Dalmacija moja inspiracija

u vrtlu je posla napritek, debje grane rižen i slažen za ložit...tanje za gradela...lišće gre na kompost...a kompost mi je pun puncat...ove godine su promrzli mandarine i limuni...ali nima veze bilo je fruta na pritek...uvatija san se gratanja stare piture u bazenu triba ga svake dvi godine pituravat...za guštat triba i lavurat...jema cila šetimena da je loza obrizana...a bršjan triba ukrotit debote okolo cile parcele raste tako da se stvorila intima...mrzle grane od agruma ču u treči misec rizat, nek sad ostane ovako...puno tega u đardinu je zimzeleno tako da kod nas nima zimske depresije...eno vidin da je mendula napupala još malo pa če bacit cvit...i dok ja sve na tanane sređujen došlo je vrime i o'obida...dvi salate iz vrtla na sitno...bokun pečenega batka o tuke na bokuniče...jedna balancana na sitno...kozji sir na bokuniče...kapula i to crvena...pomidore brez kore na sitno...češnjak na sitno...sve to osin salate pofrigan...dodan maslineva uja, malo kvasine, par kapi naše nektar kvasine, kučarin gratanega sira,i jedna žlica majoneze...sve to dobro promišan ostavin da se malo oladi ali da ostane teplo i onda pomišan sa salaton...sol i papar onoliko koliko triba...kruv san malo popržija vino je iz livega suda i to van je to...kripno, zdravo i svega pomalo...promaliće more počet...

Meni su največi gušti napravit đir po pazaru, ovod u Amsterdamu i jema u svakome kvartu ali mi je Albert Cuijp najdraži...krajen sedandeseti godin onega vika san zajedno sa mojin kompama M. i N. vodija restorane Sarajevo i Kaštelet...Sarajevo je bilo jedno po kilometra od pazara a Kaštelet je bija jedno sto metri od pazara...pravit spizu i nabavjat frišku verduru je bila svakodnevna fatura...ma koju smo samo ribu i ostale morske delicije ovod kupovali, to je za nevirovat...ništa se na pazaru nije prominilo sve je ka i prije...evo van malo litrati pa pogledajte koje su cine i koja je ponuda...pazar je svaki dan osin nedije, ponuda povrča je izvrsna a posebno moran spomenit...škojke, jastoge, škampe, kozice i razne vrste ribe, ajme divote...ovod na pazaru se mogu nabavit i friške začinske trave origano, kaduja, koromač, mažuran, timijan i da daje ne nabrajan...svudi je šušur i multikulturalnost tako da se moremo lipo opustit, eto svitu moj ovod su van litrati...samo bi tija napomenit da su ove šparoge na prveme litratu jedan euro za mac...a na pazaru u Splitu tražidu 20 kunića za mac...ma koje ovod lud...

evo malo novitadi okolo početka gradnje pla'caklenika oli van boje rečeno zimskega vrtla...bloketi su nabavjeni, cimenat je na suvo a žalo je na jarpi...ovi vratni okviri bile boje če bit sa zapadne bande potavjeni na nož, a biće i fiksirani i neče se moč otvarat, a između svakega ču maknit vertikalne nosače...da se mogu povezat jedno sa drugin...a ova kafena vrata če bit ulazna u zimski vrtal a one dvi ponistra isprid kafeni vrata če bit montirane livo i desno od ulazni vrata...sad kad je prošla prva marčana bura i nek prođe ova pusta kišurina onda se vaja uvatit montiranja...