Dalmacija moja inspiracija

davno je to bilo 19.10.1978 to je bija dan kad smo moj konpa N.T. i ja otvorili našu konobu u Nizozemskoj...ajde kliknite na konobu da vidite o čemu pišen...

priko puta naše konobe je bila jedna lipa butiga di su se prodavali pijati, zdila i sve ča triba za opremit kužinu oli restoran...evo van link o F. de R. on van je bija vlasnik o te butige...a mi dvoje pošto je još uvik vanka bilo lipo vrime mi bi van prije posla sili i čagod zalogajili...slučajnost je bila da san jedan put pripravija janječu potkoljenicu iz pečnice...sa dva tri iskrižana kunpira...malo lovora, bilega luka, mala grančica ružmarina i na po iskrižana kapula u kori koja je bila lipo ispečena...i onako uvatima mi rukon kost u jednu ruku a u drugu perunom ubadamo u kunpir i u salatu...a kruv umačemo u šug...a kraj nas na bačvi koja je bila ka stol stoji demejana crnega vina...morali smo malo razbucat ovo misto nek se počme govorit o nama...judi prolazidu a mi ono zadubjeni u spizu neobadajemo...a svit je kulturan i kaže dobar van tek naravski da govoridu po olandeški...fala, fala odgovaramo i nazdravjamo...i tako smo mi upoznali našega susida o'butige / o'pijati...sija je kraj nas dali smo mu bukaru i od onda smo cili život zajedno...bija je on puno puta i u Trogiru...ma nikad ne more zaboravit kad smo bili kod Đanga u Dugu na južnoj bandi Čiova...ma svitu moj kad su se ribari vračali u porat mekli bi kašete sa ribon na mul a riba se još uvik koprcala...spustimo se mi doli do mula a Đango njemu reče samo ti meni kaži koju češ ribu za večeru i ta če lipo na gradela...ostalo je povjest i priča koja svake godine ponavjaja...za njega je taki doživjaj nezaboravan...eeee, moj gospon Bajs to van je turizam kakvoga nan fali u Dalmaciji...

a naš amiko još uvik jema butigu i trgovinu na veliko i snabdjeva puno restorani sa biranin porcelanskin pijatima, pijadelama, čikarama i još puno tega...a ovo lito če opet do Đanga...

svi ovi litrati su van napravjeni u kužini moga prijateja...znamo se mi malo zaletit oni kod nas i mi kod nji pa guštat...a dalmacija...ma za nju nima problema pokazat čemo mi svitu kakva je...

cooking classes and cooking tours in croatia

culinary croatia

luxury croatian villas

kad san sa mojin konpom N.T. krajen sedandeseti i tijekom osandeseti
godin oneg vika u NL ima konobu nisan ni moga zamislit da ču ovaku
konobu imat doma u ovo današnje vrime kad se manje lavura a više
gušta...

bili smo mladi i koje mislija na to...

ali vrime čini
svoje...

dugo je godin prošlo i sve ča je bilo odnešeno u NL za
dekoriranje se vratilo nazad u dalmaciju...evo
van malo litrati da vidite ča je doli deboto tri metra pod
zemjom...ovod se pravi vino feštaje se oli se prolista koja knjiga o
vinima...cili je život u nikoliko kvadrata...povirite ima se ča
vidit...dalmacija vas zove...i nek van bude po voji i
guštu...

cooking classes and cooking tours in croatia  culinary croatia

luxury croatian villas

neznan kako je kod vas ali je meni uvik nikako teplina pri srcu kad banen u koje selo di se još more vidit pučko graditeljstvo...di su škure o drva i di su balature isprid kuća...turanj isprid konobe a u konobi kamenica s ujen...sičan se da mi je dida u uju drža ovčji sir...onda bi ga moja baba vazela i obrisala prvo sa bokunon one kafene karte o vriče u kojon su bile mekinje...pa bi sa pošadon ogratala koru...a dida bi ga onda riza na lipe fete...uvik je bilo pršuta a našlo bi se jutike od lani i kruva ispod peke...a moj van je dida pušija lulu a san je riza duvan...još mi je nidi doli u konobi bokun cabla na kome je dida riza duvan...a čuva ga je u sasušenome mijuru o prasca...koji je jema jednu kurdelu za vezivanje za na kaiš o gača...ajde znan da če niko reč da san počeja idealizirat život...ko da in je bilo lako u ono vrime...je jemate prav život je bija težak...al je zato meni koji san grasko dite največi gušt bija kad bi počele ferije tako da mogu pobič kod babe i dide na selo...i dan danas kad sa suprugon gren u brdo i kad vidin koju polpetu od krave oli malo tvrđe od konja oli tovara dođe mi da se slegnen i ponesen doma za u vrtal...jerbo san ka dite prije nego se smrkne mora poč "u gnjoj" vazeja bi jednu mažu i onda puten skupja i meča u mažu...i onda bi ostavija straga kuče di je bije gnjojik...normalno rukama...ko je zna za rukavice...eto i odatle vadin moje ispiracije...da ste mi dobro...