Dalmacija moja inspiracija

Kvragu i klima i koje ovako namistija, prije nikoliko godin smo ostavjali limune na cablu i kad bi nan tribalo limuna za štrukavat onda bi ubrali onoliko koliko bi tili duperat ostalo bi reslo daje tako de je duralo po cilu zimu...a sa su došla nika druga vrimena sve je popizdilo...čitan prognozu vrimena, biče leda temperatura če se kalat ispod nule a usput če i olujna bura punit...onda znan ča mi je za činit, nima druge vengo pobrat limune i napravit sirup...to je bilo ove zime i sad je došlo vrime za to...ma nije samo sirup usput san napravija i limuncelo ali o temu drugi put...ajmo onda ovako, ovo limuna ča vidite to je jušto za jedno pet šest litri sirupa...sve san štruka a košpice sa bacija ča...a u sok san doda dva i po kila cukra...dobro promiša da vas cukar bude raskrabjen...navisija san sok do temperature od 80 gradi, čer nan je poklonila ovi lipi termometar za mirenje temperature spize a tu temeperaturu sirupa vaja postič da se vitamini sačuvaju...boce san opra a ove čepe na zavidavenje san iskuvava jedno desetak minuti...kacijolon san priko livka nalija sirup u boce i onda san i sa onin steriliziranin čepon zatvorija...odma san i polega i to van je to...ola če če unuci i unuka guštat...ma ko more ovo platit...svitu moj neprskani limuni, ma ne samo neprskani me još in dodajen samo stajskega gnjoja...a dica zdrava da ne mogu bit zdravija...ajme...

Evo san napravija ukusni đem od suvi smokava...vazeja sa kil i po suvi smokava koje san iskriža na male bokuniče...petejku san bacija ča...

navisija san po litre vode sa po litre cukra...temu san doda po ištrukanega limuna i suve smokve...sa blenderom san sve pasira...

kad je postala gusta masa onda nju testiran tako da na kučarin meknen malo smjese i kad nakrivin kučarin onda smjesa nesmi da se makne to van je tek onda gotovo...u kjučalu vodu san meka staklenke i poklopce i temu doda po tri limunova lista na svaku  staklenku...napunin staklenke pa i začepin... okrenen i naopako...nakon jedno deset minuti okrenen i nazad i spremin u maškadur...još koja šetimana pa če doč i unuci...a onda počima fešta o đema na domačemu kruvu...

cooking classes and cooking tours in croatia

culinary croatia

luxury croatian villas