Dalmacija moja inspiracija

Ah svitu moj i litu pomalo dolazi kraj a bilo je berićetno prvo smo sami guštali pa je onda došla čer, zet i tri unuka...faštavalo se, točavalo se...bilo je verdure lipe pome, tikvice, balancane, kukumari, nikoliko vrsta paprika, murtele ka u priči...onda su počele i smokve pa smo i sušili i pravili lipe torte...suve pome i dalmatinsko začinsko bilje je kod nas zakon...maškadur je pun delicija...onda je doša sin sa neviston i unukon...ludilo...a prije tega je bila i jedna đita sa jedrilicon nismo daleko išli Drvenik Veli, Krknjaši sa malo spize, bocon merlota, a mozak na pašu, ma punili smo baterije...a sad je došlo vrime da se operu sudi i badnji...konoba je spremna za najlipšu lavuru u godini...spravjanje vina...vaja čekat još jedno desetak dana...nek se skupi slador...a onda triba i zemju pritrest, zagnjojit i pripremit za zimsku verduru...nače se brokula, kupusa, radiča...pa onda zimske salate i božični kunpiri...usput se vaja malo uvatit i rizanja ružmarina i lavande...a i moja se ekipa več priprema za svakodnevne pješačke ture po okolnin brdima...pa onda jedan put u misecu svi zajedno uz malo vatre i čagod na gradela...i tamo nidi na kraj desetega miseca vaja ispeč rakiju...eto svitu moj ništa posebnoga život gre u prvu brzinu...a sin neka samo skače u baru još malo pa če mu tribat jaketa...

Evo je prošla i ova Spliska fešta od Sv.Duje malo san đirava po gradu a u oko su mi pala ova pomagala o'kužine koje doma duperajen...ja van in svaki par godin nabavjan na voj fešti... ova peka nek još malo pričeka a i tronožac jerbo mojima još ni vrime za prominu...

drveni žlica nikad dosta ma one su za me zakon, svitu moj koji je to gušt vazest drvenon žlicon malo šuga za provat jeli spiza dobro začinjena...

a peštadur oli po Rvacki mužar od drva je lipo jemat za ukras ali ja ipak duperan peštadur od granita...

sito za brašno je samo tako pogotovo za moje integralno koje nabavjan u Grabu kod Ike i Mladena a daske za tuč meso uvik tribaju bit pri ruci...za bržole, šnjicele, skalopine oli piletinu...ma uvik triba druga daska...

a ove lonce i glinenu peku san odlučija nabavit dogodine...pogotovo ove lonce idealni su za starovinske štufade i tingulete...

satara za rizanje mesa o'kostiju i za tunjevinu je potribna u svakoj kužini...evo san skoro završija novu litnju kužinu iza kuče di če bit fešta od starovinski riceta...dalmacijo budi i ostani ovaka...ma koja mikrovalna pečnica oli magnetron moredu kontra vatre i ove tradicije...

culinary croatia

luxury croatian villas

Učinin đir po supermarketu i vidin da nas je potrošačko društvo uvatilo u đir. Svega ima za kupit sve je napo spravjeno tako da je obid čas posla gotov i moremo sist isprid TV u meknit mozak na pašu.

Svitu moj ne dajmo da nas taki način života proguca, ja san se več odavna okrenija drugovačijemu životu, kad nas doma sve gre u drugu brzinu, kvaliteta života je isprid kvantitete a to nas čini zadovojnin.

Tempo živjenja je posta ubitačan, nimamo više vrimena za spravjanje spize, ako želiš njoke onda i moreš kupit več gotove. Niki robot na tekučoj traci i je napravija, robot je izmiša brašno, jaja, kunpir i ostalo, robot je spakira i onda nan lipo na pakovanju piše, ovi njoki su van onaki kakve su naše none spravjale. Je malo morgen.

Ja se borin koliko mogu, kad san ima restoran kuva san sve friško ali san zato mora več u jedanajst uri ujutro bit u butigu, sve nabavit i pripravjat da bi sve do šeste ure bilo gotovo, kad bi nan prvi gosti dolazili na večeru.

Ma ima bit da mi u glavi fali jedna žica kad san taki.

Sad kad su supermarketi nedijon zatvoreni pravo je i idealno vrime za dobre starovinjske obitejske obide. U subotu se napravi pašticada a u nediju se spravjaju njoki.

I vrimena je napritek da se refa cila šetimana. Koliko smo vojni životu dat više kvalitete ovisi o nama. Mala smo zemja i malo nas ima, nažalost oko nas su papani koji nan prodaju sve i svašta a mi smo gori o nji, poslušno sve kupujemo i padamo na njiove baketine.

Još nije sve izgubjeno uvatima se kvalitete budimo izbirljivi, kritični, bojkotirajmo nike proizvode a s tim bojkotom če doč i do korekcije, znan da je lako ovo pisat, ma stvarnost je postala drugovačija.

cooking classes and cooking tours in croatia culinary croatia

luxury croatian villas