Dalmacija moja inspiracija

Izgubija san po godine na voj lavuri...prošlo lito mi je pukla ahilova tetiva i nakon operacije pa mirovanja san počeja sa rehabilitacijo...treniranje mišiča onda jačanje potkojenice eto par miseci san cota a još uvik nije sve kako triba...nima snage u desnoj potkojenici ali več sad se pentran po brdima jačan mišiče i sve gre na boje...svitu moj godine činidu svoje nisa ni ja više mlad ali eto nima više čekanja gremo u restauriranje...

nastavija san tamo di san prošlo lito sta...macu u jednu ruka a puntarol u drugu i onda lagano skidat stari inkarat...uostaleme nima priše nije mi o'glavu...evon van vod nikoliko litrati...počeja san tuč inkarat na šufitu tamo di je puno gareži o pustega kuvanja...malo puntarol, malo bruškin o'čelika i evo prvi rezultata...

U svako naše Dalmatinsko misto se mogu vidit lipe stare kamene kuće...jema i koje je zub vrimena izija a jema i oni koje su nadožuntavane sa betonon i bloketima...ma ne more se judima zamirit obiteji se šire triba in mista...najdraže su mi ove koje su prkosile vrimenu i ostale izvorne u ciloj svojoj lipoti...vaja i sačuvat od propasti...da je država pametna a nije onda bi tribalo davat obilate subvencije vlasnicima ovaki kuća da i mogu priuredit, održavat i prinit na nova pokoljenja...ma jema ništo ako su za turizam ali za samo stanovanje još ništa...bar ja ništa nisan naša...ko zna možda jednega dan u niko drugo vrime sa nikin drugin gospodarima naši života...za deluxe odmor povirite ovod...

Posal dobro napreduje...vazeja san metlu i škovaceru pa malo sredija tavane...skupilo se tega materijala...ma šuta je ka u prići...evo je i drugi zid doša na red a ova buža u zidu če mi dobro doč u nju se more meknit čakod dekorativnega možda stari šumpreš oli koja starovinska vrčina a triban nabavit i jedan grezi pločasti bovan koji če taman stat u ovu bužu a ostavit ču sprida i malo korniža nek bude lipo za oko...malo san inspektira ove daske o'tavana ma nji bi najrađe sačuva...za sad san optimističan nidi nima crva ali inspekcija još nije gotova...ova vrata ču popravit štukat i piturat i ona če nan bit za u banj...evo san naša i ovu tavu za pečenje sirove kave...ma to van današnja mularija nima pojma kako su naše matere sa ovin "strojen" pržile kavu i stalno bi poviše vatre vrtile na onu crvenu ručku...a kava je bila sive boje i moga si je u butigu kupit i to refužo bila je jeftinija od pržene...ajme kako bi kuća lipo vonjala...a i stari ruzinavi mlinac za kavu je bija u jedneme kantunu na šufitu...evo van i jedan litrat Kaštil Sućurca a vanka vrime eto nikakvo ali i temu če doč kraj...