Dalmacija moja inspiracija

evo san ovod meka gabarite kućice...ka ča morete vidit prizemje jema široka vrata koja su ka o'konobe...sa vanjske bande ču meknit starovinska Dalmatinska puna vrata koja če se otvarat prima vanka...a unutra če doč caklena dvokrilna vrata pod kjuč, stin ča če jedna banda bit na kip...caklo če bit tamno tako da se more gledat vanka a da niko ništa ne more vidit unutra...a navečer če se pogled zatvorit koltrinama...u prizemju če cili zanji zid bit banj...livo u zanjeme kantunu tuškada onda bide pa kondut i onda lavandin i na desnome zidu od kućice prikladni ormarići...na desnu bandu zida od banja ispod skala ču ugradit klizna vrata da se ne izgubi korisni prostor...vrata več jeman naša san in na šufitu u jednome kantunu samo i vaja malo popravit štukat i piturat to su starovinska panelna vrata a u ovoj kućici su se duperala za zatvaranje šufita...ajmo onda daje, livo od ulaza če bit otvorena kužina tamo je i jedna mala ponistra ona če izvanka ostat isti gabarita ali ču zato unutra napravit jedan prag znači izvadit ču par vacada sve lipo poravnat meknit jedan šesni ravni bovan lipo fugirat i stvorit misto za mlinac o'papra, bocu uja, pletenicu bilega luka i slično...a ispod skal če bit misto za dvi rasklopne bičiklete za đirade kroz Kaštila i prostor za dvi katrige koje če se duperat vanka u kali...ispod skal če bit i jedna škancija sa tri daske a sa licen prima kužini di če se ostavjat pijati, teče i ostalo ča triba za kuvanje, ovod neče bit nikakvi viseči ormari...umisto viseči ormara meknit ču na kameni zid jedan poklon od moje setre...ma to van je po starovinski na jedneme "lancunu" napisano..."kuvarice kuvaj ručak fino pa češ dobit novaca za kino" oli tako ništo...to mi je mater kad san bija mali napisala i onda iglon i koncen vezla...ako ko od vas doma jema još tako ništo i tija bi se zaminit za par boca mojega vina nek se javi...eto to bi bilo za sad... 

moran priznat da nisan često na čiovskoj bandi o trogira...kavicu pijemo u gradu na teraci o

galijona tako da nan je vanka ruke...obično kad moja boja polovica gre kod frizerke onda gre sama...pošto se pripremamo za odlazak u NL tila je poč do nje...zato san ovi put i ja iša sa njon...dok je anita počela radit oko kose ja san umisto da čitan glosy novine o falšin celebritima prošeta kroz kalete...ima se ča vidit...kuče sa patinon šesni dvori i đardini...i nadasve tišina...ne vozidu auti oli motorini...mir gušti i lipota...ajde bilo je dosta nek van llitrati pričaju svoju štoriju...

finile su fešte.... triba malo protegnit noge...bonaca na moru...galebovi su lini sididu na konopima nima nidi ribari...ribarica je usidrena...a ono malo zimskega zvizdana grije da je milina...mora san napravit nikoliko litrati da zaustavin vrime...ajma meni več je četvrti u misecu...kad gledan ove kartuline pari mi se daje vrime stalo da nima korupcije...da nima lova na veprove...da je politika fiina gospoja...a onda me ona ubode lakton u bubrige i reče...gremo daje ča stalno sanjaš niki lipi svit oko sebe ko da nan ni dobro...onda se polako uputin za njon...gren ja i u sebi ništo brbjan...ma je nama je dobro...ali...ča setu more...gremo doma čagod pist i popit...bar smo oko tega svoj gospodari...