Dalmacija moja inspiracija

Nije da san često u Splitu ali ka san onda volin sist u ovi Grand cafe Bajamonti...na mistu je di je bija kino Marjan...a tamo 60ti godine onega vika san ka dite iša u kino Marjan...eto sad je lipo misto sa ukusnin migom prima povjesti tega kultnega mista...uostalome navratite, nima šminke, nima puvandera sa debelin lancima o'zlata oko vrata...vrti se lagana mužika a i za pušače jema šesni sepere...o'spizi van ne mogu ništa napisat možda nikon drugon prilikon...evo van litrati pa pogledajte...

Uvik ka san ovod gren se popet na naše čarobno brdo Marjan...evo je bija dan Marjana, prvo san iša kod matere pa san jon i sebi napravija soparnik, bilo nan je lipo, a ka je mater malo išla pižoletavat ja san se prošeta do Grada i popeja na Marjan...pitan se disu ona vrimena ka gori nisi moga proč o pustega svita a sad jad i tuga samo je bija dugi red di su se prodavali čevapi u lepinji...hm, e moj Splite zaboravija si slane srdele i to one drito iz barila...ali nima veze sa su nika nova vrimena i niki novi judi...bar se tako pivalo u nikoj pismi...eto meni ni šušta ni gušta...oma san produžija daje, tija san nač onu maginju koju smo ka klinci svake jeseni brali i jili lipe crvene plodove, tako da bi nan docnije ka bi došli doma u crivima bilo ludilo...i naša san ga, cablo maginje je veliko ka kuća, jema bit da san ostarija...drago mi je da su uza cestu posadili puno maslina to nan je stvarno falilo na Marjanu...za sve one koji nimaju pojma o čemu pišen Marjan van je kultno brdo na istimenome poluotoku zapadno od Veloga Varoša...ova zanja fotka van je kuća u Senjskoj kali di san ka dite živija a disu one dvi otvorene ponistre je bija naš stan ona desna je o'kužine a ona liva je ponistra je o'tinela...ja san iša prva 4 razreda pučke skule u skulu Marjan...a ostatak u Meje odma desno iz tunela u ondašnju skulu Duško Mrduljaš ali on je van je bija u partizanima i njegovo ime se više ne spominje...ola ča smo jaki u njegovanju naše povjesti a i njegova rodna kuča malo poviše di je konoba Fife je zapušćena...nima veze moje ditinjstvo je bilo na Marjanu, Zvončacu, Ježincu, Sustipanu i Matejušci...ko to more platit...stojte mi dobro...

Sad kad je malo zaladilo tija bi meknit nikoliko litrati sa Sustipana...ovo je litrano 6.desetega 2009te godine...kad san bija dite svoje san ditinjstvo sproveja u Velome Varošu...ka dica smo se išli kupat na Jadrana i na Zvončac, sičan se koji je to bija gušt kad san prvi put dopliva do kavala di je sad lukobran od one male lučice...sad kad san tamo proša bilo mi je malo smišno vidit da je sve to tako blizu...

na Sustipan san uvik iša sa morske bande...amiko Joško iz Peniča kale je jema jednu lipu drvenu pasaru i mi smo sa Matejuške veslali do Sustipana...išli bi se pentrat uza stine i tražit jaja od galebovi...ma to su bile lipe zajebancije ko to more platit...a znali smo na vesla potegnit i do Čiovske kave na banjanje...

sičan se ka dite kad su iz grobnica pribacivali kosti na Lovrinac sve mi je to nikako bilo nestvarno mrce i stine pribacivat a moglo se sve ostavit ka ča je i na Merjanu Židovsko grobje ali eto taki je život oli smrt...žalosna nika vrimena žalosni niki judi...evo van ovod...

a kad san več bija momak onda san iša i na ples u onu baštu od Zvončaca...malo daje je bija košarkaški klub Split...ako se ne varan onod su i brača Tvrdić započeli karijeru...

ostale su uspomene a oni plato di je bija plesnjak je još onod zapušten u korovu čeka nika nova vrimena da bi se sve finalmente prominilo...a za luksuzni odmor je ovo pravo misto...