Dalmacija moja inspiracija

ovin postom započiman još jednu kategoriju a to je # dalmatinska kamena kuća #...evo je prošlo ništo vrimena da smo uspili kupit jednu malu kamenu kuću u kaštilima...jema 45m2 korisne površine i to tri puta po 15m2...pritlevu, kat i šufit...od mora je daleko jedno 30ak metri a nalazi se u uskoj kaleti na jedneme kantunu, kuća se sa dva dila drži susida jedan dil gleda na kalu do mora a drugi dil prima kali koja je treso, u tu kalu treso čemo meknit stol i dvi katrige a u pitare posadit lavandu, ružmarin, đirane i šparogu...liti če se sidit vanka ka ča domači svit čini...unutra je još sve isto kako je bilo 1959 kad su je stanari napustili...pritlevu je bila konoba za vino i kamenica za uje a tu su još bili vezani tovar i koza, na prvi kat se spavalo a na jedneme zidu je falša ponistra ona če kad bude gotova bit lipota od buže...a na šufitu je bila kužina gori su sve grede pocrnile o dima...ove zime započiman sa restauriranjem, jema puno posla ali pomalo...sve če ič kako struka zapovida, zato smo je i kupili...prvo vaja skinit krov i meknit nove grede...izolirat krov i vratit nazad kamene ploče krovišta...onda te ploče piturat japnon...potribno je iznutra otuč stari inkarat...sprovest letriku kroz fuge i onda sve ponovo fugirat...dva drvena tavana vaja zaminit a i grede od tavana...dvoje drvene skale prominit...vaja meknit nove zatvote sa caklima i škure a i vela ulazna vrata...pa nadricat luminar...u prizemju če bit kužina i banj...a vaja i kanalizaciju i vodu sredit...a u to malo prostora tribamo još meknit jedan stol i dvi katrige da se ima di užinavat...ispod skala če stat dvi bičiklete na rasklapanje tako da gosti moredu điravat kroz kaštila...na prvi če kat bit dnevni boravak a na šufitu spavača soba...izvanka je vaja ka prvo dobro oprat sa miniwaschom a tek onda triba vidit očemo li je pjeskarit oli ostavit oprano i samo fugirat...eto to bi bilo za sad...ovod ču meknit sve kako napreduje restauracija pa ako jemate savjet onda se nemojte ustručavat i čagod napisat...za me je ovo putovanje u nepoznato...i ako sve bude ič po planu onda bi se tamo nidi na lito 2011 moglo počet afitavanje fureštima a bome i domačima jušto za dvoje brez pomočnih posteja...nabavili smo i starovinskoga namještaja koji još jema dušu...a sve čemo uredit minimalistički tako da ostane prostora jerbo je sve to u malo...website je u pripremi i lavura more počet...

lito je bilo vilovito i gastronomski na visokeme nivou...ja van
volin organski kuvuckat, ustvari onako kako se u davna vrimena kuvalo...a to bi van značilo sve ča posadin u vrtal i
ča kupin vaja bit ekološki na zavidnoj visini...a bi če nan sve teže tako
kuvat...jerbo če nas globalizacijski tokovi satrat...volija bi da se u
Dalmaciji stvori jedan eko klaster proizvođača verdure
ka ča se stvara okolo maslinova uja...klaster bi na tržište nudija
visoko kvalitetne proizvode...pošto je ovod rascipkanost parcela nebi
bilo zgorega da se proizvođači udruže u interesne zajednice ma zajedno su jači a ta verdure
in triba bit sa kontroliranin porjeklom simena i sadnica...svitu moj globalizacija
če nas poist a mi čemo zaboravit na one stare domače okuse i vonj...osobno san se potrudija da sačuvan sime od pomidora,
bosiljka, rukole i još par vrsta verdure...a ako ko jema autohtoneg
simena koji nije hibridni...more se komodno javit i u kuverti poslat...desetak zrna je dosta
za počet skupjat jednu sjemenoteku..ajmo sad do spize...na pijatu je
rižot od domačega pulastra...angriz je talijanski...a bosiljak je iz našega vrtla...nadaje pohani cvit od tikvice, balancana, tikvica,
pomidore, paprika i selen su iz također iz našega vrtla iza kuće...# maslinovo uje # nektar kvasina # vino # su posebne blog štorije ako na nji kliknete onda se otvara novi svit...u našoj litnjoj kužini smo od promaliča do kasne jeseni a doma samo spavamo...ma bilo nan je puno lipo...sa dicon, unucima, prijatejima...

a i ovod jema lipega i korisnega  za vidit...culinary croatia...

dalmatinski je običaj da se jutika stavi u kvasinu...gušti su to poist kad je odležala na suncu...sičan se da mi je baba na balaturi imala jutiku i orahovicu...a ispod balature di je tunbin visila je i cidila se konšerva...a sad je gremo kupit u supermarket i onda u kolica do kase...ajmo se vratit do moje jutike...ja van ovako pripravjan jutiku...vazmen frišku jutiku skinen jon vanjsku i još jednu kožicu...u mali wok stavin mišanoga uja i kad se ugrije dodan po kučarina masla...meknen friške jutike koju san pripolovija...sa svi strana i malo požutin i kad dobiju boju dodan malo soli i papra...pospen sa origanom (iz moga đardina) i dodan pinkicu češnjaka...dodan još jednu žlicu maslinova uja...onda ulijen moje nectar kvasine ne više nego pet šest kapi i sve zalijen merlotom jedno dec ipo...brzo poklopin i nakon jedno dvi minute skinen poklopac i ostavin da malo vino iskuva...ovo van je ludilo od spize...jutika mora da bude adente...serviran uz janječe filete...sa malo divje špinjača i salate od rokule...domači kruv i vino nan je pri ruci...nima van puno posla oko tega...