Dalmacija moja inspiracija

ajde recite iskreno jeli ovo stvarno divota...na ovo žalo se mogu meknit jušto dva šugamana a noge vaja točat u more a pogled van je samo taki livo je marina a naprid je škver...a po konalu brodi, puno brodi...a kad se malo boje zagledaš moš vidit brod u boci tamo nidi priko mora...ma vidite ove skaline pa onda ovi rukohvat...sve je po miri kupača...

Ma kako se zovu ona dva čovika iz Zagreba jedan od nji dvoje van je iz Dubrovnika...nažuja je guicu od pustega sidenja na foteji...to van je tako u Rvackoj...ma nija da se na razumi u posal ali ipak ispada da u ovoj državi nima više nikoga ko bi moga da se uvati te lavure...tako da nan iste face sididu na svoje misto...a oni drugi je malo bucmast jema očaline ka Ari Poter...a drži resor di se okriču za nevirovat jedno sedan milijardi dolori...a kladija bi se da nezna nabrojit sve Rvacke otele sa pet zvizda...to van je tako kad se još uvik po političkeme kjuču biraju Ministri...onda van uvik ispane nika tanka bevanda...e moj gospon Bajs i moj gospar Bulić ka se pravi promocija Rvacke onda vaja pogledat kako to radidu Leteči Olandezi...ma svitu moj je da nan je Rvacka lipa i sve ostalo ča znamo reč bla,bla,bla, ali ča je pretjerano onda je stvarno pretjerano...da su nan Leteči Olandezi ovoliko prostora dali i sa ovakin lipin litratima to je za nevirovat...

evo gledan, ka prvo naslovnica magazina za turizam Reizen to van je po naši Putovanja...na naslovnici je litrat o Rovinja a doli na naslovnici ispod piše da jemaju reportažu o Rvackoj trojci...Rovinju Zadru i našeme Trogiru...

Rovinj i Istra...u kaletama male butige di su umjetnici a svudi po kaletama su šesne oštarije...cilo zaleđe je tamam po miri...a pogotovo za pravit izlete do Motovuna...pa onda kušanje vina i tartufa...

spuščajuči se doli prima Dalmaciji došli su do Zadra...grad povjesti sa puno arheološki spomenika...a morske orgulje i pozdrav suncu su nezaboravan doživljaj...

ova duplerica sa Kornati govori sama za se...Kornati su in bili nezaboravan doživljaj...

A naš Trogir opisuju ka lipi jupki gradič kojii ti taman more stat u žep...sve se more  obič u sat vrimena a kad se opet gre u đir onda se to more i odužit i na nikoliko uri...vaja dignit glavu i bacit pogled na ponistre i obitejske grbove na pročeljima vila rusticana...grad Trogir van je misto sa puno kontrasti...mondena riva...ribarsko težečki dil Pasike...i onda šušur u centru...Trogir se ne more opisat Trogir triba doživit...

Ča mogu dodat na vo...kad vidin koliko je lipi mista na Mediteranu o kojim se mogu pravit reportaže onda se moran počešat iza uva i reč...svaka van čast Leteči Olandezi evo brojin...naslovnica, pet duplerice i još jedna zanja stranica...ma nek je Istra i Dalmacija ali je stvarno obilato...a ča se tiče ona dva čovika koja san gori spomenija...gospona Bajsa o gospara Bulića...znate ča...bika vaja uvati za roge a ne trubit i zahebavat narod sa izjavama koje nimaju nijanci ovoliko istine...ima nas koji baratamo sa puno svjetski jezika i koji čitamo domače i stranjske medije...nismo ovce...a leteči Olandezi su van odradili posal kako mirita...ko to tamo lobira...ajde biče kako bude...a i meni je pomalo pun kufer svega...

cooking classes and cooking tours in croatia

culinary croatia

luxury croatian villas

Supruga me ubode laktom u rebra i kaže ajde stari očemo li malo do
Amsterdama, povirit čemo kod sina, uvatit koju teracu, čagod užinavat,
ajde more kažen ja a san u sebi znan da jon je to izlika za poć malo po
butigan i na kraju u HM kupit monture.

Ma do grada nan je desetak minuti
vlakom a sinova firma je vizavi
Centralne stanice o'ferate. A sina nan nije tek tako uvatit, posal i
odgovornost je velika ali nima veze glavno je da se moremo nač.

Ovi
litrat van je kanal Amstel a ono desno iza mosta je najboji
Amsterdamski otel normalno da se zove Amstel otel. Zanji put san pisa o
vrimenu da je ovod led i da su kanali pod ledom tako
da su se Olanđani masovno uvatili njiovoga popularnega zimskeg sporta a
to van je klizanje na ledu.

Zato san meka san ove litrate o prošlega promaliča
specijalno za našu priju Van Gogi jerbo je ona ovod bila u jedanajsti
misec tako neka more vidit kako je u promaliče.

Inače van je u
Amsterdamu uvik puno turista normalno da i je liti
puno više ali i u ovo vrime je ludilo.Ma u cili Amsterdam na godinu
dan dođe više furešti nego u cilu Rvacku. Na godinu se u NL inkasira 33
milijarda eura a to van je 3% od bruto nacionalnga prihoda Nizozemske.
Rijks muzej, Graski muzej, Van Gogh muzej, krstarenje kanalima, crvena
četvrt, brusione dijamanata, coffeshops, i još puno tega u okolici
privlači turiste iz cilega svita.

A moja boja polovica ova plavuša
traži libre na buvjaku.

A ovi litrat van je javni kondut za malu potribu
ali samo za muške.
Ima jedna poznata fotka od Roger Moora, kad mu je bila potriba jedan ga
je paparazzo uvatija u ovakemu kondutu.

I tako malo pomalo s mosta na
most, ona gleda butige a ja okolo
litrajen.Na kraju ja činin kuco i nosin bagaje i onda obično sidnemo
na koju šesnu teracu kraj kanala čagod užinavat i popit i ča nan je
najdraže gladat jude.................nima puno razlike od od spliskega
đira...

cooking classes and cooking tours in croatia

culinary croatia

luxury croatian villas