Dalmacija moja inspiracija

Odavna san tija napravit jednu lipu bibitu od grozja, voča i dalmatinski mirišjavi trava i bobica...onda ovako vazeja san ovu demejanu...i u demejanu san meka slijedeče delicije...dva kila grozja na bokuniće...tri mandarine neprskane, dabome, zajedno sa koron...desetak listova o'limuna na sitno rizano...dvi, tri grančice sa listovima o'pelina...šaku lističa o'mente...desetak suvih smokava...jedno šest rogača...sve san to nariza na sitno da more proč kroz grlo od demejane...onda po kila cukra...desetak bobica o'smrički...litru lozovače i litru crnega vina...sve san dobro promučka i pokrija sa plastičnon folijon i ostavija san da zrije...nakon par miseci ču dodat još jedno četiri litre vina onda procidit i to van je to...a kad dođe ekipa vazmu se bičerini i domači kolači koji su na pijadeli...i onda počimaju gušti ma diš lipjega dana oli večeri...

eto nakon pečenja rakije je doša red na branje maslina...lipe masline, stare su sto i olala godin...domače oblice, ma lipota od cabala, šest stari dama u redu...lipo su se kraj kuće poredele ka prave lipotice, liti je ispod nji duboka ladovina zimi je burobran a i kući daju pravi dalmatinski mot...iza kuće jeman posađene mlade ma jušto deset cabala, lani su prvi puta dale plod a ove godine je bilo pet šest kili maslin...a u đardinu isprid kuće jaman još šest ali te če malo počekat...tek san i posadija...ove godine je urod odličan, bude li sriče uvatit čemo jedno dvadesetak litri uja...eto, vino u konobi zrije, rakija je ispečena, kruv je itegralni a sol je sa Paga i to krupna a uje je tu dok če se inčuna i kapara nač...gušti mogu počet...

lipo je vrime i lito je vilovito...navratili su nan prijateji malo ubit vrime a i malo pročakulat...bome vajalo je i čagod zalogajit...ja san otvorija frižider i meka na stol svega pomalo...našlo se integralnega kruva kojega san malo popržija...bilo je i janječega pastramija, polutvrdega sira i to ovčjega, pečena paprika iz staklenke...kapari, maslina, pomidora, nasickanega bosiljka, par kapi maslineva uja i malo kvasine to nan je bilo taman...popili smo ladnega Zinfandela rose...eto i ovi smo dan nikako progurali...