Dalmacija moja inspiracija

Ma nebi ovod pisa u temu da je prije turizam bija boji i da je bilo više furešti to je tako bilo i vaja se okrenit budučnosti, ja bi se ošerva na današnje vrime, eto u Novome se vididu konture novega otele i to na oneme mistu di je bila vinarija, ma jeman špurju da če ovi otel bit motor zamašnjak koji če pokrenit i druge investicije...a i grad bi triba sve to pratit i pripoznat napore investitora pa napravit kaštelanska mista po miri našega čovika i po miri naši gostiju...mi dvoje smo se ove nedije malo prošetali kroz Kaštela, svitu moj ovake idile i ugođaje nima nidi na Jadranu a ovako dugi lungo mare jema samo Opatijska rivijera ali mi se ipak pari da je naš Kaštelanski lungo mare duži i pitomiji...ma nek su u Opatiji njezine vile mi jemamo naše kamene vile a nađe se i šesni oni pravi vila...u jedno lipoj vili u Starome je otvorena konoba Stari dvor... ma konoba ne more bit na bojeme mistu, zapadno prima selu jema nikoliko kafiča, butiga, đardin i lipa plaža, okolo judi fitavaju apartmane, istočnije je nažalost još uvik zatvoreni otel Palace...a isprid su plaže, zapadno in je ka prvi susid kamping...stvarno idealno misto za konobu...na teraci ti zastaje dah o lipega pogleda, još ka bi se grad pobrinija da isprid nima parkirenja onda bi bilo idealno misto za popit kavu, poist bokun mesa oli ribe i sve zalit žmulon vina...povirija san u kužinu i evo van na litratu kako se spravja pizza u originalnoj krušnoj peći, kako i mirita...divin se ovin judima koji su se uvatili ove lavure, virujte mi nije in lako, ali ja san siguran da se turizam pomalo vrača u Kaštela...mišjenja san da ne triba u Kaštelima puno minjat...sva srića da se nismo unakazili ka druga turistička mista, ma ovod sve odiše načinon života 60i godin onega vika a to je ono ča dobro platežni gosti vole, uteč od modernega života i vratit se u mala jednostavna mista i u miru pročitat one knjige koje su tili odavna pročitat...u Kaštelima ka prvo triba sredit kanalizaciju, onda zabranit liti vožnju auti uz more u popodnevne i večernje ure, vaja posadit puno cvića, piturat kuće, sredit okućnice...sve se to more ako se oće, pa malo dricat rive i dat šansu mlademe svitu da brez puno problema moredu otvorit raznorazne uslužne obrte kojima bi se turizam obogatija...još ka bi se u Kaštela doselilo jedno dvisto do tristo penšjunata iz EU-e oli sa kontinentalne Domovine, onda bi bilo šušura po cilu godinu...a Stari dvor je na kraju ove štorije lipo misto za doč i guštat...želin in sve najboje...dočemo jopet...

Nakon pusti điradi po Europi došlo je vrime da se malo opustima i da napravimo đir kroz Kaštela...oni su van kadena o'perla koji jemaju puno lipu ali i tužnu patinu...je da je patina na puno mista malo šporka, ali ipak su ta puno šesna mista ka prave uspavane lipotice...ma nebi ja ovod o onin problemima gori di je magistrala, oli di su radne zone, oli problemi sa legalizacijon...to je malo veći zalogaj, tu su da prostite, rezervni igrači iz Sabora na potezu...eto ja bi o Kaštelima doli uz more...svitu moj nebi i ja puno dricava ka če su druga razvikana turistička mista...nek se samo srede rive i popločaju kale...nek se mista boje čiste...Grad bi triba posadit više cvića i na puno mista meknit pitare sa lavandon i ružmarinon, a nek miščani stavidu pitare šparoga oli đirana isprid kuće u svojin kaletama...i ono malo zemje ispod drvoreda oplemenit i zabranit parkiranje pa tu posadit puno mediteranskega grmja...neka Grad sprovede akciju skidanja trnite sa krovova, pa ako triba i sa sankcijama, ali onda triba dat jedan prihvatjiv period za zgotovit...uvest dodatni porez na prazne stare kamene kuće i također na ne inkartane kuće...tribalo bi boje održavanje javnega mista...ka ča su mista di se ostavjaju škovace, oli je teško napravit šesni ograđeni prostor da se ti kontejneri ne vididu...i ti okoliš stalno čistit tako da se stvaraju ekološke navike, jerbo kad je ništo šporko onda je laške bacit škovace na tle nego kad je okoliš čist...kad bude u Novome gotov oni otel di je prije bila vinarija cilo če se misto priporodit, otel če bit motor razvoje jerbo se uvik uz take sadržaje lipidu i drugi sadržaji...onda triba napravit i ti Lungo mare do Divuja, eto time bi se Donja mista priporodila...Grad bi se triba konzultirat sa advokatima na koji način se mogu Tulipani i Moralići prisilit da započmu investirat...i vidit more li in se nabit poprilična komunalna globa oli tako ništo...Mašogradsku rivu podignit i sredit a vaja ovod napisat da i sad nakon onega cvića, cabal i šentadi je Mašogradska riva postala divota i lipo misto za obitavanje...Grad bi triba svake subote i nedije u godini zabranit vožnju autime i motorima po našin rivama a liti zabranit vožnju svaki dan i nek to bude nakon tri ure popodne do dvi ure u noć i eto nan perle sa pravin sjajem...Kaštela back to the sixty...jerbo smo jedna od zanji oaza živjena na Mediteranu ka ča je bilo 60seti godin a to nan je naš pravi BRAND to bi tribali unovčit...tribaju nan rive dobrega života, rive di nima buke, rive di se kvaliteta života digla, rive di če se vozit bičikleta, rive di se more u miru šetet, rive di su dica sigurna...i kalete di bi se liti prodava i pija Crljanak i to odma isprid konoba na bancima uz koju slanu srdelu...ajdemo svitu disu te grupe građana koje bi se uvatile progurat ove ideje, svaka grupa svoje misto, tako da se politici reče ča nan je na srcu. 

Posal dobro napreduje...vazeja san metlu i škovaceru pa malo sredija tavane...skupilo se tega materijala...ma šuta je ka u prići...evo je i drugi zid doša na red a ova buža u zidu če mi dobro doč u nju se more meknit čakod dekorativnega možda stari šumpreš oli koja starovinska vrčina a triban nabavit i jedan grezi pločasti bovan koji če taman stat u ovu bužu a ostavit ču sprida i malo korniža nek bude lipo za oko...malo san inspektira ove daske o'tavana ma nji bi najrađe sačuva...za sad san optimističan nidi nima crva ali inspekcija još nije gotova...ova vrata ču popravit štukat i piturat i ona če nan bit za u banj...evo san naša i ovu tavu za pečenje sirove kave...ma to van današnja mularija nima pojma kako su naše matere sa ovin "strojen" pržile kavu i stalno bi poviše vatre vrtile na onu crvenu ručku...a kava je bila sive boje i moga si je u butigu kupit i to refužo bila je jeftinija od pržene...ajme kako bi kuća lipo vonjala...a i stari ruzinavi mlinac za kavu je bija u jedneme kantunu na šufitu...evo van i jedan litrat Kaštil Sućurca a vanka vrime eto nikakvo ali i temu če doč kraj...