tega gratanega sira...lipe pome i bokuniči grčkega sira feta a tek ovi špageti sa kozicama e to mogu jist svaki dan...mišana salata sa dosta rukole...i svudi je lipo iskrižana crvena kapula...par kapi kvasine i malo maslineva uja za začinit i to je sve...par feta kruva i dva deca vina po glavi ovi zinfandel nan je lipo lega a našlo se i rosea eto sa time smo ovi obid zaokružili...vrimena su se prominila sad se jide manje masnoče i sve više verdure...a kad mi zimski vrtal bude sređen onda če bit verdure po cilu godinu...

Meni su največi gušti napravit đir po pazaru, ovod u Amsterdamu i jema u svakome kvartu ali mi je Albert Cuijp najdraži...krajen sedandeseti godin onega vika san zajedno sa mojin kompama M. i N. vodija restorane Sarajevo i Kaštelet...Sarajevo je bilo jedno po kilometra od pazara a Kaštelet je bija jedno sto metri od pazara...pravit spizu i nabavjat frišku verduru je bila svakodnevna fatura...ma koju smo samo ribu i ostale morske delicije ovod kupovali, to je za nevirovat...ništa se na pazaru nije prominilo sve je ka i prije...evo van malo litrati pa pogledajte koje su cine i koja je ponuda...pazar je svaki dan osin nedije, ponuda povrča je izvrsna a posebno moran spomenit...škojke, jastoge, škampe, kozice i razne vrste ribe, ajme divote...ovod na pazaru se mogu nabavit i friške začinske trave origano, kaduja, koromač, mažuran, timijan i da daje ne nabrajan...svudi je šušur i multikulturalnost tako da se moremo lipo opustit, eto svitu moj ovod su van litrati...samo bi tija napomenit da su ove šparoge na prveme litratu jedan euro za mac...a na pazaru u Splitu tražidu 20 kunića za mac...ma koje ovod lud...

Nemojte me sad napadat da san iša lovit mlade pizdice ma nije istina bile su zalipjene uz ove starije tako da san i napose spravja...potrefilo se par komada po glavi tama za umočit malo kruva i popit žmul vina...onda ovako, malo češnjaka na sitno, selana i petrisimula o'lista narizano, malo izgratanega baškotina, list lovora i grančica ružmarina i dva zavrtja papra iz mlina pinkica soli...dec bilega vina i mini pizdice...sve skupa jedno pet minuti i to je to...ovo je bilo predjelo ali se zato poilo jedno desetak feta kruva...hmmmm, ke gušti...a za de luxe odmor hm, ovod je pravo misto...