Dalmacija moja inspiracija

nakon ovi ladni dana nima ništa lipšega vengo se nač okolo kamina i
bacit čagod na gradela...ništo san pritaka vino i muva se u konobi a onda san iša kod susida di se skupila ekipa...prvo smo kušali novu
travaricu sa malo rute, malo koromača, malo smričke...lipo je lizla niz
grlo...onda je amiko meka na gradela bržole o'vrata ...našlo se i kruva
kojega smo malo bacili na gradela..mlada kapula je iz vrtla...a uje
o'oblice i to od
ove godine...jilo se, pilo se, čakulavalo se i načeli smo par aktualni
tema ali o temu nebi ovod...da mi ne prisano ona lipa spiza...dok se
meso peklo susid je izriza malo pancete...a ova friška sa litrata nek gori
visi da se još malo nadimi...na kraju smo otvorili i ovu bočicu Tokaja...lipo
nan je lega...eto svitu moj nije da nan je loše iako bi moglo bit
boje...ali nima veze sve nan je ovo naša sudbina dala...

Svitu moj svi mi znamo da su nan zanji desetak godin novepečeni biznismeni napunili glavu da se centrifugiranjen dobije kvaliteteno maslinovo uje i da se brzo spravja...ajmo reč da in ta stoji...ali u nika davna vrimene se maslinovo uje radilo u onin ujaramo di su mlivene masline mečali na one nazovimo pijate i onda bi ti pijati išli pod prešu pa bi se priko separatora odvajalo uje od vode i šporkice...eto tako bi i ja tija da se moje uje radi...znan da jema još taki preša po Dalmaciji ali ja triban ubrat puno maslin da tamo moga pravit uje...e sad vidite ovo upozna san jednaga maslinara kojeme je puna kapa centrifugalnega pravjenja uja i on se odluči da nabavi sve ča je potribno za jednu malu ujaru, ma ta če ujara bit za njegovi 400 cabal maslin a ako bude sriće onda če i bit i puno više pa nek dica nastave lavuravat...a nađe se i čagod prijateja i poznanika koji su ludi za tradicijonalnin načinon pravjenja uja tako da i njima pomogne a čovik je zajubjen u masline i oče jemat uje onako kako je nekad bilo...u Italiji je nabavija prešu od 400 atmosfera pa one pletene pijate, pa makinju za mlivenje, našlo se ništo sudi od rostfraja, a dogodine če bit i rustikalna prostorija da se more doč kušat uje i razgledat maslinik jerbo je ujara usri maslinika eto nan prilike da pokažemo ko smo i kakvi nan je život...ma glavni aparat u ujari je ovi starovinski separator koji odvaja vodu i šporkicu od uja, njega je puno tražija i kad ga je naša niko ni bija sritniju od njega...to van je oni aparat koji je pituran u zeleno...dok se uje cidilo moj ga je amiko sa jednon suvon krpon stalno glanca i kaže mi evo popipaj kako je ladan a vidi kako uje iz njega izlazi deboto je bistro...ovo je bija niki mali genij koji je napravija ovaki separator...jedna van je preša do 200 kili maslin...nakon vaganja se prvo sve sameje onda se meče na ove pijate...to van gre poluautomatski ti pijat se vrti a mlivene masline se sa jednon punpon meču na nji i sve se lipo poreda...preša van je posebna priča...čin je preša počela pritiskat počela je laganon teč voda i uje, ajme koji je to gušt vidit kako se lipo cidi jerbo znaš da je počelo i da če bit ludilo od uja...iza preše je jedan lavandin o rostfraja di se uje u'šporko cidi a ta se cidajka tresa jednin motoron tako da uje i voda prolazidu kroz male buže od cidaljke a krute stvari gredu lagano prima jedneme maštilu to van sve stoji malo ukoso da se more lagano livat prima doli...a uje i voda u lavandinu se sa punpon dižu do visine od jedno dva metra di je rezervar o'rostfraja i odatle se slobodnin padon spušča do separatora...e tu je sad meštar koji čini komende pušča vodu-uje pa malo vode...u separatoru se odvaja voda od uja, baca se šporkicu iz cidajke i onda se na jednu špinu počme odvajat voda sa šporkicon a na drugu špinu izlazi njegovo Veličanstvo djevičansko uje sa ladne preše, ka prvo san sa prston uvatija malo uja i kuša ga, likarija...lavura oko separatora je pravi posal i nije za bacit, tu se okriču špine odvaja šporkica droz cidajaku...a ti se separator nakon četiri makinje otvara i iz njega vadi sve ono ča se zalipilo...eto ja san jema 165 kili maslin i dobija san 25 litri uja...platilo je 15 ipo...onu speštanu kominu san ponija doma i meka na kompostiranje, naravno kad se napravi kompost biče za masline...i sad dolazi ono najglavnije, sve van to traje jedno dvi ure...da bi se od jedne makinje dobilo uje...eto van ga na, sad če niko reč puno je sporije nego ona centrifugalna ma je to je tako ali je zato rezultat, bar je tako meni, puno boji i uje je visoke kvalitete...neču van špijavat di je ujara nek ovo ostane mala tajna dalmatinskega maslinarstva...

eto nakon pečenja rakije je doša red na branje maslina...lipe masline, stare su sto i olala godin...domače oblice, ma lipota od cabala, šest stari dama u redu...lipo su se kraj kuće poredele ka prave lipotice, liti je ispod nji duboka ladovina zimi je burobran a i kući daju pravi dalmatinski mot...iza kuće jeman posađene mlade ma jušto deset cabala, lani su prvi puta dale plod a ove godine je bilo pet šest kili maslin...a u đardinu isprid kuće jaman još šest ali te če malo počekat...tek san i posadija...ove godine je urod odličan, bude li sriče uvatit čemo jedno dvadesetak litri uja...eto, vino u konobi zrije, rakija je ispečena, kruv je itegralni a sol je sa Paga i to krupna a uje je tu dok če se inčuna i kapara nač...gušti mogu počet...